ಕರ್ನಾಟಕ

293 ರೂಪಾಯಿಗಾಗಿ ಭುಗಿಲೆದ್ದ ಆಕ್ರೋಶ !

Pinterest LinkedIn Tumblr

pvec230416h garment-1ಬೆಂಗಳೂರು: ಭವಿಷ್ಯ ನಿಧಿಗೆ (ಪಿಎಫ್‌) ಸಂಬಂಧಿಸಿದ ಹೊಸ ನೀತಿಯ ವಿರುದ್ಧ ಲಕ್ಷಾಂತರ ಕಾರ್ಮಿಕರು ಬೀದಿಗಿಳಿದು ಹೋರಾಡಿದ್ದು ಎಷ್ಟು ಹಣ ಹಿಂಪಡೆಯುವ ಅವಕಾಶಕ್ಕಾಗಿ ಗೊತ್ತೆ? ಪಿಎಫ್‌ಗೆ ಉದ್ಯೋಗದಾತರು ನೀಡುವ ಕೊಡುಗೆಯ ಕೇವಲ ಶೇ 3.67ರಷ್ಟು ಮೊತ್ತಕ್ಕಾಗಿ!

ಕಾರ್ಮಿಕರ ಮೂಲ ವೇತನದಲ್ಲಿ ಶೇ 12ರಷ್ಟು ಹಣವನ್ನು ಪಿಎಫ್‌ಗೆ ಕಡಿತ ಮಾಡಲಾಗುತ್ತದೆ. ಅಷ್ಟೇ ಮೊತ್ತದ ಕೊಡುಗೆಯನ್ನು (ಶೇ 12) ಉದ್ಯೋಗ ನೀಡಿದ ಸಂಸ್ಥೆಯೂ ಭರಿಸುತ್ತದೆ. ‘ಉದ್ಯೋಗದಾತರ ಕೊಡುಗೆಯಲ್ಲಿ ಶೇ 8.33ರಷ್ಟು ಹಣ ನಿವೃತ್ತಿ ವೇತನದ ಖಾತೆಗೆ ಜಮೆಯಾದರೆ, ಮಿಕ್ಕ ಶೇ 3.67ರಷ್ಟು ಮೊತ್ತವಷ್ಟೇ ಪಿಎಫ್‌ ಖಾತೆಗೆ ಹೋಗುತ್ತದೆ’ ಎಂದು ಹೇಳುತ್ತಾರೆ ಅಸೆಂಟ್‌ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ, ಕಾರ್ಮಿಕ ಕಾನೂನು ತಜ್ಞ ಎಸ್‌.ಸುಬ್ರಹ್ಮಣ್ಯಂ.

ಕೇಂದ್ರ ಸರ್ಕಾರ ಫೆಬ್ರುವರಿ 10ರಂದು ತಂದಿದ್ದ ಹೊಸ ಪಿಎಫ್‌ ನೀತಿಯಲ್ಲಿ ಕಾರ್ಮಿಕರು ತಮ್ಮ ಕೊಡುಗೆಯನ್ನು ಭವಿಷ್ಯ ನಿಧಿಯಿಂದ ಬೇಕೆಂದಾಗ ತೆಗೆಯಲು ಈ ಹಿಂದಿನಂತೆಯೇ ಅವಕಾಶ ಇತ್ತು. ಆದರೆ, ಪಿಎಫ್‌ಗೆ ಉದ್ಯೋಗದಾತರ ಕೊಡುಗೆ ಮೊತ್ತವನ್ನು 58 ವರ್ಷ ಆಗುವವರೆಗೆ ತೆಗೆಯಲು ನಿರ್ಬಂಧ ವಿಧಿಸಿತ್ತು. ಅಂದರೆ ಈ ಹೊಸ ನಿಯಮ ಉದ್ಯೋಗದಾತರ ಕೊಡುಗೆಯಲ್ಲಿ ಶೇ 3.67ರಷ್ಟು ಮೊತ್ತ ಹಿಂಪಡೆಯಲು ಮಾತ್ರ ನಿರ್ಬಂಧಿಸಿತ್ತು.

