ಕರ್ನಾಟಕ

ಫಿಎಫ್ ಇದ್ದವರಿಗೆ ಗೃಹ ಭಾಗ್ಯ: 5 ಕೋಟಿ ಜನರಿಗೆ ಲಾಭ; ಭವಿಷ್ಯ ನಿಧಿ ಖಾತೆದಾರರಿಗೆ ಅಗ್ಗದ ದರದಲ್ಲಿ ಮನೆ ಕಟ್ಟಿಕೊಡಲು ಸಿದ್ಧತೆ/ 5 ಕೋಟಿ ಜನರಿಗೆ ಲಾಭ

Pinterest LinkedIn Tumblr

house

ಹೊಸದಿಲ್ಲಿ: ಕಾರ್ಮಿಕರ ಭವಿಷ್ಯ ನಿಧಿ ಸಂಘಟನೆ ‘ಇಪಿಎಫ್‌ಒ’ ಖಾತೆದಾರರಿಗೆ ಕೈಗೆಟಕುವ ಬೆಲೆಗೆ ಮನೆ ಒದಗಿಸಲು ಚಿಂತನೆ ನಡೆಸಿರುವ ಕಾರ್ಮಿಕ ಸಚಿವಾಲಯ, ಈ ನಿಟ್ಟಿನಲ್ಲಿ ಬೃಹತ್ ವಸತಿ ಯೋಜನೆ ರೂಪಿಸುವ ಸಿದ್ಧತೆಯಲ್ಲಿದೆ. ಇದರಿಂದ ದೇಶದ ಐದು ಕೋಟಿಗೂ ಹೆಚ್ಚು ಭವಿಷ್ಯ ನಿಧಿ ಖಾತೆದಾರರಿಗೆ ಅನುಕೂಲವಾಗಲಿದೆ.

ಇಸವಿ 2022ರ ಒಳಗೆ ದೇಶದ ಪ್ರತಿ ಪ್ರಜೆಗೆ ವಸತಿ ಒದಗಿಸಲು ಕೇಂದ್ರ ಸರಕಾರ ಮಹತ್ವಾಕಾಂಕ್ಷಿ ಯೋಜನೆ ರೂಪಿಸಿರುವ ಹಿನ್ನೆಲೆಯಲ್ಲಿ ಕಾರ್ಮಿಕ ಸಚಿವಾಲಯ ಈ ಯೋಜನೆ ಕೈಗೆತ್ತಿಕೊಳ್ಳಲು ಮುಂದಾಗಿದೆ.

ಸಾರ್ವಜನಿಕ ರಂಗದ ಬ್ಯಾಂಕ್‌ಗಳು, ಗೃಹ ಹಣಕಾಸು ಕಂಪನಿಗಳು, ಸಾರ್ವಜನಿಕ ಸ್ವಾಮ್ಯದ ನಿರ್ಮಾಣ ಕಂಪನಿಗಳು ಮತ್ತು ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ), ದಿಲ್ಲಿ ಅಭಿವೃದ್ಧಿ ಪ್ರಾಧಿಕಾರ (ಡಿಡಿಎ) ಮುಂತಾದ ಸರಕಾರಿ ಸಂಸ್ಥೆಗಳ ಸಹಭಾಗಿತ್ವದಲ್ಲಿ ಬೃಹತ್ ವಸತಿ ಯೋಜನೆ ರೂಪಿಸಲು ಉದ್ದೇಶಿಸಲಾಗಿದೆ. ಇಪಿಎಫ್‌ಒ ಚಂದಾದಾರರಿಗೆ, ಅದರಲ್ಲೂ ವಿಶೇಷವಾಗಿ ಕೆಳಹಂತದ ಆದಾಯ ವರ್ಗಕ್ಕೆ ಕೈಗೆಟಕುವ ಬೆಲೆಗೆ ಮನೆಗಳನ್ನು ನಿರ್ಮಿಸಿಕೊಡುವ ಬೃಹತ್ ಯೋಜನೆ ಇದಾಗಿದೆ ಎಂದು ಅಧಿಕೃತ ಮೂಲಗಳು ದೃಢಪಡಿಸಿವೆ.

