ವಾರಣಾಸಿ: ಮಕ್ಕಳ ಕೈಗೆ ಮೊಬೈಲ್ ಸುಲಭವಾಗಿ ಸಿಗುತ್ತಿವೆ. ಸಾಲದಿದ್ದಕ್ಕೆ ಅಗ್ಗದ ದರದಲ್ಲಿ ಅಂತರ್ಜಾಲದ ಸಂಪರ್ಕವೂ ಲಭ್ಯ. ಸದ್ಬಳಕೆ ಆಗಬೇಕಿದ್ದ ಈ ಸೌಲಭ್ಯವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿರುವವರೇ ಹೆಚ್ಚು. ಅದರಲ್ಲಿಯೂ ಮಕ್ಕಳು ಮೊಬೈಲ್ ಅಡಿಕ್ಟ್ಗಳಾಗುತ್ತಿರುವುದು ಹೆಚ್ಚುತ್ತಿದೆ. ಪರಿಹಾರವಾಗಿ ಆ್ಯಪ್ವೊಂದನ್ನು ಅಭಿವೃದ್ಧಿಗೊಳಿಸಲಾಗಿದೆ.
ಅಂತರ್ಜಾಲದಲ್ಲಿ ಅಶ್ಲೀಲ ಚಿತ್ರ ಹುಡುಕಿದರೆ ಭಕ್ತಿಗೀತೆಗಳು ಸಿಗುವಂಥ ವಿಶಿಷ್ಟವಾದ ಆ್ಯಪ್ವೊಂದನ್ನು ಬನಾರಸ್ ಹಿಂದೂ ವಿಶ್ವವಿದ್ಯಾಲಯದ ಪ್ರೊಫೆಸರ್ ಮತ್ತು ತಂಡ ಅಭಿವೃದ್ಧಿ ಪಡಿಸಿದೆ.
ಐಎಂಎಸ್-ಬಿಎಚ್ಯು ವೈದ್ಯಕೀಯ ವಿಜ್ಞಾನ ಸಂಸ್ಥೆಯ ಸೈನ್ಸ್ ವಿಭಾಗದ ಪ್ರೊಫೆಸರ್ ಡಾ. ವಿಜಯನಾಥ್ ಮಿಶ್ರಾ ಹಾಗೂ ತಂಡ ‘ಹರ್ ಹರ್ ಮಹಾದೇವ್’ ಎಂಬ ಅಪ್ಲಿಕೇಶನ್ ಅಭಿವೃದ್ಧಿ ಪಡಿಸಿದ್ದು, ಅಂತರಜಾಲದಲ್ಲಿ ಲಭ್ಯವಾಗುವ ಅಶ್ಲೀಲ, ಹಿಂಸಾಚಾರ ಹಾಗೂ ಅಸಭ್ಯ ವಿಷಯಗಳನ್ನು ಬ್ಲಾಕ್ ಮಾಡುತ್ತದೆ ಈ ಆ್ಯಪ್.
ಅಂತರಜಾಲದಲ್ಲಿ ಅಶ್ಲೀಲ ಚಿತ್ರಗಳನ್ನು ಹುಡುಕಿದರೆ ಭಕ್ತಿಗೀತೆಗಳು ಪ್ರಸಾರವಾಗುವಂತೆ ಈ ಆ್ಯಪ್ ಅನ್ನು ಸಿದ್ಧ ಪಡಿಸಲಾಗಿದೆ. ‘ವೆಬ್ಸೈಟ್ ಬ್ಲಾಕರ್ ಮತ್ತು ಇಂಟರ್ನೆಟ್ ಫಿಲ್ಟರಿಂಗ್ ಸೇವೆಯನ್ನು ಸಿದ್ಧ ಪಡಿಸಿದ್ದು, ಆ ಆ್ಯಪ್ ಡೌನ್ಲೋಡ್ ಮಾಡಿಕೊಂಡರೆ ಯಾವುದೇ ಭಯವಿಲ್ಲದೆ ಅಂತರಜಾಲವನ್ನು ಬಳಸಬಹುದು,’ ಎಂದು ಪ್ರೊಫೆಸರ್ ಡಾ. ವಿಜಯನಾಥ್ ಮಿಶ್ರಾ ಹೇಳಿಕೊಂಡಿದ್ದಾರೆ.
‘ಹರ್ ಹರ್ ಮಹಾದೇವ್’ ಅಪ್ಲಿಕೇಶನ್ ಸಿದ್ಧಪಡಿಸಲು 6 ತಿಂಗಳು ತೆಗೆದುಕೊಂಡಿದ್ದು, 3800ಕ್ಕೂ ಅಧಿಕ ಆಕ್ಷೇಪಾರ್ಹ ಸೈಟ್ಗಳನ್ನು ಪತ್ತೆ ಮಾಡಿ ಬ್ಲಾಕ್ ಮಾಡುವ ಸಾಮರ್ಥ್ಯವನ್ನು ಸೇರಿಸಲಾಗಿದೆ. ಆರಂಭದಲ್ಲಿ ಹಿಂದೂ ಭಕ್ತಿಗೀತೆಗಳನ್ನು ಮಾತ್ರ ಅಳವಡಿಸಿದ್ದು, ಮುಂದಿನ ದಿನಗಳಲ್ಲಿ ಇತರೆ ಧರ್ಮಗಳ ಭಕ್ತಿಗೀತೆಗಳನ್ನು ಸೇರಿಸುತ್ತೇವೆ,’ ಎನ್ನುತ್ತಾರೆ ಮಿಶ್ರಾ.
Comments are closed.