ಕಾರ್ಮಿಕರೊಬ್ಬರ ತಿಂಗಳ ವೇತನ ₹ 8,000 ಎಂದಿಟ್ಟುಕೊಳ್ಳಿ. ಅದರ ಶೇ 12ರಷ್ಟು ಅಂದರೆ ₹ 960 ಮೊತ್ತವನ್ನು ಕಾರ್ಮಿಕರ ಸಂಬಳದಿಂದ ಪಿಎಫ್‌ ಖಾತೆಗೆ ವರ್ಗಾಯಿಸಲಾಗುತ್ತದೆ. ಉದ್ಯೋಗದಾತರಿಂದ ಸಿಗುವ ಅಷ್ಟೇ ಹಣದಲ್ಲಿ ₹ 666.4 ನಿವೃತ್ತಿ ವೇತನ ಯೋಜನೆ ಖಾತೆಗೆ (ಈ ಮೊತ್ತ ನಿವೃತ್ತಿ ವೇತನ ನೀಡಲು ಮಾತ್ರ ಬಳಕೆ ಆಗುತ್ತದೆ) ಜಮೆಯಾದರೆ, ₹ 293.6 ಪಿಎಫ್‌ ಖಾತೆಗೆ (ಈ ಮೊತ್ತವನ್ನು ತೆಗೆಯಲು ಅವಕಾಶವಿದೆ) ಹೋಗುತ್ತದೆ.

ತಲಾ ₹ 8,000ದಷ್ಟು ಸಂಬಳವಿರುವ ಲಕ್ಷಾಂತರ ಕಾರ್ಮಿಕರು ಪೊಲೀಸರ ಲಾಠಿ ಏಟು ತಿಂದು, ಗುಂಡಿನ ದಾಳಿ ಎದುರಿಸಿದ್ದು ಮಾಸಿಕ ಕೇವಲ 293.6 ರೂಪಾಯಿಗಾಗಿ! ಮಾಸಿಕ ₹ 8,000 ವೇತನವಿದ್ದ ಕಾರ್ಮಿಕರೊಬ್ಬರು ನಾಲ್ಕು ವರ್ಷ ದುಡಿದು ಉದ್ಯೋಗ ತೊರೆದಾಗ ಉದ್ಯೋಗದಾತರ ಪಿಎಫ್‌ ಕೊಡುಗೆ ಮೂಲಕ ಪಡೆಯುತ್ತಿದ್ದುದು ಅಂದಾಜು ₹ 15 ಸಾವಿರ ಮೊತ್ತವನ್ನು. ಆ ಹಣ ಸಿಗುವುದಿಲ್ಲ ಎನ್ನುವುದೇ ಕಾರ್ಮಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

‘ಪೆನ್ಶನೇಬಲ್‌ ಕಮ್ಯುನಿಟಿ (ನಿವೃತ್ತಿ ವೇತನ ಪಡೆಯುವ ಸಮುದಾಯ) ಪಾಶ್ಚಾತ್ಯ ದೇಶಗಳಲ್ಲಿ ಬಹು ಜನಪ್ರಿಯವಾದ ವ್ಯವಸ್ಥೆ. 60 ವರ್ಷದ ಗಡಿ ದಾಟಿದ ಮೇಲೆ ದುಡಿಯುವ ತಾಕತ್ತು ಕ್ಷೀಣಿಸುತ್ತದೆ. ಆ ವೇಳೆ ಜೀವನ ಸಾಗಿಸಲು ಆಸರೆ ಬೇಕು ಎನ್ನುವ ಉದ್ದೇಶದಿಂದ ಭವಿಷ್ಯದ ನಿಧಿ ಪರಿಕಲ್ಪನೆ ರೂಪತಾಳಿದೆ’ ಎನ್ನುತ್ತಾರೆ ಸುಬ್ರಹ್ಮಣ್ಯಂ.

‘ಅತ್ಯಂತ ಕಡಿಮೆ ಸಂಬಳ ಪಡೆಯುವ ಕಾರ್ಮಿಕರಿಗೆ ಪಿಎಫ್‌ ಎನ್ನುವುದು ಪಿಗ್ಮಿ ಬ್ಯಾಂಕ್‌ ಇದ್ದಂತೆ. ಇಲ್ಲಿ ಉಳಿತಾಯ ಆಗುವ ಹಣವನ್ನು ಬೇಕೆಂದಾಗ ಪಡೆಯಲು ಅವಕಾಶ ಇರಬೇಕು ಎನ್ನುವುದು ಆ ವರ್ಗದ ಆಶಯ. ಸದ್ಯದ ಅಗತ್ಯಗಳನ್ನು ಪೂರೈಸಿಕೊಳ್ಳುವುದೇ ಅವರಿಗೆ ಕಷ್ಟವಾಗಿರುವಾಗ ಭವಿಷ್ಯದ ಪ್ರಶ್ನೆ ಅವರನ್ನು ಕಾಡುವುದಿಲ್ಲ’ ಎಂದು ಅವರು ವಿಶ್ಲೇಷಿಸಿದರು.

