ಜುಲೈ.31 ರವರೆಗೆ ಮಂಗಳೂರಿನ ತಣ್ಣೀರುಬಾವಿ ಟ್ರೀ ಪಾರ್ಕ್‌ಗೆ ಸಾರ್ವಜನಿಕರಿಗೆ ಪ್ರವೇಶವಿಲ್ಲ

ಮಂಗಳೂರು ಜುಲೈ 04 :ಜಿಲ್ಲೆಯಲ್ಲಿ ಹರಡುತ್ತಿರುವ ಕೊರೋನಾ ವೈರಸ್-19ರ ಪ್ರಸರಣವನ್ನು ತಡೆಯುವ ಮುಂಜಾಗೃತಾ ದೃಷ್ಟಿಯಿಂದ ತಣ್ಣೀರುಬಾವಿ ಟ್ರೀಪಾರ್ಕಿನ ನಿರ್ವಹಣಾ ಸಮಿತಿಯ ನಿರ್ಧಾರದಂತೆ ತಣ್ಣೀರುಬಾವಿ ಸಸ್ಯೋದ್ಯಾನವನ್ನು ಜುಲೈ 31 ರವರೆಗೆ ಸಾರ್ವಜನಿಕ ವೀಕ್ಷಣೆಗೆ ನಿರ್ಬಂಧಿಸಲಾಗಿರುತ್ತದೆ ಎಂದು ಅರಣ್ಯ ಇಲಾಖೆ ಪ್ರಕಟಣೆ ತಿಳಿಸಿದೆ.

ಕರಾವಳಿ ಕರ್ನಾಟಕದ ಅತ್ಯಂತ ಜನಪ್ರಿಯ ಪ್ರವಾಸಿ ತಾಣಗಳಲ್ಲಿ ಒಂದಾದ ಮಂಗಳೂರಿನ ಪ್ರಸಿದ್ಧ ಸಮುದ್ರ ತೀರ ಪ್ರದೇಶ ತಣ್ಣೀರುಬಾವಿ ಬೀಚ್ ನಲ್ಲಿ ನಿರ್ಮಾಣಗೊಂಡಿರುವ ತಣ್ಣೀರುಬಾವಿ ಟ್ರೀ ಪಾರ್ಕ್ ಮತ್ತು ಸಾಗರ ವಸ್ತುಸಂಗ್ರಹಾಲಯವೂ ಪ್ರವಾಸಿಗರ ಆಕರ್ಷಣೆಯ ಕೇಂದ್ರವಾಗಿದೆ.

ತಣ್ಣೀರುಬಾವಿ ಟ್ರೀ ಪಾರ್ಕ್ ಕರ್ನಾಟಕ ಅರಣ್ಯ ಇಲಾಖೆಯ ಒಂದು ಉಪಕ್ರಮವಾಗಿದ್ದು, ತಣ್ಣೀರುಬಾವಿ ಬೀಚ್ ಬಳಿ 15 ಹೆಕ್ಟೇರ್ ಪ್ರದೇಶದಲ್ಲಿ ನಿರ್ಮಿಸಲಾಗಿದೆ. ಈ ಟ್ರೀ ಪಾರ್ಕ್ ಪಶ್ಚಿಮ ಘಟ್ಟದಲ್ಲಿ ಕಂಡುಬರುವ ಕೆಲವು ನಿರ್ದಿಷ್ಟ ಮರ ಪ್ರಭೇದಗಳನ್ನು ಒಳಗೊಂಡಿರುತ್ತದೆ. ಇದು ಗಿಡಮೂಲಿಕೆ ಮತ್ತು ವೈದ್ಯಕೀಯ ಸ್ವಭಾವದ ಮರಗಳು / ಸಸ್ಯಗಳನ್ನು ಸಹ ಒಳಗೊಂಡಿರುತ್ತದೆ.

