ವರದಿ: ಎಂ.ಇಕ್ಬಾಲ್ ಉಚ್ಚಿಲ, ದುಬೈ
ಫೋಟೋ: ಅಶೋಕ್ ಬೆಳ್ಮಣ್
ಶಾರ್ಜಾ, ಡಿ.3: ‘ಈವೆಂಟ್ಸ್ 306’ ಶಾರ್ಜಾದ ವಂಡರೆರ್ಸ್‌ ಸ್ಪೋರ್ಟ್ ಕ್ಲಬ್ ಕ್ರೀಡಾಂಗಣದಲ್ಲಿ ಆಯೋಜಿಸಿದ್ದ ‘ಯುನೈಟೆಡ್ ಕಪ್-2015’ ಪುರುಷರ ವಾಲಿಬಾಲ್ ಪಂದ್ಯಾಟದಲ್ಲಿ ಇಂಡಿಯನ್ ಸ್ಪೈಕರ್ ವಿಜೇತವಾದರೆ, ಥ್ರೋಬಾಲ್‌ನಲ್ಲಿ ಪುರುಷರ ಹಾಗೂ ಮಹಿಳೆಯರ ವಿಭಾಗದಲ್ಲಿ ಮಂಗಳೂರು ಕೊಂಕಣ್ಸ್ ಮತ್ತು ಮಿಕ್ಸ್ ಥ್ರೋಬಾಲ್ ಪುರುಷರ ವಿಭಾಗದಲ್ಲಿ ನಮ್ಮ ಕುಡ್ಲ, ಮಹಿಳೆಯರ ವಿಭಾಗದಲ್ಲಿ ಕಾರ್ಳ ಕಿಂಗ್ಸ್ ತಂಡಗಳು ಪ್ರಶಸ್ತಿಯನ್ನು ತನ್ನ ಮುಡಿಗೇರಿಸಿಕೊಂಡಿವೆ.
ರೋಚಕವಾಗಿ ಮೂಡಿಬಂದ ಪುರುಷರ ವಾಲಿಬಾಲ್ ಫೈನಲ್‌ನಲ್ಲಿ ಇಂಡಿಯನ್ ಸ್ಪೈಕರ್ ತಂಡವು ಯೇಸ್(ಎಸಿಇ) ಸ್ಪೈಕರ್ ತಂಡವನ್ನು ಸೋಲಿಸುವ ಮೂಲಕ ‘ಯುನೈಟೆಡ್ ಕಪ್-2015’ನ್ನು ತನ್ನದಾಗಿಸಿಕೊಂಡಿತು.
ಥ್ರೋಬಾಲ್‌ನಲ್ಲಿ ಪುರುಷರ ಹಾಗೂ ಮಹಿಳೆಯರ ವಿಭಾಗದಲ್ಲಿ ಮಂಗಳೂರು ಕೊಂಕಣ್ಸ್ ತಂಡಗಳು ಫೈನಲ್‌ನಲ್ಲಿ ಕೋಸ್ಟಲ್ ಫ್ರೆಂಡ್ಸ್ ಹಾಗೂ ಬಂಟ್ಸ್ ದುಬೈನ್ನು ಸೋಲಿಸುವ ಮೂಲಕ ವಿಜಯದ ನಗೆಬೀರಿದವು.
ಮಿಕ್ಸ್ ಥ್ರೋಬಾಲ್ ಪುರುಷರ ವಿಭಾಗದಲ್ಲಿ ನಮ್ಮ ಕುಡ್ಲ ತಂಡವು ಕಂದಾಪುರ ಟೈಗರ್ಸ್‌ ತಂಡವನ್ನು, ಮಹಿಳೆಯರ ವಿಭಾಗದಲ್ಲಿ ಕುಂದಾಪುರ ಟೈಗರ್ಸ್‌ ತಂಡವನ್ನು ಕಾರ್ಳ ಕಿಂಗ್ಸ್ ತಂಡವು ಸೋಲಿಸುವ ಮೂಲಕ ಗೆಲವಿನ ಪತಾಕೆಯನ್ನು ಹಾರಿಸಿತು.