‘2–3 ಜನ ದುಡಿಯುವವರಿದ್ದು, ವರಮಾನ ತಕ್ಕಮಟ್ಟಿಗೆ ಬರುತ್ತಿದ್ದ ಕುಟುಂಬದ ಕಾರ್ಮಿಕರೂ ಪಿಎಫ್‌ ಹಣ ಹಿಂದಕ್ಕೆ ಪಡೆಯುತ್ತಾರೆ. ಆ ಹಣವನ್ನು ಹೊರಗಡೆ ಬಡ್ಡಿಗೆ ಬಿಟ್ಟರೆ ತಿಂಗಳಿಗೆ ಶೇ 2ರಷ್ಟು ಬಡ್ಡಿ ಸಿಗುತ್ತದೆ ಎಂಬ ಮಾಹಿತಿ ಕೆಲವು ಕಾರ್ಮಿಕರಿಂದ ನನಗೆ ಸಿಕ್ಕಿದೆ. ಆದರೆ, ಆ ಹಣ ಹೇಗೋ ಖರ್ಚಾಗಿ ಹೋಗುತ್ತದೆ’ ಎಂದು ವಿವರಿಸುತ್ತಾರೆ.

‘ಪ್ರತಿಯೊಬ್ಬ ಕಾರ್ಮಿಕನೂ ಭವಿಷ್ಯ ನಿಧಿಯನ್ನು ಸುರಕ್ಷಿತವಾಗಿ ಕಾಯ್ದುಕೊಳ್ಳುವುದು ಅತ್ಯಗತ್ಯ. ಅದಕ್ಕೆ ಸರ್ಕಾರ ಹಂತ–ಹಂತವಾಗಿ ನಿಯಮ ಜಾರಿಗೆ ತರಬೇಕಿತ್ತು. ಮೊದಲು ₹ 25 ಸಾವಿರಕ್ಕಿಂತ ಅಧಿಕ ಸಂಬಳ ಪಡೆಯುವವರ ಮೇಲೆ ಪಿಎಫ್‌ ತೆಗೆಯದಂತೆ ನಿರ್ಬಂಧ ವಿಧಿಸಬೇಕಿತ್ತು. ಕಡಿಮೆ ಸಂಬಳ ಪಡೆಯುವ ಕಾರ್ಮಿಕರಿಗೆ ಜೀವನ ನಿರ್ವಹಣೆಗಾಗಿ ಸಾಕಾಗುವಷ್ಟು ವೇತನ ಸಿಗುವಂತೆ ಮಾಡಿ, ಬಳಿಕ ಅವರ ಭವಿಷ್ಯ ನಿಧಿ ಸುರಕ್ಷತೆಗೆ ಗಮನ ಹರಿಸಬೇಕಿತ್ತು’ ಎನ್ನುತ್ತಾರೆ ಅವರು.

‘ಕಾರ್ಖಾನೆಗಳಲ್ಲಿ ಸುಮಾರು ಐದು ಲಕ್ಷ ಕಾರ್ಮಿಕರು ದುಡಿಯುತ್ತಿದ್ದರೂ ಅವರಲ್ಲಿ ಶೇ 95ರಷ್ಟು ಜನ ಯಾವ ಸಂಘಟನೆಗಳಿಗೆ ಸದಸ್ಯರಾಗಿಲ್ಲ. ಕಾರ್ಮಿಕ ಸಂಘಟನೆಗಳು ಕಾರ್ಖಾನೆಗಳ ಆವರಣದಲ್ಲಿ ಪ್ರವೇಶಿಸದಂತೆ ಯಶಸ್ವಿಯಾಗಿ ತಡೆಯಲಾಗಿದೆ. ಯಾವುದೇ ಸಂಘಟನೆಗೆ ಸೇರಿದರೆ ಕೆಲಸ ಹೋಗುತ್ತದೆ ಎಂಬ ಭೀತಿಯನ್ನು ಕಾರ್ಮಿಕರಲ್ಲಿ ಬಿತ್ತಲಾಗಿದೆ’ ಎಂದು ಕಾರ್ಮಿಕ ಮುಖಂಡರು ಆಕ್ರೋಶ ವ್ಯಕ್ತಪಡಿಸುತ್ತಾರೆ.