ಇದು ಕರ್ನಾಟಕ ಅರಣ್ಯ ಇಲಾಖೆಯಿಂದ ಪ್ರಾರಂಭಿಸಲ್ಪಟ್ಟಿದೆ. ಟ್ರೀ ಪಾರ್ಕ್ ಪಶ್ಚಿಮ ಘಟ್ಟದಲ್ಲಿ ಕಂಡುಬರುವ ಮರ ಪ್ರಭೇದಗಳನ್ನು ಒಳಗೊಂಡಿದೆ ಮತ್ತು ಮರಗಳು / ಸಸ್ಯಗಳು ಗಿಡಮೂಲಿಕೆಗಳಾಗಿವೆ ಮತ್ತು ವೈದ್ಯಕೀಯ ಪ್ರಾಮುಖ್ಯತೆಯನ್ನು ಹೊಂದಿವೆ. ಇದು ಪ್ರದೇಶದ ಸಂಸ್ಕೃತಿಯನ್ನು ಚಿತ್ರಿಸುವ ವಿವಿಧ ಶಿಲ್ಪಗಳನ್ನು ಹೊಂದಿದೆ, ತುಳುನಾಡು ಯಕ್ಷಗಾನ ಮತ್ತು ಭೂತ ಕೋಲಗಳಂತಹ ಶಿಲ್ಪಗಳು ಇಲ್ಲಿನ ಆಕರ್ಷಣೆಗಳಾಗಿವೆ.

ತಣ್ಣೀರುಬಾವಿ ಬೀಚ್ ತನ್ನ ಹತ್ತಿರದ ನೆರೆಯ ಪಣಂಬೂರ್ ಬೀಚ್‌ಗೆ ಹೋಲಿಸಿದರೆ ಜನಸಂದಣಿಯಿಂದ ಮುಕ್ತವಾಗಿದೆ. ನೈಸರ್ಗಿಕ ಸೌಂದರ್ಯ ಮತ್ತು ಶಾಂತಿಯನ್ನು ಆನಂದಿಸುವ ಪ್ರತಿಯೊಬ್ಬರಿಗೂ ಈ ತಾಣ ಸೂಕ್ತವಾಗಿದೆ. ಸುತ್ತಲೂ ಗಿಡ ಮರಗಳ ಹಸಿರು ಮತ್ತು ನೀಲಿ-ಹಸಿರು ನೀರಿನೊಂದಿಗೆ ಪರಿಪೂರ್ಣ ಸಂಯೋಜನೆಯು ಕಣ್ಣಿಗೆ ಆಹ್ಲಾದಕರವಾದ ದೃಶ್ಯವಾಗಿದೆ. ಇಂತಹ ಸುಂದರ ಪರಿಸರದಲ್ಲಿ ವಿಶಾಲವಾಗಿ ನಿರ್ಮಾಣಗೊಂಡಿರುವ ತಣ್ಣೀರುಬಾವಿ ಟ್ರೀ ಪಾರ್ಕ್ ನ್ನು ಸಾರ್ವಜನಿಕ ವೀಕ್ಷಣೆಗೆ ನಿರ್ಬಂಧಿಸಿರುವುದರಿಂದ ಪ್ರಕೃತಿಯ ಸವಿಯನ್ನು ಅಹ್ಲಾದಿಸಲು ಆಗಮಿಸುವ ಸ್ಥಳೀಯ ಹಾಗೂ ಇತರೆಡೆಗಳಿಂದ ಬರುವ ಪ್ರವಾಸಿಗಳಿಗೆ ನಿರಾಶೆಯಾಗಿದೆ.

ಆದರೆ ಕೊರೋನಾ ವೈರಸ್-19ರ ಪ್ರಸರಣವನ್ನು ತಡೆಗಟ್ಟಲ್ಲು ಈ ನಿರ್ಧಾರ ಅನಿವಾರ್ಯವಾಗಿದ್ದು, ಈ ನಿಟ್ಟಿನಲ್ಲಿ ಸಾರ್ವಜನಿಕರು/ ಪ್ರವಾಸಿಗರು ಸಹಕರಿಸಬೇಕೆಂದು ಅರಣ್ಯ ಇಲಾಖೆ ಮನವಿ ಮಾಡಿದ್ದಾರೆ.