ಬೇಗ-ಬೇಗ ಆಹಾರ ತಿನ್ನುವ ಅಭ್ಯಾಸ ಒಳ್ಳೆಯದಲ್ಲ

ಆಧುನಿಕ ಜೀವನ ಶೈಲಿಯಲ್ಲಿ ಒತ್ತಡ ಎಂಬುದು ದಿನನಿತ್ಯದ ಸಮಸ್ಯೆಯಾಗಿಬಿಟ್ಟಿದೆ. ಶಾಲೆಗೆ ಹೋಗುವ ಮಕ್ಕಳಿಂದ ಹಿಡಿದು
ಗೃಹಿಣಿಯರು, ಕಚೇರಿಯಲ್ಲಿ ಕೆಲಸ ಮಾಡುವವರು ಅಂತೆಲ್ಲ ಭೇದವಿಲ್ಲ. ಎಲ್ಲರಲ್ಲೂ ಒತ್ತಡ ಎಂಬುದು ಆಗಾಗ ಸೃಷ್ಟಿಯಾಗುತ್ತದೆ. ಅದು ನಾವು ಸೇವಿಸುವ ಆಹಾರದ ಮೇಲೂ ಪರಿಣಾಮ ಬೀರುತ್ತದೆ.

ಮೊಟ್ಟಮೊದಲಿಗೆ ಒತ್ತಡದಲ್ಲಿ ನಾವು ಆಹಾರ ಸೇವಿಸುವುದರಿಂದ ಸರಿಯಾದ ರೀತಿಯಲ್ಲಿ ಜೀರ್ಣವಾಗುವುದಿಲ್ಲ. ಯಾಕೆಂದರೆ ಆಹಾರವನ್ನು ಜೀರ್ಣಿಸಲು ಬೇಕಾಗಿರುವ ಎನ್‌ಜೈಮ್‌ಗಳು ಹಾಗೂ ಜೀರ್ಣರಸಗಳ ಉತ್ಪತ್ತಿಯಲ್ಲಿ ಏರುಪೇರಾಗಿ ಆಹಾರ ಸರಿಯಾಗಿ ಜೀರ್ಣವಾಗದೆ ಹೊಟ್ಟೆ ಉಬ್ಬರ, ಆ್ಯಸಿಡಿಟಿ ಹಾಗೂ ಕೆಲವೊಮ್ಮೆ ವಾಂತಿ, ಭೇದಿ ಕಾಣಿಸಿಕೊಳ್ಳುತ್ತದೆ.

ನಾವು ಸೇವಿಸುವ ಆಹಾರವು ಆತುರಾತುರವಾಗಿ ಸೇವಿಸದೆ ನಿಧಾನವಾಗಿ ಸಮಾಧಾನದಿಂದ ಒಂದೆಡೆ ಕುಳಿತು ಸೇವಿಸಿದರೆ ಉತ್ತಮವಾಗಿ ಜೀರ್ಣವಾಗಿ
ಆಹಾರದಲ್ಲಿರುವ ಪೋಷಕಾಂಶಗಳು ರಕ್ತದ ಮುಖಾಂತರ ಅಂಗಾಂಗಗಳಿಗೆ ತಲುಪಿ ಅದರ ಕಾರ್ಯ ನಿರ್ವಹಿಸುವುದರಲ್ಲಿ ಯಶಸ್ವಿಯಾಗುತ್ತದೆ.

ಕೆಲವೊಮ್ಮೆ ಒಂಟಿತನದ ಒತ್ತಡದಿಂದ ಕೂಡ ಅತಿಯಾದ ಆಹಾರ ಸೇವನೆ ಅಥವಾ ಆಹಾರವನ್ನು ಸೇವಿಸದಿರುವುದು ಕೂಡ ಆಗುತ್ತದೆ.

