ಹೈದರಾಬಾದ್/ವಾಷಿಂಗ್ಟನ್: ಬಿಯರ್‌ ಬಾಟಲಿ ಹಾಗೂ ಕ್ಯಾನ್‌ಗಳಲ್ಲಿ ರಾಷ್ಟ್ರಪಿತ ಮಹಾತ್ಮ ಗಾಂಧಿ ಚಿತ್ರ ಬಳಿಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಮೆರಿಕದ ಕಂಪನಿ ಕ್ಷಮೆ ಕೋರಿದೆ.
ಮಹಾತ್ಮಗಾಂಧಿಗೆ ಕಂಪೆನಿಯು ಅಪಮಾನ ಮಾಡಿದೆ ಎಂದು ಆರೋಪಿಸಿ ಹೈದರಾಬಾದ್‌ನ ಮೆಟ್ರೊಪಾಲಿಟನ್‌ ಕೋರ್ಟ್‌ಗೆ ಅರ್ಜಿ ಸಲ್ಲಿಸಲಾಗಿತ್ತು. ಪ್ರಕರಣ ವಿಚಾರಣೆಗೆ ಬರುವ ಮುನ್ನವೇ ಕಂಪೆನಿ ಕ್ಷಮೆ ಕೋರಿದೆ.
ಕನೆಕ್ಟಿಕಟ್‌ ಮೂಲದ ಇಂಗ್ಲೆಂಡ್‌ ಬ್ರಿವಿಂಗ್‌ ಕಂಪೆನಿ ಉದ್ದೇಶಪೂರ್ವವಾಗಿಯೇ ಗಾಂಧಿಗೆ ಅಪಮಾನ ಮಾಡಿದೆ ಎಂದು ಗಾಂಧಿ ಅವರ ಮೊಮ್ಮಗ ಈಚೆಗೆ ಆಕ್ಷೇಪ ವ್ಯಕ್ತಪಡಿಸಿದ್ದರು.
ಕಂಪೆನಿ ಹೊರ ತಂದಿರುವ ಬೀಯರ್‌ ಕ್ಯಾನ್‌ಗೆ ‘ಗಾಂಧಿ ಬಾಟ್‌’ ಎಂದು ಹೆಸರು ಇಡಲಾಗಿದ್ದು, ಇದು ಆಕ್ಷೇಪರ್ಹಾ ಎಂದು ವಕೀಲ ಶುಂಕಾರಿ ಜನಾರ್ದನ್‌ ಗೌಡ ಅವರು 11ನೇ ಮೆಟ್ರೊಪಾಲಿಟನ್‌ ಕೋರ್ಟ್‌ಗೆ ಅರ್ಜಿ ಸಲ್ಲಿಸಿ, ಕ್ರಮ ಕೈಗೊಳ್ಳುವಂತೆ ಮನವಿ ಮಾಡಿದ್ದರು. ನ್ಯಾಯಾಧೀಶರು ಈ ಪ್ರಕರಣವನ್ನು ಸೋಮವಾರ ವಿಚಾರಣೆಗೆ ನಿಗದಿಪಡಿಸಿದ್ದರು.
ಪ್ರಕರಣದ ಗಂಭೀರತೆ ಅರಿತ ಕಂಪೆನಿಯು ಭಾರತೀಯರ ಮನಸ್ಸಿಗೆ ಇದರಿಂದ ನೋವು ಉಂಟಾಗಿರುವುದು ನಮ್ಮ ಗಮನಕ್ಕೆ ಬಂದಿದೆ. ಅದಕ್ಕಾಗಿ ಕ್ಷಮೆ ಕೋರುತ್ತೇವೆ ಎಂದು ತಿಳಿಸಿದೆ.
ಈ ಕುರಿತು ಮಾತನಾಡಿದ ಕಂಪೆನಿಯ ಪಾಲುದಾರ ಮ್ಯಾಟ್‌ ವೆಸ್ಟ್‌ಪಾಲ್‌ ಅವರು, ಗಾಂಧಿ ಹಾಗೂ ಭಾರತದ ಬಗ್ಗೆ ಅಪಾರ ಗೌರವ ಇದೆ. ನಮ್ಮ ಹೋಟೆಲ್‌ನಲ್ಲಿ ಸಸ್ಯಹಾರದ ಖಾದ್ಯಗಳು ಹೆಚ್ಚಿನ ಪ್ರಮಾಣದಲ್ಲಿ ತಯಾರಾಗುತ್ತವೆ. ಈ ಲೇಬಲ್‌ ತೆರವುಗೊಳಿಸುತ್ತೇವೆ ಎಂದು ತಿಳಿಸಿದ್ದಾರೆ.