ಪಂದ್ಯಾಟಕ್ಕೆ ವಿದ್ಯುಕ್ತ ಚಾಲನೆ
ಇದಕ್ಕೂ ಮುನ್ನ ಬೆಳಗ್ಗೆ ನಡೆದ ಪಂದ್ಯಾಕೂಟಕ್ಕೆ ಚಾಲನೆ ನೀಡಲಾಯಿತು. ದುಬೈ ಆ್ಯಕ್ಮೆ ಬಿಲ್ಡಿಂಗ್ ಮೆಟೀರಿಯಲ್ಸ್‌ನ ಆಡಳಿತ ನಿರ್ದೇಶಕ ಹಾಗೂ ಖ್ಯಾತ ಗಾಯಕರೂ ಆಗಿರುವ ಹರೀಶ್ ಶೇರಿಗಾರ್, ಉದ್ಯಮಿಗಳಾದ ಜೆರ್ರಿಲೋಬೋ, ರಮಾನಂದ ಶೆಟ್ಟಿ, ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷ ಸರ್ವೋತಮ ಶೆಟ್ಟಿ ಪಾರಿವಾಳ ಹಾಗೂ ಬಲೂನ್‌ಗಳನ್ನು ಹಾರಿಬಿಡುವ ಮೂಲಕ ಪಂದ್ಯೂಟಕ್ಕೆ ಚಾಲನೆ ನೀಡಿದರು.
ಬಹುಮಾನ ವಿತರಣಾ ಸಮಾರಂಭ
ಸಂಜೆ ನಡೆದ ಬಹುಮಾನ ವಿತರಣಾ ಸಮಾರಂಭದಲ್ಲಿ ಉದ್ಯಮಿಗಳಾದ ಜೆರ್ರಿಲೋಬೋ, ರಮಾನಂದ ಶೆಟ್ಟಿ, ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷ ಸರ್ವೋತಮ ಶೆಟ್ಟಿ, ವಾಲ್ಟರ್ ವೇದಿಕೆಯಲ್ಲಿ ಹಾಜರಿದ್ದು, ವಿಜೇತ ತಂಡಗಳಿಗೆ ಬಹುಮಾನ ವಿತರಿಸಿ, ಅಭಿನಂದಿಸಿದರು. ಈ ವೇಳೆ ಪಂದ್ಯಾಟದ ಸಂಘಟಕ ವಿನೋದ್ ಎಲ್ಲರನ್ನು ಸ್ವಾಗತಿಸಿದರು.
ಪಂದ್ಯಾಟದ ವಾಲಿಬಾಲ್‌ನಲ್ಲಿ ಬೆಸ್ಟ್ ಸ್ಟ್ರೈಕರ್ ಯೇಸ್(ಎಸಿಇ) ಸ್ಪೈಕರ್ ತಂಡದ ಅವಿನಾಶ್ ಶೆಟ್ಟಿ, ಬೆಸ್ಟ್ ಸೆಟ್ಟರ್ ಇಂಡಿಯನ್ ಸ್ಪೈಕರ್ ತಂಡದ ರಿಯಾಝ್, ಬೆಸ್ಟ್ ಆಲ್‌ರೌಂಡರ್ ಇಂಡಿಯನ್ ಸ್ಪೈಕರ್ ತಂಡದ ಸುನಿಲ್ ಪಾಲಾದವು.
ಥ್ರೋಬಾಲ್ ಮಹಿಳೆಯರ ವಿಭಾಗದಲ್ಲಿ ಬೆಸ್ಟ್ ಸ್ಟ್ರೈಕರ್ ಮಂಗಳೂರು ಕೊಂಕಣ್ಸ್ ತಂಡದ ಐರಿನ್, ಬೆಸ್ಟ್ ಡಿಫೆಂಡರ್ ಬಂಟ್ಸ್ ದುಬೈ ತಂಡದ ಶ್ರುತಿ ಶೆಟ್ಟಿ ಮತ್ತು ಬೆಸ್ಟ್ ಆಲ್‌ರೌಂಡರ್ ಪ್ರಶಸ್ತಿ ಮಂಗಳೂರು ಕೊಂಕಣ್ಸ್ ತಂಡದ ಝೈನ್ ಅವರಿಗೆ ನೀಡಿ ಅಭಿನಂದಿಸಲಾಯಿತು.
ಥ್ರೋಬಾಲ್ ಪುರುಷರ ವಿಭಾಗದಲ್ಲಿ ಬೆಸ್ಟ್ ಸ್ಟ್ರೈಕರ್ ಕೋಸ್ಟಲ್ ಸ್ಟ್ರೈಕರ್ ತಂಡದ ಅಲನ್, ಬೆಸ್ಟ್ ಡಿಫೆಂಡರ್ ಮಂಗಳೂರು ಕೊಂಕಣ್ಸ್ ತಂಡದ ಖೇತ್ ಹಾಗೂ ಬೆಸ್ಟ್ ಆಲ್‌ರೌಂಡರ್ ಪ್ರಶಸ್ತಿ ಮಂಗಳೂರು ಕೊಂಕಣ್ಸ್ ತಂಡದ ರಿಜಾಯ್ ಪಡೆದುಕೊಂಡರು.