ಖಿನ್ನತೆ ಮತ್ತು ಏಕಾಂಗಿತನದಿಂದ ಹೊರ ಬರಲು ಕೆಲವರು ಹಸಿವಿಲ್ಲದಿದ್ದರೂ ಬಹು ಪ್ರಮಾಣದ ಹಾಗೂ ಅಧಿಕ ಕ್ಯಾಲರಿ ಇರುವ ಆಹಾರಗಳನ್ನು ಸೇವಿಸುವಂತಾಗುತ್ತದೆ. ಅವರಿಗೆ ಆಹಾರವೇ ಸಂಗಾತಿ ಹಾಗೂ ಒಂಟಿತನ ಸಾಗಿಸುವ ಪರಿಹಾರ ಅಧಿಕ ಮೊತ್ತದಲ್ಲಿ ಅಳತೆ ಮೀರಿ ಆಹಾರ ಸೇವಿಸಿದರೆ ದೇಹ ಅದನ್ನು ಖರ್ಚು ಮಾಡಲಾಗದೆ ಕೊಬ್ಬಾಗಿ ಸೇರ್ಪಡೆಯಾಗುತ್ತದೆ. ಇದೇ ರೀತಿ ಮುಂದುವರಿದಲ್ಲಿ ಸ್ಥೂಲಕಾಯ, ಸಕ್ಕರೆ ಕಾಯಿಲೆ, ರಕ್ತದೊತ್ತಡ, ಹೃದಯದ ಕಾಯಿಲೆಗಳಂತಹ ಸಮಸ್ಯೆಗಳು ದಾಳಿ ಮಾಡುತ್ತವೆ. ಆದ್ದರಿಂದ ಒತ್ತಡ ಹಾಗೂ ಒಂಟಿತನದಲ್ಲಿ ಆಹಾರದ ಕಡೆ ಗಮನ ಕೊಟ್ಟು ಸೇವಿಸುವುದು ಅತ್ಯಗತ್ಯ.

ಒತ್ತಡ ನಿವಾರಿಸಲು ಕಾಫಿ ಹಾಗೂ ಟೀಯಂತಹ ಪಾನೀಯಗಳನ್ನು ಅಧಿಕವಾಗಿ ಸೇವಿಸುವುದು ಸರಿಯಲ್ಲ. ಇದರಿಂದ ಆ್ಯಸಿಡಿಟಿ ಮತ್ತು
ಪೋಷಕಾಂಶಗಳ ಕೊರತೆ ಉಂಟಾಗುತ್ತದೆ.

ಬದಲಿಗೆ ತಾಜಾ ಹಣ್ಣಿನ ರಸ ಹಾಗೂ ಸೌತೆಕಾಯಿ ರಸ ಸೇವಿಸುವುದು ಉತ್ತಮ. ಒತ್ತಡ ನಿವಾರಿಸುವಂತಹ ಒಳ್ಳೆಯ ಸಂಗೀತ, ವ್ಯಾಯಾಮ ಮೆಡಿಟೇಷನ್‌ಗಳನ್ನು ನಿತ್ಯ ಜೀವನದಲ್ಲಿ ಅಳವಡಿಸಿಕೊಳ್ಳುವುದು ಅಗತ್ಯ.

ಉತ್ತಮ ಆಹಾರಗಳಿಂದ ಹಣ್ಣು, ತರಕಾರಿ ಸೇವನೆ ಮಿತವಾಗಿ ಸಿಹಿ ಪದಾರ್ಥ ಹಾಗೂ ಕರಿದ ತಿಂಡಿಗಳನ್ನು ಅಪರೂಪಕ್ಕೆ ಸೇವಿಸಿದರೆ ತೊಂದರೆಯಿಲ್ಲ. ಮಲಗುವ ಮುನ್ನ ಹಾಲು ಸೇವಿಸುವುದರಿಂದ ಅದರಲ್ಲಿರುವ ಟ್ರೈಪ್‌ ಟೋಫಾನ್‌ ಅಂಶದಿಂದ ಒತ್ತಡವು ಕಡಿಮೆಯಾಗಿ ಒಳ್ಳೆಯ ನಿದ್ದೆ ಬರುತ್ತದೆ.