ಬೆಂಗಳೂರು: ಡೇಟಿಂಗ್‌ ಆಪ್‌ ಮೂಲಕ ಪರಿಚಯವಾದ 34 ವರ್ಷದ ಶಿಕ್ಷಕಿಗೆ ಲೈಂಗಿಕ ಕಿರುಕುಳ ನೀಡಿದ್ದಲ್ಲದೆ ಲಕ್ಷಾಂತರ ರೂಪಾಯಿ ವಂಚಿಸಿದ ಆರೋಪದ ಮೇಲೆ ನಗರದ 35 ವರ್ಷದ ಸಾಫ್ಟ್‌ವೇರ್‌ ಎಂಜಿನಿಯರ್‌ ಒಬ್ಬರನ್ನು ಬಂಧಿಸಲಾಗಿದೆ.
ಕೇರಳ ಮೂಲದ ಕೋರಮಂಗಲ ನಿವಾಸಿ ಜೋ ಅಬ್ರಹಾಂ ಮ್ಯಾಥ್ಯೂಸ್‌ ಅಲಿಯಾಸ್‌ ಮ್ಯಾಥ್ಯೂಸ್‌ ತಜಂತ್‌ ಪ್ರಸಾದ್‌ ಬಂಧಿತನಾಗಿದ್ದು, ಈತ ಇನ್ನೂ ಹಲವು ಮಹಿಳೆಯರಿಗೆ ವಂಚಿಸಿರುವುದು ತನಿಖೆ ವೇಳೆ ತಿಳಿದು ಬಂದಿದೆ. ಅದರಲ್ಲೂ ವಿಧವೆಯರನ್ನು ಮದುವೆಯಾಗುವುದಾಗಿ ಹೇಳಿ ನಂಬಿಸಿ ಅವರಿಂದ ಲಕ್ಷಾಂತರ ಹಣ ಪಡೆದುಕೊಂಡು ವಂಚಿಸಿದ್ದ.
ನಾಗರಬಾವಿಯ ಶಿಕ್ಷಕಿಯೊಬ್ಬರಿಗೆ 2018ರ ಅಕ್ಟೋಬರ್‌ನಲ್ಲಿ ಈತನ ಪರಿಚಯವಾಗಿತ್ತು. ನಂತರ ಇವರಿಬ್ಬರು ಕೋರಮಂಗಲದ ಕ್ಲಬ್‌ನಲ್ಲಿ ಭೇಟಿಯಾಗಿದ್ದರು. “ತಾನು ಕಾರು ಉದ್ಯಮ ನಡೆಸುತ್ತಿರುವುದಾಗಿ ನಂಬಿಸಿ, ವ್ಯವಹಾರದಲ್ಲಿ ಹಣ ಕಳೆದುಕೊಂಡಿರುವುದಾಗಿ ಆತ ಬಿಂಬಿಸಿದ್ದ. ತನ್ನ ತಂಗಿಯ ಕಾಲೇಜು ಶುಲ್ಕ ಕಟ್ಟಲು ಹಣ ಬೇಕಿರುವುದಾಗಿ ಹೇಳಿದ್ದ ಆತ ಮೊದಲಿಗೆ 10 ಲಕ್ಷ ರೂಪಾಯಿಯನ್ನು ಪಡೆದುಕೊಂಡಿದ್ದ. ನಂತರ ಮತ್ತೆ 21.9 ಲಕ್ಷ ರೂಪಾಯಿ ಜೊತೆಗೆ 6 ಲಕ್ಷ ಬೆಲೆಬಾಳುವ ಚಿನ್ನಾಭರಣವನ್ನು ಪಡೆದುಕೊಂಡಿದ್ದ. ಆತ ಆಕೆಯನ್ನು ಮದುವೆಯಾಗುವುದಾಗಿ ನಂಬಿಸಿಯೇ 38 ಲಕ್ಷ ರೂಪಾಯಿ ಪಡೆದುಕೊಂಡಿದ್ದ,” ಎಂಬುದಾಗಿ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಈತ ಮಹಿಳೆಯನ್ನು ಲೈಂಗಿಕವಾಗಿಯೂ ದುರ್ಬಳಕೆ ಮಾಡಿಕೊಂಡಿದ್ದ. ಈ ಸಂಬಂಧ ಮಹಿಳೆ ಜೂನ್‌ 3 ರಂದು ವಿವೇಕನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು.
