ಹಾಸನ: ಅಪ್ಪ ಸಚಿವ, ಚಿಕ್ಕಪ್ಪ ಮುಖ್ಯಮಂತ್ರಿ ಹೀಗಿರುವಾಗ ಸರ್ಕಾರಿ ಕಾರು ಬಳಸುವ ಹಕ್ಕಿದೆ ಎಂಬಂತೆ ಜೆಡಿಎಸ್ ಪ್ರಧಾನ ಕಾರ್ಯದರ್ಶಿ ಸರ್ಕಾರಿ ಕಾರನ್ನು ತಮ್ಮ ಕೆಲಸಕ್ಕೆ ಬಳಸಿಕೊಳ್ಳುತ್ತಿರುವುದು ಬೆಳಕಿಗೆ ಬಂದಿದೆ.
ಲೋಕೋಪಯೋಗಿ ಇಲಾಖೆಗೆ ಸೇರಿದ ಸರ್ಕಾರಿ ವಾಹನವನ್ನು ಜೆಡಿಎಸ್ ಪ್ರಧಾನ ಕಾರ್ಯದರ್ಶಿ ಪ್ರಜ್ವಲ್ ರೇವಣ್ಣ ದುರ್ಬಳಕೆ ಮಾಡಿಕೊಳ್ಳುತ್ತಿರುವುದು ಈಗ ಟೀಕೆಗೆ ಗುರಿಯಾಗಿದೆ. ಸರ್ಕಾರಿ ಅಧಿಕಾರಿಗಳು ಹಾಗೂ ಶಾಸಕರು, ಸಚಿರನ್ನು ಹೊರತು ಪಡಿಸಿ ಸರ್ಕಾರಿ ವಾಹನಗಳನ್ನು ಯಾರು ಬಳಸುವಂತೆ ಇಲ್ಲ. ಈ ರೀತಿ ಕಾನೂನು ಸರ್ಕಾರದಲ್ಲಿರುವಾಗಲೇ, ಇದಕ್ಕೂ ತಮಗೂ ಸಂಬಂಧ ಇಲ್ಲ ಎಂಬಂತೆ ಪ್ರಜ್ವಲ್ ರೇವಣ್ಣ ವರ್ತಿಸಿದ್ದಾರೆ. ಲೋಕೋಪಯೋಗಿ ಸಚಿವರಾಗಿರುವ ಅಪ್ಪನ ಅಧಿಕಾರ ಬಳಸಿಕೊಂಡು ಇಲಾಖೆ ಕಾರ್ ಬಳಸುತ್ತಾ ದರ್ಬಾರ್ ತೋರಿದ್ದಾರೆ.
ಪಕ್ಷದ ಕಾರ್ಯಕರ್ತರ ಸಭೆಗೆ ಇಂದು ಆಗಮಿಸಿದ ಪ್ರಜ್ವಲ್ ರೇವಣ್ಣ ಇಂದು ಸರ್ಕಾರಿ ಕಾರಿನಲ್ಲಿ ಬಂದಿದ್ದಾರೆ. ಜಿಲ್ಲೆಯ ಕಾರ್ಯಕಾರಿ ಇಂಜಿನಿಯರ್ ಹೆಸರಿನಲ್ಲಿರುವ ಈ ಕಾರನ್ನು ಹೇಗೆ ಪ್ರಜ್ವಲ್ ಬಳಕೆ ಮಾಡುತ್ತಿದ್ದಾರೆ. ಪ್ರಜ್ವಲ್ಗೆ ಸರ್ಕಾರಿ ನಿಯಮಗಳು ಅನ್ವಯವಾಗುವುದಿಲ್ಲವಾ ಎಂಬ ಪ್ರಶ್ನೆ ಮೂಡಿದೆ.
ದೇವೇಗೌಡರ ತವರಿನಲ್ಲಿ ಅವರ ಮೊಮ್ಮಗನ ಅಂಧ ದರ್ಬಾರ್ ಟೀಕೆಗೆ ಗುರಿಯಾಗುತ್ತಲೆ, ಈ ಕುರಿತು ಲೋಕೋಪಯೋಗಿ ಇಲಾಖೆಗಳಿಗೆ ಸಂಪರ್ಕಿಸಿದರೂ ಅಧಿಕಾರಿಗಳು ಮಾತ್ರ ಈ ಬಗ್ಗೆ ಯಾವುದೇ ಪ್ರತಿಕ್ರಿಯೆಗೆ ಸಿಗುತ್ತಿಲ್ಲ. ಅಪ್ಪನ ಹೆಸರಲ್ಲಿ ಮಗ ದರ್ಬಾರ್ ಮಾಡುತ್ತಿದ್ದರು ಅಧಿಕಾರಿಗಳು ಮಾತ್ರ ಕಣ್ಮುಚ್ಚಿ ಕುಳಿತಿದ್ದಾರೆ.
ಸಿಎಂ ಕುಮಾರಸ್ವಾಮಿ ಅಧಿಕಾರಕ್ಕೆ ದುಂದುವೆಚ್ಚ ಮಾಡಬಾರದು ಎಂದು ಸರ್ಕಾರಿ ಕಾರನ್ನು ನಿರಾಕರಿಸಿ ಸ್ವಂತ ಕಾರನ್ನು ತಮ್ಮ ಕೆಲಸಕ್ಕೆ ಬಳಸುತ್ತಿದ್ದಾರೆ. ಯಾವುದೇ ಸರ್ಕಾರದ ಅಧಿಕಾರವಿಲ್ಲದ ಪ್ರಜ್ವಲ್ ರೇವಣ್ಣ ತಮ್ಮ ತಂದೆಯ ಅಧಿಕಾರ ಬಳಸಿಕೊಂಡು ಲೋಕೋಪಯೋಗಿ ಇಲಾಖೆಯ ಕಾರನ್ನು ಬಳಸುತ್ತಿರುವುದು ಟೀಕೆಗೆ ಗುರಿಯಾಗಿದೆ.
ಬಿಜೆಪಿ ವ್ಯಂಗ್ಯ:
ಸರ್ಕಾರಿ ಕಾರನ್ನು ಪ್ರಜ್ವಲ್ ರೇವಣ್ಣ ಬಳಕೆ ಮಾಡುತ್ತಿರುವುದಕ್ಕೆ ಟೀಕೆ ಮಾಡಿರುವ ಬಿಜೆಪಿ, ಯಾರದೋ ಟ್ಯಾಕ್ಸ್, ದೇವೇಗೌಡರ ಮೊಮ್ಮಕ್ಕಳ ಮೋಜು ಮಾಡುತ್ತಿದ್ದಾರೆ ಎಂದು ಟ್ವೀಟ್ ಮೂಲಕ ವ್ಯಂಗ್ಯವಾಡಿದೆ.
ಜನರು ತೆರಿಗೆ ಹಣವನ್ನು ಯಾವ ರೀತಿ ದುರ್ಬಳಕೆ ಮಾಡಿಕೊಂಡು ಅವಮಾನಿಸಲಾಗುತ್ತಿದೆ ಎಂಬುದಕ್ಕೆ ಇದು ಉದಾಹರಣೆ. ಸಾಮ್ರಾಜ್ಯಶಾಹಿಗಳು ಹೇಗೆ ಆಡಳಿತ ನಡೆಸುತ್ತಾರೆ ಎಂಬುದಕ್ಕೆ ಸೂಪರ್ ಸಿಎಂ ರೇವಣ್ಣ ಅವರ ಮಗ ಉದಾಹರಣೆ ಎಂದಿದ್ದಾರೆ.
Comments are closed.