‘ನಮ್ಮ ಸಂಘಟನೆಯಲ್ಲಿ 8,000 ಸದಸ್ಯೆಯರು ಇದ್ದಾರೆ’ ಎಂದು ಹೇಳುತ್ತಾರೆ ಗಾರ್ಮೆಂಟ್‌ ಅಂಡ್‌ ಟೆಕ್ಸ್‌ಟೈಲ್‌ ವರ್ಕರ್ಸ್‌ ಯೂನಿಯನ್‌ನ ಸಂಘಟನಾ ಕಾರ್ಯದರ್ಶಿ ಎ.ಎಚ್‌.ಜಯರಾಂ. ಹಾಗಾದರೆ, ಸಂಘಟನೆ ಬಲವಿಲ್ಲದೆ ಇಷ್ಟೊಂದು ಬೃಹತ್‌ ಪ್ರಮಾಣದಲ್ಲಿ ಪ್ರತಿಭಟನೆ ಭುಗಿಲೆದ್ದುದು ಹೇಗೆ ಎಂದು ಕೇಳಿದರೆ ಕಾರ್ಮಿಕ ಮುಖಂಡರು ಬೊಟ್ಟು ಮಾಡುವುದು ಕಾರ್ಖಾನೆಗಳಲ್ಲಿ ಕೆಲಸ ಮಾಡುವ ಮಹಿಳೆಯರ ಅಮಾಯಕತೆ ಮತ್ತು ಅವರು ಇದುವರೆಗೆ ಒಳೊಳಗೆ ಅನುಭವಿಸುತ್ತ ಬಂದಿರುವ ಬೇಗುದಿಯ ಕಡೆಗೆ.

ನಗರದ ಗಾರ್ಮೆಂಟ್‌ ಉದ್ಯಮದಲ್ಲಿ ಶಾಹಿ ಎಕ್ಸ್‌ಪೋರ್ಟ್‌ ಪ್ರೈವೇಟ್‌ ಲಿಮಿಟೆಡ್‌ ಸಂಸ್ಥೆಯೇ ಸಿಂಹಪಾಲು ಹೊಂದಿದೆ. 40ಕ್ಕೂ ಅಧಿಕ ಘಟಕಗಳನ್ನು ಅದು ಹೊಂದಿದ್ದು, ಸುಮಾರು 75 ಸಾವಿರ ಕಾರ್ಮಿಕರು ಆ ಸಂಸ್ಥೆಯಲ್ಲಿ ದುಡಿಯುತ್ತಿದ್ದಾರೆ. ಕಾರ್ಮಿಕರು ಪಿಎಫ್‌ ಮೇಲೆ ಅವಲಂಬನೆಯಾದ ಕುರಿತು ಚೆನ್ನಾಗಿ ಅರಿವಿದ್ದವರು, ಇನ್ನುಮುಂದೆ ಪಿಎಫ್‌ ತೆಗೆಯಲು ಸಾಧ್ಯವಿಲ್ಲ ಎಂದು ವ್ಯವಸ್ಥಿತವಾಗಿ ಪ್ರಚಾರ ಮಾಡಿದ್ದಾರೆ. ಏಪ್ರಿಲ್‌ 18ರಂದು ಮೊದಲು ಬೀದಿಗಿಳಿದವರು ಆ ಘಟಕಗಳ ಕಾರ್ಮಿಕರು. ಕಾಳ್ಗಿಚ್ಚಿನಂತೆ ಹರಡಿದ ಸುದ್ದಿ ಗಾರ್ಮೆಂಟ್‌ ಉದ್ಯಮವನ್ನೇ ವ್ಯಾಪಿಸಿತು ಎಂದು ಘಟನೆಯ ಆಳವನ್ನು ಬಲ್ಲ ಮುಖಂಡರು ಒಳನೋಟ ಬೀರುತ್ತಾರೆ.

