ಮೆಲ್ಬರ್ನ್: ವಿಶ್ವಕಪ್ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ನಿರ್ದಯವಾಗಿ ಹೊಡೆಸಿಕೊಂಡಿದ್ದ ಬೌಲರ್‌ಗಳ ಪರ ನಿರ್ಧಾರ ಕೈಗೊಂಡಿರುವ ಐಸಿಸಿ ಏಕದಿನ ಕ್ರಿಕೆಟ್‌ನಲ್ಲಿ ಬ್ಯಾಟಿಂಗ್ ಪವರ್‌ ಪ್ಲೇ ರದ್ದುಗೊಳಿಸಲಿದೆ.
ಅಂತಾರಾಷ್ಟ್ರೀಯ ಏಕದಿನ ಕ್ರಿಕೆಟ್ ನಿಯಮಾವಳಿಗೆ ಕೆಲವು ತಿದ್ದುಪಡಿಗಳನ್ನು ತರಲು ನಿರ್ಧರಿಸಿರುವ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ), ಕ್ಷೇತ್ರ ರಕ್ಷಣೆಯ ಕೆಲವು ಕಟ್ಟುಪಾಡುಗಳನ್ನು ತೆರವುಗೊಳಿಸಲು ನಿರ್ಧರಿಸಿದೆ.
ಬಾರ್ಬಡೋಸ್‌ನಲ್ಲಿ ನಡೆದಿರುವ ವಾರ್ಷಿಕ ಸಭೆಯಲ್ಲಿ ಐಸಿಸಿ 50 ಓವರ್‌ಗಳ ಪಂದ್ಯಗಳಲ್ಲಿ ಕೆಲವು ಬದಲಾವಣೆಗಳನ್ನು ತರಲು ಸರ್ವಾನುಮತದಿಂದ ನಿರ್ಧರಿಸಿದ್ದು, ಜುಲೈ 5ರಿಂದಲೇ ಹೊಸ ನಿಯಮಾವಳಿಗಳು ಜಾರಿಗೆ ಬರಲಿವೆ.
ಇನ್ನು ಮುಂದೆ ಮೊದಲ 10 ಓವರ್‌ಗಳಲ್ಲಿ 30 ಯಾರ್ಡ್‌ ವೃತ್ತದಾಚೆ 5 ಕ್ಷೇತ್ರ ರಕ್ಷಕರಿಗೆ ಅವಕಾಶ ನೀಡಲಾಗುವುದು. ಸದ್ಯ ಕೇವಲ ನಾಲ್ವರು ಫೀಲ್ಡರ್‌ಗಳಷ್ಟೇ ಮೊದಲ 10 ಓವರ್‌ಗಳಲ್ಲಿ 30 ಯಾರ್ಡ್‌ ವೃತ್ತದಾಚೆ ಇರಲು ಅವಕಾಶವಿದೆ.
ಐಸಿಸಿ ಕ್ರಿಕೆಟ್ ವಿಶ್ವಕಪ್ ನಂತರ ಏಕದಿನ ಸ್ವರೂಪದ ಬಗ್ಗೆ ಸಂಪೂರ್ಣವಾಗಿ ಮರು ಪರಿಶೀಲಿಸಿದ ಬಳಿಕ ಕೆಲವು ನಿರ್ಧಾರಕ್ಕೆ ಬಂದಿದ್ದೇವೆ ಎಂದು ಐಸಿಸಿ ಮುಖ್ಯ ಕಾರ್ಯನಿರ್ವಾಹಕ ಡೇವಿಡ್ ರಿಚರ್ಡ್ಸನ್ ಹೇಳಿದ್ದಾರೆ.
ಕ್ರಿಕೆಟ್‌ನ ರೋಮಾಂಚಕ ಹಾಗೂ ಜನಪ್ರಿಯ ಸ್ವರೂಪವಾಗಿ ಸಾಬೀತಾಗಿರುವ ಏಕದಿನ ಆಟದ ಆಮೂಲಾಗ್ರ ಬದಲಾವಣೆಯ ಯಾವುದೇ ಅಗತ್ಯವಿಲ್ಲ. ಆದರೆ ನಾವು ಬ್ಯಾಟ್ ಮತ್ತು ಬಾಲ್ ನಡುವಿನ ನಿಯಂತ್ರಣ ಕಾಪಾಡಿಕೊಳ್ಳಲು ಹಾಗೂ ಕ್ರಿಕೆಟ್ ಅನ್ನು ಸರಳ ಮತ್ತು ಸುಲಭವಾಗಿ ಸಾರ್ವಜನಿಕರು ಅನುಸರಿಸಲು ಸಾಧ್ಯವಾಗುವಂತೆ ಮಾಡುವುದು ನಮ್ಮ ಉದ್ದೇಶ ಎಂದು ತಿಳಿಸಿದರು.
ಇದರ ಜತೆಗೆ ಎಲ್ಲ ಎಲ್ಲ ನೋ ಬಾಲ್‌ಗಳಿಗೆ ಫ್ರೀ ಹಿಟ್‌ ಅವಕಾಶ ನೀಡುವ ನಿರ್ಧಾರವನ್ನೂ ಐಸಿಸಿ ತೆಗೆದುಕೊಂಡಿದೆ.
