ಬೆಂಗಳೂರು: ‘ಇಸ್ಲಾಮಿಕ್ ಸ್ಟೇಟ್ (ಐ.ಎಸ್) ಭಯೋತ್ಪಾದನಾ ಸಂಘಟನೆಯ ಟ್ವಿಟರ್ ಖಾತೆ ನಿರ್ವಹಿಸುತ್ತಿದ್ದ ಆರೋಪದ ಮೇಲೆ ಬಂಧಿತನಾಗಿರುವ ಮೆಹದಿ ಮಸ್ರೂರ್ ಬಿಸ್ವಾಸ್ನ ವಿರುದ್ಧ ಆರೋಪಪಟ್ಟಿ ಸಲ್ಲಿಸುವಷ್ಟು ಸಾಕ್ಷ್ಯಗಳು ಲಭ್ಯವಾಗಿವೆ’ ಎಂದು ತನಿಖಾಧಿಕಾರಿಗಳು ಹೇಳಿದ್ದಾರೆ.
‘ಮೆಹದಿ ನಿರ್ವಹಿಸುತ್ತಿದ್ದ ‘@shami witness’ ಖಾತೆಯಲ್ಲಿನ ಎಲ್ಲ 1.24 ಲಕ್ಷ ಟ್ವೀಟ್ಗಳನ್ನು ಪರಿಶೀಲಿಸುವ ಕಾರ್ಯ ಪೂರ್ಣಗೊಂಡಿದೆ. ಅದರಲ್ಲಿ ಐ.ಎಸ್ ಸಂಘಟನೆಗೆ ಸೇರಲು ಯುವಕರನ್ನು ಪ್ರೇರೇಪಿಸುವಂಥ 15 ಸಾವಿರ ಟ್ವೀಟ್ಗಳಿವೆ. ಕೆಲ ಟ್ವೀಟ್ಗಳನ್ನು ಆತ ಅಳಿಸಿ ಹಾಕಿದ್ದಾನೆ. ಜತೆಗೆ ವಿಚಾರಣೆ ವೇಳೆ ಮೆಹದಿ ನೀಡಿದ ಹೇಳಿಕೆಗಳನ್ನು ರೆಕಾರ್ಡ್ ಮಾಡಿಕೊಳ್ಳಲಾಗಿದೆ. 30 ದಿನಗಳಲ್ಲಿ ನ್ಯಾಯಾಲಯಕ್ಕೆ ಪ್ರಾಥಮಿಕ ಆರೋಪ ಪಟ್ಟಿ ಸಲ್ಲಿಸಲಾಗುವುದು. ನಂತರದ 15 ದಿನಗಳಲ್ಲಿ ಅಂತಿಮ ಪಟ್ಟಿ ಸಲ್ಲಿಸಲಾಗುವುದು’ ಎಂದರು.
‘ಆರೋಪಿಯು ಮೊಬೈಲ್ ಮತ್ತು ಲ್ಯಾಪ್ಟಾಪ್ ಎರಡರಲ್ಲೂ ಟ್ವಿಟರ್ ಖಾತೆ ನಿರ್ವಹಿಸುತ್ತಿದ್ದ. ಲ್ಯಾಪ್ಟಾಪ್ನ ಒಂದು ಫೋಲ್ಡರ್ನಲ್ಲಿ ಸಿರಿಯಾ– ಇರಾಕ್ ಯುದ್ಧಗಳು ಹಾಗೂ ಐ.ಎಸ್ ಸಂಘಟನೆಗೆ ಸೇರಿದ 1.5 ಜಿ.ಬಿಯಷ್ಟು ಮಾಹಿತಿ ಸಂಗ್ರಹಿಸಿದ್ದ. ಅಲ್ಲದೆ, ಐ.ಎಸ್ ಸಂಘಟನೆ ಜತೆ ಗುರುತಿಸಿಕೊಂಡಿರುವ ಮಹಾರಾಷ್ಟ್ರದ ಮೂವರ ಜತೆ ಮೆಹದಿ ನೇರ ಸಂಪರ್ಕ ಹೊಂದಿದ್ದ. ಆತನ ಟ್ವೀಟ್ಗಳ ಕುರಿತು ಈಗಾಗಲೇ ಎನ್ಐಎ ವಿಶೇಷ ನ್ಯಾಯಾಲಯಕ್ಕೆ ನಾಲ್ಕು ಪುಟಗಳ ಪ್ರಾಥಮಿಕ ವರದಿ ಸಲ್ಲಿಸಲಾಗಿದೆ’ ಎಂದು ಮಾಹಿತಿ ನೀಡಿದರು.
