ಬೆಂಗಳೂರು; ಕೊರೋನಾ ವೈರಸ್ನಿಂದ ಸತ್ತವರ ಮೃತದೇಹಗಳನ್ನು ಆರೋಗ್ಯ ಸಿಬ್ಬಂದಿ ಅಮಾನವೀಯ ರೀತಿಯಲ್ಲಿ ಗುಂಡಿಗೆ ಎಸೆಯುತ್ತಿರುವ ವಿಡಿಯೋವೊಂದು ಇಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಆ ವಿಡಿಯೋ ನೋಡಿದವರ ಮನಸ್ಸು ಒಮ್ಮೆ ಮಮಲ ಮರುಗಿ, ಹಾಗೆ ನಡೆದುಕೊಂಡವರ ವಿರುದ್ಧ ಕಟ್ಟುನಿಟ್ಟಿನ ಕ್ರಮವಾಗಲಿ ಎಂದು ಆಗ್ರಹಿಸಿದ್ದಾರೆ.
ಸ್ವತಃ ಆರೋಗ್ಯ ಸಚಿವ ಬಿ.ಶ್ರೀರಾಮುಲು ಅವರ ತವರು ಜಿಲ್ಲೆಯಾದ ಬಳ್ಳಾರಿಯಲ್ಲಿ ಈ ಘಟನೆ ನಡೆದಿದೆ ಎಂದು ಹೇಳಲಾಗುತ್ತಿದ್ದು, ಈ ಬಗ್ಗೆ ಸಚಿವ ಶ್ರೀರಾಮುಲು ಮಾತನಾಡಿದ್ದು, ಘಟನೆ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಹೇಳಿದ್ದಾರೆ.
ಪಿಪಿಇ ವಸ್ತ್ರ ಧರಿಸಿದ ಆರೋಗ್ಯ ಇಲಾಖೆಯ ಐದಾರು ಸಿಬ್ಬಂದಿ ಆ್ಯಂಬುಲೆನ್ಸ್ನಲ್ಲಿ ಮೂರು ಮೃತದೇಹಗಳನ್ನು ತಂದಿದ್ದಾರೆ. ವಿಶಾಲ ಪ್ರದೇಶದಲ್ಲಿ ಜೆಸಿಬಿ ಮೂಲಕ ದೊಡ್ಡದಾಗಿ ತೆಗೆದ ಗುಂಡಿಯೊಳಗೆ ಕಪ್ಪು ಬ್ಯಾಗ್ನಲ್ಲಿ ಮುಚ್ಚಿದ ಮೃತದೇಹಗಳನ್ನು ಒಂದೊಂದಾಗಿ ಮೂರ್ನಾಲ್ಕು ಜನ ಆ್ಯಂಬುಲೆನ್ಸ್ನಿಂದ ತಂದು ಗುಂಡಿಯ ಒಳಗೆ ಬೇಕಾಬಿಟ್ಟಿಯಾಗಿ ಎಸೆಯುತ್ತಾರೆ.
ಇದನ್ನು ಅಲ್ಲಿಯೇ ಇದ್ದ ವ್ಯಕ್ತಿಯೊಬ್ಬರು ವಿಡಿಯೋ ಮಾಡಿಕೊಂಡಿದ್ದು, ಮೃತದೇಹಗಳನ್ನು ನಿಧಾನಕ್ಕೆ ಗುಂಡಿಗೆ ಹಾಕುವಂತೆಯೂ ಹೇಳುತ್ತಾರೆ. ಆದರೂ ಆ ಸಿಬ್ಬಂದಿ ದೇಹಗಳನ್ನು ಮನಸೋಇಚ್ಛೆ ಬಂದಂತೆ ಗುಂಡಿಗೆ ಎಸೆಯುತ್ತಾರೆ. ಈ ವಿಡಿಯೋವನ್ನು ಇಂದು ಬೆಳಗ್ಗೆ ಯೂಟ್ಯೂಬ್ಗೆ ಅಪ್ಲೋಡ್ ಮಾಡಲಾಗಿದ್ದು, ಲಕ್ಷಾಂತರ ಮಂದಿ ವೀಕ್ಷಣೆ ಮಾಡಿದ್ದಾರೆ. ಹೀಗೆ ನಡೆದುಕೊಂಡ ಸಿಬ್ಬಂದಿ ವಿರುದ್ಧ ಕಟ್ಟುನಿಟ್ಟಿನ ಕ್ರಮ ತೆಗೆದುಕೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ.
Comments are closed.