“ನಾವು ಜೋ ವಿರುದ್ಧ ಅತ್ಯಾಚಾರ, ಮೋಸ ಮತ್ತು ಕ್ರಿಮಿನಲ್ ಬೆದರಿಕೆ ಪ್ರಕರಣವನ್ನು ದಾಖಲಿಸಿ ಗುರುವಾರ ಈತನನ್ನು ಬಂಧಿಸಿದ್ದೇವೆ. ನಾವು ಅವರನ್ನು ಮ್ಯಾಜಿಸ್ಟ್ರೇಟ್ ನ್ಯಾಯಾಲಯಕ್ಕೆ ಹಾಜರುಪಡಿಸಿ ಪೊಲೀಸ್ ಕಸ್ಟಡಿಗೆ ಪಡೆದುಕೊಂಡಿದ್ದೇವೆ,” ಎಂಬುದಾಗಿ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ತನಿಖೆ ವೇಳೆ ಜೋ ಪೊಲೀಸರಿಗೆ ತಾನು ಮದುವೆ ನೆಪದಲ್ಲಿ ಇಬ್ಬರು ಮಹಿಳೆಯರಿಗೆ ವಂಚಿಸಿರುವುದಾಗಿ ಒಪ್ಪಿಕೊಂಡಿದ್ದಾನೆ. ಇದರ ಜೊತೆಗೆ ತನ್ನ ಗೆಳೆಯರಿಗೂ ಕೋಟ್ಯಂತರ ರೂಪಾಯಿ ವಂಚಿಸಿರುವುದಾಗಿ ತಿಳಿಸಿದ್ದಾನೆ. 20 ವರ್ಷ ಹಿಂದೆ ಬೆಂಗಳೂರಿಗೆ ಬಂದಿದ್ದ ಈತ ಇಲ್ಲೇ ಶಿಕ್ಷಣ ಮುಗಿಸಿ ಆರಂಭದಲ್ಲಿ ಒಂದಷ್ಟು ವರ್ಷ ಕಾಲ ಸಾಫ್ಟ್‌ವೇರ್‌ ಇಂಜಿನಿಯರ್‌ ಆಗಿ ಕೆಲಸ ಮಾಡಿದ್ದ. ಕೆಲ ಕಾಲ ಬ್ರಿಟನ್‌ ಮತ್ತು ಆಸ್ಟ್ರೇಲಿಯಾದಲ್ಲೂ ಇದ್ದ. ನಾಲ್ಕು ವರ್ಷದ ಕೆಳಗೆ ಬೆಂಗಳೂರಿಗೆ ಮರಳಿ ಬಂದಿದ್ದ.
“ತಾನೊಬ್ಬ ದೊಡ್ಡ ಉದ್ಯಮಿ ಎಂದು ತೋರಿಸಿಕೊಳ್ಳುತ್ತಿದ್ದ ಈತ, ಐಷಾರಾಮಿ ಕಾರುಗಳಲ್ಲಿ ಓಡಾಡುತ್ತಾ ಜನರನ್ನು ಸೆಳೆಯುತ್ತಿದ್ದ,” ಎಂಬುದಾಗಿ ಈತನಿಂದ ವಂಚನೆಗೆ ಒಳಗಾದ ಗೆಳೆಯನೊಬ್ಬ ಹೇಳಿದ್ದಾನೆ.
ಈತನ ವಿರುದ್ಧ ಜನವರಿಯಲ್ಲಿಯೂ ಪೊಲೀಸರು ದೂರು ದಾಖಲಿಸಿಕೊಂಡಿದ್ದರು. ಸಾಜನ್‌ ಜಕಾರಿಯಾಸ್‌ ಎಂಬ ನಿವೃತ್ತ ವೈಮಾನಿಕ ಅಧಿಕಾರಿ ತನಗೆ 17 ಲಕ್ಷ ರೂಪಾಯಿ ವಂಚಿಸಿರುವುದಾಗಿ ಪೊಲೀಸರಿಗೆ ದೂರು ನೀಡಿದ್ದರು.
Comments are closed.