‘ಭಯೋತ್ಪಾದನೆಗೆ ಸಂಬಂಧಿಸಿದ ಪ್ರಕರಣಗಳಲ್ಲಿ ಆರೋಪಿಗಳ ಬಂಧನವಾದ 180 ದಿನಗಳೊಳಗೆ ಆರೋಪಪಟ್ಟಿ ಸಲ್ಲಿಸಬೇಕಾಗುತ್ತದೆ. ಮೆಹದಿ ಬಂಧನವಾಗಿ ಕೇವಲ 42 ದಿನಗಳಾಗಿದೆ. ಹೀಗಾಗಿ ಆರೋಪ ಪಟ್ಟಿ ಸಲ್ಲಿಕೆಗೆ ಇನ್ನೂ ಸಾಕಷ್ಟು ಕಾಲಾವಕಾಶವಿದೆ. ಆದರೆ, ಅಗತ್ಯ ಸಾಕ್ಷ್ಯಗಳು ಈಗಾಗಲೇ ಲಭ್ಯವಾಗಿರುವುದರಿಂದ ಆರೋಪ ಪಟ್ಟಿ ಸಲ್ಲಿಸಲು ತಡ ಮಾಡುವುದಿಲ್ಲ’ ಎಂದು ಅವರು ಹೇಳಿದರು.
ಇಂಗ್ಲೆಂಡ್ನ ಸುದ್ದಿ ವಾಹಿನಿ ಮಾಡಿದ್ದ ವರದಿ ಆಧರಿಸಿ, ಡಿ.12ರಂದು ಜಾಲಹಳ್ಳಿಯಲ್ಲಿ ಪೊಲೀಸರು ಮೆಹದಿಯನ್ನು ಬಂಧಿಸಿದ್ದರು.
‘ಹುಬ್ಬಳ್ಳಿಯಿಂದಲೂ ಟ್ವೀಟ್’
ಹುಬ್ಬಳ್ಳಿ: ‘ಶಂಕಿತ ಐ.ಎಸ್ ಉಗ್ರ ಮೆಹದಿ ಬಿಸ್ವಾಸ್ಗೆ ಹುಬ್ಬಳ್ಳಿಯಿಂದಲೂ ಕೆಲವರು ಸಾಮಾಜಿಕ ತಾಣ ಟ್ವಿಟರ್ನಲ್ಲಿ ಟ್ವೀಟ್ ಮಾಡಿದ್ದು, ಈ ಕುರಿತು ಬೆಂಗಳೂರಿನ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ’ ಎಂದು ಹುಬ್ಬಳ್ಳಿ–ಧಾರವಾಡ ಪೊಲೀಸ್ ಕಮೀಷನರ್ ರವೀಂದ್ರ ಪ್ರಸಾದ್ ಹೇಳಿದರು.
ಮೆಹದಿಗೆ ದೇಶದಾದ್ಯಂತ ಸಾವಿರಾರು ಜನ ಟ್ವೀಟ್ ಮಾಡಿದ್ದು, ಅದರಲ್ಲಿ ಹುಬ್ಬಳ್ಳಿಯವರೂ ಕೆಲವರಿದ್ದಾರೆ. ಅವರನ್ನು ಬಂಧಿಸುವಂತೆ ಅಥವಾ ಅವರ ಚಲನವಲನಗಳನ್ನು ಗಮನಿಸುವಂತೆ ಬೆಂಗಳೂರಿನ ಸಿಸಿಬಿ ಪೊಲೀಸರು ಯಾವುದೇ ಸೂಚನೆ ನೀಡಿಲ್ಲ. ಆದ್ದರಿಂದ ನಾವು ಯಾವುದೇ ಕ್ರಮ ಕೈಗೊಂಡಿಲ್ಲ’ ಎಂದು ಅವರು ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.