ಜೈಲಿನಲ್ಲಿ ಒಂದು ರಾತ್ರಿ ಕಳೆಯುವ ವಿಚಿತ್ರ ಆಸೆ ಪೂರೈಸಿಕೊಂಡ ಕೇರಳ ಉದ್ಯಮಿ

ಹೈದರಾಬಾದ್‌: ಆತ ಆಗರ್ಭ ಶ್ರೀಮಂತ. ಆಭರಣಗಳ ವ್ಯಾಪಾರ ಮಾಡುವ ಉದ್ಯಮಿ. ಆದರೆ ಕೇರಳ ಮೂಲದ ಈ ಉದ್ಯಮಿಗೆ ವಿಚಿತ್ರವಾ ಆಸೆಯೊಂದಿತ್ತು. ಆದೇನೆಂದರೆ ಒಂದು ದಿನ ಪೂರ್ತಿ ಜೈಲಿನಲ್ಲಿ ಕಳೆಯಬೇಕೆಂಬುದು.

ಇದೇನಪ್ಪ ವಿಚಿತ್ರ ಖಯಾಲಿ ಎಂದುಕೊಂಡೀರಾ, ಹೌದು ಕೇರಳದ ಮೂಲದ ಬಾಬಿ ಚೆಮ್ಮನೂರು ಎಂಬುವರೇ ಈ ವಿಚಿತ್ರ ಆಸೆ ಪೂರೈಸಿಕೊಂಡಿರುವ ಉದ್ಯಮಿ.

ತೆಲಂಗಾಣದ ಸಂಗರೆಡ್ಡಿಯಲ್ಲಿರುವ ಪಾರಂಪರಿಕ ಜೈಲಿನಲ್ಲಿ ಒಂದು ದಿನವನ್ನು ಕಳೆದಿದ್ದಾರೆ ಬಾಬಿ ಚೆಮ್ಮನೂರು. ಇವರಿಗೆ ಸ್ನೇಹಿತರಾದ ಆಶೀರ್‌ ಅಲಿ, ಪ್ರಶಾಂತ್ ಮತ್ತು ಬಡ್ಡಿ ವಿನಯ್‌ ಕೂಡ ಇದ್ದರು.

ಸಂಗರೆಡ್ಡಿಯಲ್ಲಿರುವ ಈ ಜೈಲು 220 ವರ್ಷಗಳ ಇತಿಹಾಸ ಹೊಂದಿದೆ. ಈ ಜೈಲಿನಲ್ಲಿರುವ ಕೆಲವು ಬಾರಕ್‌ಗಳನ್ನು ನವೀಕರಣಗೊಳಿಸಿ ಹೆರಿಟೇಜ್‌ ಜೈಲು ಎಂದು ಪೊಲೀಸರು ಮರು ನಾಮಕರಣ ಮಾಡಿದ್ದಾರೆ.

ಯಾರು ಬೇಕಾದರೂ ಇಲ್ಲಿ ಬಂದು 500 ರೂಪಾಯಿ ಶುಲ್ಕ ನೀಡಿ ಜೈಲಿನಲ್ಲಿ ಒಂದು ದಿನ ತಂಗಬಹುದು.

ಈಗಾಗಲೇ 50ಕ್ಕೂ ಹೆಚ್ಚು ಮಂದಿ ಈ ಜೈಲಿನ ಅನುಭವ ಪಡೆದುಕೊಂಡಿದ್ದಾರೆ.

ಜೈಲಿನಲ್ಲಿ ತಂಗಬೇಕೆಂಬ ಆಸೆ ಹೊಂದಿದ್ದ ಬಾಬಿ ಚೆಮ್ಮನೂರ್‌ಗೆ ಈ ವಿಷಯ ತಿಳಿಯಿತು. ಕೂಡಲೇ ತ್ರಿಶೂರ್‌ನಿಂದ ಹೈದರಾಬಾದ್‌ಗೆ ಆಗಮಿಸಿದರು. ಸಂಗರೆಡ್ಡಿ ಪಾರಂಪರಿಕ ಜೈಲಿನಲ್ಲಿ ಒಂದು ರಾತ್ರಿ ಕಳೆದು ತಮ್ಮ ಆಸೆ ತೀರಿಸಿಕೊಂಡಿದ್ದಾರೆ.

ಆದರೆ ಈ ಜೈಲಿನಲ್ಲಿ ಇರಬೇಕಾದರೆ ಪೊಲೀಸರು ಹೇಳುವ ಎಲ್ಲ ನಿಯಮಗಳನ್ನೂ ಪಾಲಿಸಬೇಕು.

ಕೈದಿಗಳ ಸಮವಸ್ತ್ರ ಧರಿಸಿ, ಪೊಲೀಸರು ನೀಡುವ ತಟ್ಟೆ, ಲೋಟ ಪಡೆದು ಜೈಲಿನಲ್ಲಿ ನೀಡುವ ಆಹಾರವನ್ನೇ ಸೇವಿಸಬೇಕು. ಈ ಜೈಲು ಮ್ಯೂಸಿಯಂ ಈಗ ಜನಪ್ರಿಯವಾಗುತ್ತಿದೆ.