ಮೈಸೂರು: ವಿಶ್ವವಿಖ್ಯಾತ ಮೈಸೂರು ಅರಮನೆಯನ್ನು ಅಂತರ್ಜಾಲದಲ್ಲಿ ಜಗತ್ತಿನಾದ್ಯಂತ ಕಳೆದ ಡಿಸೆಂಬರ್ ತಿಂಗಳೊಂದರಲ್ಲೇ ನೋಡಿದವರ ಸಂಖ್ಯೆ ಬರೋಬ್ಬರಿ 4.67 ಕೋಟಿ!
ಇದಕ್ಕಾಗಿ ಗೂಗಲ್ನಲ್ಲಿ ಮೊದಲ ರ್್ಯಾಂಕಿಂಗ್ ದೊರಕಿದೆ. ಮೂರು ವರ್ಷಗಳ ಹಿಂದೆ ಆರಂಭಗೊಂಡ mysorepalace.gov.in ಈ ಅಂತರ್ಜಾಲ ತಾಣವನ್ನು ಪ್ರತಿ ವರ್ಷ 20 ಲಕ್ಷ ಜನರು ವೀಕ್ಷಿಸುತ್ತಿದ್ದರು. ಆದರೆ, ಕಳೆದ ವರ್ಷದಿಂದ ವಾಸ್ತವ ವಿಹಾರ (ವರ್ಚುವಲ್ ಟೂರ್) ಶುರು ಮಾಡಿದ ಮೇಲೆ ಇಡೀ ಅರಮನೆಯನ್ನು ವೃತ್ತಾಕಾರವಾಗಿ 360 ಡಿಗ್ರಿ ಕೋನದಲ್ಲಿ ನೋಡಲು ಸಾಧ್ಯವಾಗುತ್ತಿದೆ. ಹೀಗಾಗಿ, ಈ ಅಂತರ್ಜಾಲವನ್ನು ಪ್ರತಿ ವರ್ಷ 1.52 ಕೋಟಿ ಜನರು ವೀಕ್ಷಿಸುತ್ತಿದ್ದಾರೆ.
ಛಾಯಾ ವಿಹಾರದಲ್ಲಿ ಒಟ್ಟು 21 ಸಂಗತಿಗಳಿವೆ. ಪ್ರವೇಶದ್ವಾರ, ಹಳೆ ಅರಮನೆಯ ಮಾದರಿ, ಈಗಿನ ಅರಮನೆ, ಗೊಂಬೆ ತೊಟ್ಟಿ, ಆನೆದ್ವಾರ, ಚಾಮುಂಡೇಶ್ವರಿ ದೇವಿ, ಚಿನ್ನದ ಅಂಬಾರಿ, ಪೇಂಟಿಂಗ್, ದಸರಾ ಮೆರವಣಿಗೆ, ಕಲ್ಯಾಣ ಮಂಟಪ, ಛಾಯಾಚಿತ್ರ ಗ್ಯಾಲರಿ, ಟ್ರೋಫಿಗಳ ಸಂಗ್ರಹ ಗ್ಯಾಲರಿ, ದಸರಾದಲ್ಲಿ ದುರ್ಗಾ ಪೂಜೆಯ ಪೇಂಟಿಂಗ್, ದಸರಾ ಮೆರವಣಿಗೆಯಲ್ಲಿ ಮಹಾರಾಜರು, ಕುಸ್ತಿ ಅಖಾಡ, ಅರಮನೆಯ ಪೀಠೋಪಕರಣ, ದರ್ಬಾರ್ ಹಾಲ್, ಒಡೆಯರ್ ಪರಂಪರೆಯ ಚಿತ್ರಗಳು, ಕಲಾತ್ಮಕ ಬೆಳ್ಳಿದ್ವಾರ, ಖಾಸಗಿ ದರ್ಬಾರ್ ಹಾಲ್, ವಿದ್ಯುತ್ ದೀಪಾಲಂಕಾರದ ಅರಮನೆ… ಇವುಗಳನ್ನು ವಿವರಗಳ ಸಮೇತ ನೋಡಬಹುದು.
ಮಾಹಿತಿ ಲಭ್ಯ: ಇಂಟರ್ನ್ಯಾಷನಲ್ ಸರ್ಚ್ ಎಂಜಿನ್ ಮೂಲಕ ಅರಮನೆ ಯನ್ನು ವಿವಿಧ ದೇಶಗಳವರು ತಮ್ಮ ತಮ್ಮ ಭಾಷೆಗಳಲ್ಲಿಯೇ ನೋಡ ಬಹುದು.
‘ಇದರಿಂದ ಚೀನಾ, ಜಪಾನ್ ಮೊದಲಾದ ದೇಶಗಳ ಪ್ರವಾಸಿಗರು, ಆಸಕ್ತರು ತಮ್ಮ ಸ್ಥಳೀಯ ಭಾಷೆಗಳಲ್ಲಿಯೇ ನಮ್ಮ ಅರಮನೆಯ ವಿವರಗಳನ್ನು ಪಡೆದುಕೊಳ್ಳಬಹುದು.
ಒಟ್ಟು 37 ದೇಶಗಳ ಸ್ಥಳೀಯ ಭಾಷೆ ಗಳಲ್ಲಿಪಠ್ಯ ಬದಲಾಗುತ್ತದೆ. ಇದಕ್ಕಾಗಿ ಕೇಂದ್ರಸರ್ಕಾರದಿಂದ ಅನುಮತಿ ಪಡೆಯಲಾಗಿದೆ’ ಎಂದು ಮೈಸೂರು ಅರಮನೆ ಮಂಡಳಿಯ ಉಪನಿರ್ದೇಶಕ ಟಿ.ಎಸ್. ಸುಬ್ರಹ್ಮಣ್ಯ ‘ಪ್ರಜಾವಾಣಿ’ಗೆ ತಿಳಿಸಿದರು. ‘ಇದೇ ಅಂತರ್ಜಾಲದಲ್ಲಿ ಭಾರತದ ವಿವಿಧ ರಾಜ್ಯಗಳ ಪ್ರಾದೇಶಿಕ ಭಾಷೆ ಗಳಲ್ಲಿಯೂ ಲಭ್ಯ ಇರುವ ಹಾಗೆ ಅಭಿವೃದ್ಧಿಪಡಿಸಲಾಗುತ್ತಿದೆ’ ಎನ್ನುತ್ತಾರೆ ಅಂತರ್ಜಾಲದ ತಾಂತ್ರಿಕ ಅಧಿಕಾರಿ ಸಂಜಯ್ ಅಹುಜಾ.