ಬೀಜಿಂಗ್: ಚೀನಾದಲ್ಲಿ ವರ್ಷಂಪ್ರತಿ ನಡೆಯುವ ಕುಖ್ಯಾತ ‘ನಾಯಿ ಮಾಂಸದ ಹಬ್ಬ’ವನ್ನು ಅಂತ್ಯಗೊಳಿಸುವಂತೆ ದೇಶದ ಶೇ. 64ಕ್ಕಿಂತಲೂ ಅಧಿಕ ಮಂದಿ ಅಗ್ರಹಿಸಿದ್ದಾರೆ. ಯುಲಿನ್ ನಗರದಲ್ಲಿ ಸೋಮವಾರದಿಂದ ಈ ಹಬ್ಬ ಆರಂಭವಾಗುತ್ತಿದ್ದು, ಅದರ ಮುನ್ನಾದಿನ ಬಿಡುಗಡೆಯಾದ ಸಮೀಕ್ಷೆಯೊಂದರ ಫಲಿತಾಂಶ ಮಾಂಸದ ಹಬ್ಬದ ವಿರುದ್ಧ ಜನಾದೇಶ ನೀಡಿದೆ. ಈ ಹಬ್ಬದಲ್ಲಿ 10000ಕ್ಕೂ ಅಧಿಕ ನಾಯಿಗಳ ಮಾಂಸವನ್ನು ಬೇಯಿಸಿ ತಿನ್ನಲಾಗುತ್ತಿದ್ದು, ಇದು ವಿಶ್ವದೆಲ್ಲೆಡೆ ಚೀನಾದ ಗೌರವವನ್ನು ಹಾಳು ಮಾಡಿದೆ ಎಂದು ಜನ ಅಭಿಪ್ರಾಯಪಟ್ಟಿದ್ದಾರೆ. ಯುಲಿನ್ ನಗರದ ಜನರಂತೂ ಇದಕ್ಕೆ ಸಂಪೂರ್ಣ ವಿರೋಧವಾಗಿದ್ದಾರೆ. ದೇಶಾದ್ಯಂತ 16ರಿಂದ 50 ವರ್ಷದೊಳಗಿನ ವಯೋಮಾನ”ವರನ್ನು ಮಾತನಾಡಿಸಲಾಗಿದ್ದು, ಶೇ. 64 ಮಂದಿ ಇದನ್ನು ಶಾಶ್ವತವಾಗಿ ನಿಷೇಧಿಸಬೇಕು ಎಂದು ಒತ್ತಾಯಿಸಿದ್ದಾರೆ. ಹಬ್ಬ ಮಾತ್ರವಲ್ಲ, ನಾಯಿ ಮಾಂಸ ಮಾರಾಟವನ್ನೇ ನಿಲ್ಲಿಸಬೇಕು ಎನ್ನುವುದು ಶೇ. 51.7 ಜನರ ಆಗ್ರಹ. ಶೇ. 69 ಜನ ತಾವೆಂದೂ ನಾಯಿ ಮಾಂಸ ತಿಂದಿಲ್ಲ ಎಂದು ಹೇಳಿರುವುದು ದೇಶದಲ್ಲಿ ನಾಯಿ ಮಾಂಸ ತಿನ್ನೋರೇ ಜಾಸ್ತಿ ಎಂಬ ಮಿಥ್ಯೆಯನ್ನೂ ಬಯಲುಗೊಳಿಸಿದೆ.
Comments are closed.