‘ಸನ್ನಿ ನೈಟ್‌’ಗೆ ಸಿಗಲಿದೆಯಾ ಅನುಮತಿ

ಬೆಂಗಳೂರು: ಹೊಸ ವರ್ಷದ ಅಂಗವಾಗಿ ಡಿ.31ರಂದು ರಾತ್ರಿ ನಗರದಲ್ಲಿ ನಡೆಸಲು ಉದ್ದೇಶಿಸಿರುವ ‘ಸನ್ನಿ ನೈಟ್‌ ಬೆಂಗಳೂರು’ ಕಾರ್ಯಕ್ರಮಕ್ಕೆ ಅನುಮತಿ ನೀಡುವ ವಿಚಾರಕ್ಕೆ ಸಂಬಂಧಿಸಿದಂತೆ ಸಲ್ಲಿಸಲಾಗಿದ್ದ ಅರ್ಜಿಯನ್ನು ಹೈಕೋರ್ಟ್‌ ಗುರುವಾರ ಇತ್ಯರ್ಥಪಡಿಸಿದೆ. ಡಿ.25ರೊಳಗೆ ಕಾನೂನು ಪ್ರಕಾರ ಅನುಮತಿ ನೀಡುವ ಕುರಿತು ತೀರ್ಮಾನ ತೆಗೆದುಕೊಳ್ಳುವಂತೆ ನಗರ ಪೊಲೀಸರಿಗೆ ಆದೇಶಿಸಿದೆ.

‘ಸನ್ನಿ ನೈಟ್‌’ಗೆ ಅನುಮತಿ ನೀಡದಿರುವುದನ್ನು ಪ್ರಶ್ನಿಸಿ ಕಾರ್ಯಕ್ರಮ ಆಯೋಜಕರಾದ ‘ಟೈಮ್‌ ಕ್ರಿಯೇಷನ್‌’ ಸಲ್ಲಿಸಿದ್ದ ಅರ್ಜಿ ಆಲಿಸಿದ ನ್ಯಾ.ಬಿ.ವೀರಪ್ಪ ಅವರಿದ್ದ ನ್ಯಾಯಪೀಠ, ಅರ್ಜಿದಾರರು ಅನುಮತಿ ಕೋರಿ ಸಲ್ಲಿಸಿರುವ ಮನವಿಯನ್ನು ಡಿ.25ರೊಳಗೆ ಪರಿಶೀಲಿಸಿ ನಿರ್ಧಾರ ಕೈಗೊಳ್ಳಬೇಕು ಎಂದು ನಗರ ಪೊಲೀಸ್‌ ಆಯುಕ್ತರಿಗೆ ಆದೇಶಿಸಿತು.

ವಿಚಾರಣೆ ವೇಳೆ ಸರಕಾರಿ ವಕೀಲರು ”ಮನವಿ ಪರಿಶೀಲನೆ ನಡೆಸಿ ಕೆಲವು ಸ್ಪಷ್ಟನೆಗಳನ್ನು ಕೇಳಲಾಗಿತ್ತು. ಆದರೆ ಅವರು ಅದನ್ನು ಸಲ್ಲಿಸಿಲ್ಲ,” ಎಂದರು. ಅದಕ್ಕೆ ಅರ್ಜಿದಾರರ ವಕೀಲರು ”ಡಿ. 22ರಂದು ಸ್ಪಷ್ಟನೆಗಳನ್ನು ಪೊಲೀಸರಿಗೆ ಸಲ್ಲಿಸಲಾಗುವುದು’,’ಎಂದು ನ್ಯಾಯಪೀಠಕ್ಕೆ ತಿಳಿಸಿದರು.

ಅರ್ಜಿದಾರರ ಪರ ವಕೀಲರು ”ನಟಿ ಸನ್ನಿ ಲಿಯೋನ್‌ ಮಾತ್ರ ಕಾರ್ಯಕ್ರಮದಲ್ಲಿ ಭಾಗವಹಿಸುತ್ತಿಲ್ಲ. ಜತೆಗೆ ಇತರೆ ಕಲಾವಿದರು ಪಾಲ್ಗೊಳ್ಳುತ್ತಿದ್ದಾರೆ. ಕನ್ನಡ ರಾರ‍ಯಪ್‌ ಡ್ಯಾನ್ಸ್‌ ಇದೆ. ಅದೇ ರೀತಿ ಸಂಘಟಕರು ಸನ್ನಿ ಲಿಯೋನ್‌ಗಾಗಿ 80ಲಕ್ಷ ರೂ. ಖರ್ಚು ಮಾಡಿದ್ದಾರೆ,” ಎಂದು ನ್ಯಾಯಪೀಠಕ್ಕೆ ತಿಳಿಸಿದರು.