ಎಲೆಕ್ಟ್ರಾನಿಕ್‌ ಮಾಧ್ಯಮದಲ್ಲಿ ಬರುತ್ತಿದ್ದ ನೇರ ಪ್ರಸಾರದ ದೃಶ್ಯಾವಳಿ, ಮಹಿಳಾ ಕಾರ್ಮಿಕರ ಮೇಲೆ ಪೊಲೀಸರು ನಡೆಸಿದ ಆಟಾಟೋಪ – ಕಾರ್ಮಿಕ ವರ್ಗದಲ್ಲಿ ಆಕ್ರೋಶ ಮತ್ತಷ್ಟು ಹೆಚ್ಚುವಂತೆ ಮಾಡಿತು ಎನ್ನುತ್ತಾರೆ ಜಯರಾಂ. ಕಾರ್ಮಿಕ ಚಳವಳಿ ‘ಬಲ’ ಕಳೆದುಕೊಳ್ಳುತ್ತಿವೆ ಎಂಬ ಹುಯಿಲು ಎದ್ದಿರುವ ಸನ್ನಿವೇಶದಲ್ಲಿ ಸಂಘಟನೆಗೆ ಅವಕಾಶ ನೀಡದಿದ್ದರೂ ಗಾರ್ಮೆಂಟ್‌ ಕಾರ್ಮಿಕರು ಬೃಹತ್‌ ಪ್ರತಿಭಟನೆ ನಡೆಸಿದ್ದು ಪರ್ಯಾಯಗಳ ಮಾರ್ಗ ಹುಡುಕಾಟದ ಫಲ ಎಂಬ ವಿಶ್ಲೇಷಣೆ ಕೇಳಿಬಂದಿದೆ.

30 ಸೆಕೆಂಡ್‌ಗೆ ಒಂದು ಶರ್ಟ್‌!
ನಗರದ ಪ್ರತಿಯೊಂದು ಗಾರ್ಮೆಂಟ್‌ ಕಾರ್ಖಾನೆಯಲ್ಲಿ 30 ಸೆಕೆಂಡ್‌ಗೆ ಒಂದು ಪ್ಯಾಂಟ್‌ ಸಿದ್ಧವಾದರೆ, 40 ಸೆಕೆಂಡ್‌ಗೆ ಒಂದು ಶರ್ಟ್‌ ತಯಾರಾಗುತ್ತದೆ. ಕೇವಲ 3-4 ಸೆಕೆಂಡ್‌ನಷ್ಟು ವ್ಯತ್ಯಾಸವಾದರೆ ಧ್ವನಿವರ್ಧಕದಲ್ಲಿ ಗಂಟೆಗೊಮ್ಮೆ ಆ ತಂಡದ ಹೆಸರು ಕೂಗಿ ಎಚ್ಚರಿಕೆ ನೀಡಲಾಗುತ್ತದೆ!

ಗಾರ್ಮೆಂಟ್‌ ಕಾರ್ಖಾನೆಗಳ ಒಳಗಿನ ವಾತಾವರಣ ಹೊರಜಗತ್ತಿಗಿಂತ ತುಂಬಾ ಭಿನ್ನ. ಬಟ್ಟೆಯ ಸಾವಿರ ಥಾನ್‌ಗಳನ್ನು ಒಂದರ ಮೇಲೆ ಒಂದರಂತೆ ಹಾಸುವ ಮೂಲಕ ಕಾರ್ಖಾನೆಗಳ ಬೆಳಗಿನ ಚಟುವಟಿಕೆ ಆರಂಭವಾಗುತ್ತದೆ. ಅವುಗಳಿಗೆ ಒಂದರಿಂದ ಸಾವಿರವರೆಗೆ ಸ್ಟಿಕರ್‌ ಅಂಟಿಸಲಾಗುತ್ತದೆ. ಬಣ್ಣದ ಶೇಡ್‌ನಲ್ಲಿ ತುಸು ವ್ಯತ್ಯಾಸವಾದರೂ ಅದೇ ಬಟ್ಟೆಯ ಭಾಗಗಳನ್ನು ಪಡೆಯಲು ಈ ವ್ಯವಸ್ಥೆ ಮಾಡಲಾಗುತ್ತದೆ.

ಆರ್ಡರ್‌ ಪಡೆದ ವಿನ್ಯಾಸಕ್ಕೆ ತಕ್ಕಂತೆ ಕುಶಲ ಮಾರ್ಕರ್‌ಗಳು ಫಟಾಫಟ್‌ ಅಂತ ಮಾರ್ಕ್‌ ಮಾಡುತ್ತಾರೆ. ಮಷಿನ್‌ಗಳ ಮೇಲಿಟ್ಟು ಸಾವಿರ ಥಾನ್‌ಗಳನ್ನೂ ಒಮ್ಮೆಲೆ ಕಟ್‌ ಮಾಡಲಾಗುತ್ತದೆ. ಕಾಲರ್‌, ಶೋಲ್ಡರ್‌, ಬ್ಯಾಕ್‌, ಆರ್ಮ್‌… ಹೀಗೆ ಶರ್ಟ್‌ನ ಬೇರೆ, ಬೇರೆ ಭಾಗಕ್ಕಾಗಿ ಕಟ್‌ ಮಾಡಿದ ಬಟ್ಟೆಗಳನ್ನು ಫೀಡಿಂಗ್‌ ಹೆಲ್ಪರ್‌ಗಳು ಬಂಡಲ್‌ ಕಟ್ಟಿಕೊಂಡು ಒಂದೊಂದು ತಂಡಕ್ಕೆ ವಿತರಿಸುತ್ತಾರೆ.