ಪ್ರಸ್ತುತ, ಶೇ.70ರಷ್ಟು ಇಪಿಎಫ್‌ಒ ಚಂದಾದಾರರ ಮೂಲವೇತನ ಮಾಸಿಕ 15 ಸಾವಿರಕ್ಕಿಂತ ಕಡಿಮೆ ಇದೆ. ಇಪಿಎಫ್‌ಒ ಪ್ರಸ್ತುತ, 6.5 ಲಕ್ಷ ಕೋಟಿ ರೂ. ಬೃಹತ್ ನಿಧಿಯನ್ನು ನಿರ್ವಹಿಸುತ್ತಿದೆ. ಇದರ ವಾರ್ಷಿಕ ಠೇವಣಿ ಹೆಚ್ಚಳವೇ 70 ಸಾವಿರ ಕೋಟಿ ರೂ. ದಾಟುತ್ತಿದೆ. ಇಪಿಎಫ್‌ಒ ನಿಧಿಯ ಶೇ.15 ಭಾಗವನ್ನು ಸಾಲ ರೂಪದಲ್ಲಿ ಬಳಸಿ, ಅಗ್ಗದ ಮನೆಗಳನ್ನು ನಿರ್ಮಿಸುವುದರಿಂದ 70 ಸಾವಿರ ಕೋಟಿ ರೂ. ವೆಚ್ಚವಾಗಲಿದೆ. ಜತೆಗೆ, 3.5 ಲಕ್ಷ ಹೆಚ್ಚುವರಿ ಅಗ್ಗದ ಮನೆಗಳ ನಿರ್ಮಾಣವಾಗಲಿದೆ ಎಂದು ಪ್ರಧಾನ ಮಂತ್ರಿಗಳ ಕಾರ್ಯಾಲಯ ಇತ್ತೀಚೆಗೆ ಇಪಿಎಫ್‌ಒ ಸಂಸ್ಥೆಗೆ ಪತ್ರ ಬರೆದಿತ್ತು.

ಹೀಗಾಗಿ, ಪ್ರಧಾನ ಮಂತ್ರಿಗಳ ಕಾರ್ಯಾಲಯದ ಈ ಯೋಜನೆಯನ್ನು ಕಾರ್ಯ ರೂಪಕ್ಕಿಳಿಸಲು ಕಾರ್ಮಿಕ ಸಚಿವಾಲಯ ಉತ್ಸುಕ ತೋರುತ್ತಿದೆ. ಕಾರ್ಮಿಕ ಸಚಿವಾಲಯ ಸಿದ್ಧಪಡಿಸಲು ಉದ್ದೇಶಿಸಿರುವ ಬೃಹತ್ ವಸತಿ ಯೋಜನೆ ಅನ್ವಯ, ಪಿಎಫ್ ಚಂದಾದಾರರು ಮನೆಗೆ ತಗುಲುವ ಒಟ್ಟು ವೆಚ್ಚದ ಭಾಗಶಃ ಪಾವತಿಗೆ ತಮ್ಮ ಪಿಎಫ್ ಠೇವಣಿಯನ್ನು ಹಿಂಪಡೆಯಲು ಅವಕಾಶ ಸಿಗಲಿದೆ. ಇಪಿಎಫ್‌ಒ ಚಂದಾದಾರರು ಪಿಎಫ್ ನಿಧಿಗೆ ಕೊಡುಗೆ ನೀಡಿದ ಐದು ವರ್ಷಗಳ ತರುವಾಯ ಮನೆ ಖರೀದಿಗೆ ಠೇವಣಿ ಹಿಂಪಡೆಯಲು ಅವಕಾಶ ಇದೆ.

ಉದ್ದೇಶಿತ ವಸತಿ ಯೋಜನೆ ಸಾಕಾರಕ್ಕೆ ಹಣಕಾಸು ಸಂಸ್ಥೆಗಳಿಂದ ಅಗ್ಗದ ದರದ ಬಡ್ಡಿಯಲ್ಲಿ ಸಾಲ ಪಡೆಯಲಿದೆ.ಉದ್ದೇಶಿತ ಯೋಜನೆಗೆ ಅಗ್ಗದ ದರದಲ್ಲಿ ಗೃಹ ಸಾಲ ಪಡೆಯಲು ಇಪಿಎಫ್‌ಒ, ತನ್ನ ನಿಧಿಯನ್ನೇ ಮೂಲ ಬಂಡವಾಳವಾಗಿ ಬಳಸಲಿದೆ ಎಂದು ಕಾರ್ಮಿಕ ಸಚಿವಾಲಯದ ಮೂಲಗಳು ದೃಢಪಡಿಸಿವೆ.

