ಬೆಂಗಳೂರು (ಅ.6): ದೇಶದೆಲ್ಲೆಡೆ ಪ್ಲಾಸ್ಟಿಕ್ ಬ್ಯಾನ್ ಮಾಡಿದ ನಂತರ ಸಣ್ಣಪುಟ್ಟ ವ್ಯಾಪಾರಿಗಳು, ಗ್ರಾಹಕರು ಪರದಾಡುವಂತಾಗಿದೆ. ಅಂಗಡಿಗಳಲ್ಲಿ ಬಟ್ಟೆ ಬ್ಯಾಗ್ಗಳು ಸಿಗದೆ, ಇತ್ತ ಪ್ಲಾಸ್ಟಿಕ್ ಕವರ್ಗಳನ್ನು ಬಳಸಲು ಅವಕಾಶವಿಲ್ಲದೆ ಕೆಲವು ದಿನಗಳ ಕಾಲ ಸಮಸ್ಯೆ ಎದುರಾಗಿತ್ತು. ಪ್ಲಾಸ್ಟಿಕ್ ಕವರ್ಗಳನ್ನು ಬಳಸುವವರಿಗೆ ಬಿಬಿಎಂಪಿ ದಂಡ ಹಾಕುತ್ತಿದ್ದು, ಇದುವರೆಗೂ ಸಂಗ್ರಹವಾಗಿರುವ ಮೊತ್ತ ಕೇಳಿದರೆ ಶಾಕ್ ಆಗುತ್ತೀರ.
ಬಿಬಿಎಂಪಿಯ ಮಾರ್ಷಲ್ಗಳು ಮತ್ತು ಆರೋಗ್ಯಾಧಿಕಾರಿಗಳು ಇದುವರೆಗೂ ತ್ಯಾಜ್ಯ ನಿರ್ವಹಣೆಯನ್ನು ಉಲ್ಲಂಘಿಸಿದ್ದಕ್ಕೆ 1,129 ಪ್ರಕರಣಗಳನ್ನು ದಾಖಲಿಸಿಕೊಂಡಿದ್ದಾರೆ. ಹಾಗೇ, ಪ್ಲಾಸ್ಟಿಕ್ ನಿಷೇಧದ ನಡುವೆಯೂ ಪ್ಲಾಸ್ಟಿಕ್ ಬಳಸಿದ್ದಕ್ಕೆ 774 ಕೇಸುಗಳನ್ನು ದಾಖಲಿಸಿಕೊಂಡಿದ್ದಾರೆ. ಸೆಪ್ಟೆಂಬರ್ ತಿಂಗಳೊಂದರಲ್ಲೇ ದಂಡದ ರೂಪದಲ್ಲಿ 14.3 ಲಕ್ಷ ರೂ.ಗಳನ್ನು ಸಂಗ್ರಹಿಸಿದೆ ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.
ಒಂದು ತಿಂಗಳಲ್ಲಿ ಬಿಬಿಎಂಪಿ ಇದುವರೆಗೂ ಸಂಗ್ರಹಿಸಿದ ಎಲ್ಲ ದಂಡಗಳಿಗಿಂತ ಈ ದಂಡದ ಪ್ರಮಾಣ ಅತ್ಯಧಿಕವಾಗಿದೆ. ಬೆಂಗಳೂರನ್ನು ಪ್ಲಾಸ್ಟಿಕ್ಮುಕ್ತಗೊಳಿಸಲು ಸಾಕಷ್ಟು ಸಂಘಟನೆಗಳು, ಸ್ವಯಂಸೇವಕರು, ಸ್ಥಳೀಯರು ಶ್ರಮಿಸುತ್ತಿದ್ದಾರೆ. ಇದಕ್ಕಾಗಿ ಅಭಿಯಾನವನ್ನೂ ಶುರುಮಾಡಿದ್ದಾರೆ. ಸುಂದರವಾದ ಬೆಂಗಳೂರನ್ನು ನಿರ್ಮಿಸಲು ವೈಟ್ಫೀಲ್ಡ್ ರೈಸಿಂಗ್, ದೊಡ್ಡನೆಕ್ಕುಂದಿ ರೈಸಿಂಗ್, ಹೆಚ್ಎಸ್ಆರ್ ಸಿಟಿಜನ್ ಫೋರಂ ಮುಂತಾದ ತಂಡಗಳು ಕೈಜೋಡಿಸಿವೆ.
ಹಾಗೇ, ಬಿಬಿಎಂಪಿ ಆರೋಗ್ಯಾಧಿಕಾರಿಗಳು ಮತ್ತು ಮಾರ್ಷಲ್ಗಳು ಜನರಿಗೆ ಸಾರ್ವಜನಿಕ ಸ್ಥಳಗಳಲ್ಲಿ ಮೂತ್ರವಿಸರ್ಜನೆ ಮಾಡದಂತೆ ಜಾಗೃತಿ ಮೂಡಿಸುತ್ತಿವೆ. ಫುಟ್ಪಾತ್ಗಳಲ್ಲಿ ಗಲೀಜು ಮಾಡುವವರಿಗೆ ಎಚ್ಚರಿಕೆಯನ್ನೂ ನೀಡಲಾಗುತ್ತಿದೆ. ಸದ್ಯಕ್ಕೆ ದೊಡ್ಡ ಅಂಗಡಿಗಳಲ್ಲಿ ಮಾತ್ರವಲ್ಲದೆ ಚಿಕ್ಕಪುಟ್ಟ ಅಂಗಡಿ ಮತ್ತು ಫುಟ್ಪಾತ್ ಬದಿಯ ವ್ಯಾಪಾರಿಗಳಿಗೂ ಪ್ಲಾಸ್ಟಿಕ್ ಬಳಸದಂತೆ ಕಟ್ಟುನಿಟ್ಟಿನ ಆದೇಶ ನೀಡಲಾಗಿದೆ. ಈ ಹಿನ್ನೆಲೆಯಲ್ಲಿ ವಸ್ತುಗಳನ್ನು ಪೇಪರ್ನಲ್ಲಿ ಸುತ್ತಿ ಅಥವಾ ಪೇಪರ್ ಬ್ಯಾಗ್ನಲ್ಲಿ ನೀಡಲಾಗುತ್ತಿದೆ.
Comments are closed.