ಬಂಡಲ್‌ ಕೈಸೇರಿದೊಡನೆ ತಂಡದ ಕೆಲಸ ಶುರುವಾಗುತ್ತದೆ. ಶರ್ಟ್‌ನ ಒಂದೊಂದು ಭಾಗವನ್ನು ಒಬ್ಬೊಬ್ಬರು ಹೊಲಿದು ಮುಂದೆ ತಿರುಗುವ ಬೆಲ್ಟ್‌ಗೆ ಹಾಕುತ್ತಾರೆ. ಹೀಗೆ 20 ಮಷಿನ್‌ಗಳಿಂದ ದಾಟಿ ಬರುವಷ್ಟರಲ್ಲಿ ಶರ್ಟ್‌ನ ಎಲ್ಲ ಭಾಗಗಳು ಸಿದ್ಧವಾಗಿರುತ್ತವೆ. ಆಮೇಲೆ ಅವುಗಳನ್ನು ಒಂದನ್ನೊಂದು ಜೋಡಿಸುವ ಪ್ರಕ್ರಿಯೆ ಆರಂಭವಾಗುತ್ತದೆ. ಸಿದ್ಧವಾಗಿ ಬಂದ ಶರ್ಟ್‌ಗೆ ಕಾಚಾ ಬಟನ್‌ ಅಳವಡಿಸಲಾಗುತ್ತದೆ ಎನ್ನುತ್ತಾರೆ ಜಯರಾಂ.

ಗುಣಮಟ್ಟ ಪರೀಕ್ಷಿಸಿದ ಬಳಿಕ ಇಸ್ತ್ರಿ ಮಾಡಲು ಕಳಿಸಲಾಗುತ್ತದೆ. ಇಸ್ತ್ರಿಯಾದ ಬಳಿಕ ಪ್ಯಾಕ್‌ ಮಾಡುವ ಮುನ್ನ ಮೆಟೆಲ್‌ ಡಿಟೆಕ್ಟರ್‌ಗಳಿಂದ ಸೂಜಿ ಮತ್ತಿತರ ಪದಾರ್ಥಗಳು ಉಳಿದಿವೆಯೆ ಎಂಬುದನ್ನು ಪರೀಕ್ಷಿಸಲಾಗುತ್ತದೆ. ಬಳಿಕ ಪ್ಯಾಕಿಂಗ್‌ ಮಾಡಲಾಗುತ್ತದೆ ಎಂದು ವಿವರಿಸುತ್ತಾರೆ ಗಾರ್ಮೆಂಟ್‌ ಲೇಬರ್‌ ಯೂನಿಯನ್‌ ಅಧ್ಯಕ್ಷೆ ವಿ.ಪಿ.ರುಕ್ಮಿಣಿ.

ಗಂಟೆಗೊಮ್ಮೆ ಯಾವ ತಂಡ ಎಷ್ಟು ಶರ್ಟ್‌ ಸಿದ್ಧಪಡಿಸಿದೆ ಎಂಬ ಲೆಕ್ಕ ತೆಗೆದುಕೊಳ್ಳುವ ಫೀಡಿಂಗ್‌ ಹೆಲ್ಪರ್‌ಗಳು ಆ ಮಾಹಿತಿಯನ್ನು ಮೇಲಧಿಕಾರಿಗಳಿಗೆ ನೀಡುತ್ತಾರೆ. ಫ್ಲೋರ್‌ ಇನ್‌ಚಾರ್ಜ್‌ಗಳು ನಿತ್ಯದ ಗುರಿ ತಲುಪಿದ ಬಳಿಕವೇ ಆ ತಂಡದ ಸದಸ್ಯರನ್ನು ಮನೆಗೆ ಬಿಡುತ್ತಾರೆ ಎಂದು ಅವರು ವಿವರಿಸುತ್ತಾರೆ.

Write A Comment