ಇಎಂಐ ಸೌಲಭ್ಯ ಇರಲಿದೆ
ಈಗಾಗಲೇ ಸ್ವಂತ ಮನೆ ಹೊಂದಿರುವ ಇಪಿಎಫ್‌ಒ ಚಂದಾದಾರರಿಗೆ ವಸತಿ ಪಡೆಯುವುದು ಅಥವಾ ಬಿಡುವುದು ಅವರ ಇಷ್ಟಕ್ಕೆ ಬಿಟ್ಟ ವಿಚಾರ. ವಸತಿ ಯೋಜನೆಯ ಅನ್ವಯ, ಕೆಳ ಆದಾಯ, ಮಧ್ಯಮ ಆದಾಯ ಮತ್ತು ಅಧಿಕ ಆದಾಯ ಎಂಬ ಮೂರು ವರ್ಗದ ಆದಾಯ ಗುಂಪುಗಳನ್ನು ಮಾಡಲಾಗುತ್ತದೆ. ಚಂದಾದಾರರ ಆದಾಯ ಮಟ್ಟ ಪರಿಗಣಿಸಿ, ವಸತಿ ಮತ್ತು ಹಣಕಾಸು ಉತ್ತೇಜನ ಒದಗಿಸುವ ಚಿಂತನೆ ನಡೆದಿದೆ. ಕೆಳಆದಾಯ ವರ್ಗದ ಪಿಎಫ್ ಚಂದಾದಾರರಿಗೆ ಸಬ್ಸಿಡಿ ಒದಗಿಸಲು ಸಹ ಕಾರ್ಮಿಕ ಸಚಿವಾಲಯ ಉದ್ದೇಶಿಸಿದೆ. ಜತೆಗೆ, ಚಂದಾದಾರರಿಗೆ ಸಮಾನ ಮಾಸಿಕ ಕಂತಿನಲ್ಲಿ ಗೃಹ ಸಾಲ ಪಾವತಿಸಲು ಅವಕಾಶ ಕಲ್ಪಿಸಲಾಗುತ್ತದೆ. ಪಿಎಫ್ ಖಾತೆಯ ಮೂಲಕವೇ ಸಾಲದ ಮಾಸಿಕ ಕಂತು (ಇಎಂಐ) ಪಾವತಿಗೆ ಅವಕಾಶ ನೀಡಲಾಗುತ್ತದೆ.

ನೌಕರರಿಗೆ ಫ್ಲೆಕ್ಸಿ ಟೈಮಿಂಗ್
ಹೊಸದಿಲ್ಲಿ: ಆಧಾರ್ ಸಂಖ್ಯೆ ಬೆಸೆದ ಹಾಜರಾತಿ ವ್ಯವಸ್ಥೆಯನ್ನು ಜಾರಿಗೆ ತಂದ ಬಳಿಕ ದಿಲ್ಲಿಯ ಕೇಂದ್ರ ಸರಕಾರಿ ನೌಕರರು ಪ್ರತಿನಿತ್ಯವೂ ನಿಗದಿತ ಸಮಯಕ್ಕಿಂತ 20 ನಿಮಿಷ ಹೆಚ್ಚು ಕಾಲ ಕೆಲಸ ಮಾಡುತ್ತಿರುವುದು ಕೇಂದ್ರ ಸರಕಾರಕ್ಕೆ ಖುಷಿ ತಂದಿದೆ. ಇದೇ ಸಂತೋಷದಲ್ಲಿ ಸರಕಾರ, ನೌಕರರಿಗೆ ಅನುಕೂಲಕರ ಕೆಲಸದ ಅವಧಿಯನ್ನು (ಫ್ಲೆಕ್ಸಿಬಲ್ ವರ್ಕ್ ಟೈಮಿಂಗ್) ಜಾರಿಗೆ ತರಲು ಯೋಚಿಸುತ್ತಿದೆ. ಕಚೇರಿಗೆ ತಡವಾಗಿ ಬಂದರೆ ಅಷ್ಟು ಸಮಯ, ನಿಗದಿತ ಅವಧಿ ಮುಗಿದ ಮೇಲೆ ಕೆಲಸ ಮಾಡುವುದು, ಬೇಗ ಬಂದರೆ ಕೊಂಚ ಬೇಗ ಕಚೇರಿಯಿಂದ ಹೊರಡುವುದು, ಮನೆಯಲ್ಲೇ ಕೆಲಸ ಮಾಡುವುದು ಇತ್ಯಾದಿ ಸವಲತ್ತುಗಳು ಇದರಿಂದ ಕೇಂದ್ರ ಸರಕಾರಿ ನೌಕರರಿಗೆ ದೊರೆಯಲಿವೆ.

-ಇಪಿಎಫ್‌ಒ ನಿಧಿಯ ಶೇ.15ರಷ್ಟು ಮೂಲ ಬಂಡವಾಳ

-ಸರಕಾರಿ ಬ್ಯಾಂಕುಗಳು, ಗೃಹ ನಿರ್ಮಾಣ ಕಂಪನಿಗಳಿಂದ ಸಾಲ

-ಬಿಡಿಎ ಮುಂತಾದ ನಗರ ಅಭಿವೃದ್ಧಿ ಪ್ರಾಧಿಕಾರಗಳ ಸಹಭಾಗಿತ್ವ

-ಕಡಿಮೆ ಆದಾಯದ ಚಂದಾದಾರಿಗೆ ಮನೆ ಖರೀದಿಸಲು ಸಹಾಯ ಧನ

Write A Comment