ಡಿಸಿಪಿ (ಈಶಾನ್ಯ ವಿಭಾಗ) ಎಸ್‌.ಗಿರೀಶ್‌ ನೀಡಿದ ಮಾಹಿತಿ ಆಧರಿಸಿ ವಾದ ಮಂಡಿಸಿದ ಸರಕಾರಿ ವಕೀಲರು ”ಹೊಸ ವರ್ಷಾಚರಣೆಯ ಯಾವುದೇ ಕಾರ್ಯಕ್ರಮಗಳಿಗೆ ಅನುಮತಿ ನೀಡಿಲ್ಲ,” ಎಂದು ಹೇಳಿದರು.

ವಿಜಯ ಕರ್ನಾಟಕ ಓದಿದ್ರಾ ?: ಮಧ್ಯಾಹ್ನ ವಿಚಾರಣೆ ಆರಂಭವಾಗುತ್ತಿದ್ದಂತೆ ”ಏನ್ರಿ,ವಿಜಯ ಕರ್ನಾಟಕ’ ಓದಿದ್ರಾ? ಸನ್ನಿ ಲಿಯೋನ್‌ ಬರೋಲ್ವಂತಲ್ಲಾ, ಮತ್ಯಾಕೆ ಈ ಅರ್ಜಿ,”ಎಂದು ಜಜ್‌ ಕೇಳಿದರು.

ಅರ್ಜಿದಾರರ ಪರ ವಾದಿಸಿದ ಹಿರಿಯ ನ್ಯಾಯವಾದಿ ಉದಯ್‌ ಹೊಳ್ಳ ”ಸನ್ನಿ ಬರಲಿಲ್ಲ ಅಂದ್ರೂ ಬೇರೆಯವರು ಬರ್ತಾರೆ. ಕಾರ್ಯಕ್ರಮ ನಡೆಯುತ್ತದೆ. ಅದಕ್ಕಾಗಿ ಲಕ್ಷಾಂತರ ರೂ.ಖರ್ಚು ಮಾಡಲಾಗಿದೆ. ಪೊಲೀಸರು ತಮಗೆ ಮಾತ್ರ ಅನುಮತಿ ನೀಡುತ್ತಿಲ್ಲ. ಉಳಿದಂತೆ ಬೆಂಗಳೂರಿನಲ್ಲಿ 45-50 ಕ್ಲಬ್‌ಗಳಿಗೆ ಹೊಸ ವರ್ಷಾಚರಣೆ ಕಾರ್ಯಕ್ರಮಕ್ಕೆ ಅನುಮತಿ ನೀಡಲಾಗಿದೆ,” ಎಂದರು.

ಆಗ ಜಜ್‌ ”ಹೌದಾ, ಹಾಗಿದ್ದರೆ ಪೊಲೀಸರೇಕೆ ತಾರತಮ್ಯ ಮಾಡುತ್ತಿದ್ದಾರೆ? ಈ ರೀತಿ ಒಬ್ಬರಿಗೆ ಅನುಮತಿ ಕೊಡುವುದು, ಇನ್ನೊಬ್ಬರಿಗೆ ಕೊಡದೇ ಇರುವುದು ಒಳ್ಳೆಯದಲ್ಲ. ಎಲ್ಲರನ್ನೂ ಒಂದೇ ರೀತಿಯಲ್ಲಿ ಕಾಣಬೇಕು,” ಎಂದರು.

”ಬೇರೆ ಹೊಸ ವರ್ಷದ ಕಾರ್ಯಕ್ರಮಗಳಂತೆ ಇದನ್ನು ಪರಿಗಣಿಸಬೇಕು. ಸನ್ನಿ ಲಿಯೋನ್‌ ಭಾಗವಹಿಸಲಿದ್ದಾರೆ ಎಂಬ ಒಂದೇ ಕಾರಣಕ್ಕೆ. ಕಾನೂನು ಮತ್ತು ಸುವ್ಯವಸ್ಥೆ ನೆಪವೊಡ್ಡಿ ಅನುಮತಿ ನಿರಾಕರಣೆ ಸರಿಯಲ್ಲ. ಮನರಂಜನಾ ಉದ್ದೇಶದಿಂದ ಆಯೋಜಿಸಿರುವ ಕಾರ್ಯಕ್ರಮ ಅನುಮತಿ ನೀಡದಿರಲು ಯಾವುದೇ ಬಲವಾದ ಕಾರಣಗಳಿಲ್ಲ,” ಎಂದು ಜಜ್‌ ಅಭಿಪ್ರಾಯಪಟ್ಟರು.