ಕಣ್ಣೂರು: ಕೆಲವು ವರ್ಷಗಳಿಂದೀಚೆಗೆ ಸುಮಾರು 100 ಮಂದಿ ಕೇರಳೀಯರು ಐಸಿಸ್‌ (ಇಸ್ಲಾಮಿಕ್‌ ಸ್ಟೇಟ್‌) ಉಗ್ರ ಸಂಘಟನೆ ಸೇರಿದ್ದಾರೆ ಎಂಬ ಆಘಾತಕಾರಿ ಮಾಹಿತಿಯನ್ನು ಪೊಲೀಸರು ಶನಿವಾರ ಬಹಿರಂಗಪಡಿಸಿದ್ದಾರೆ.
ಇದಕ್ಕೆ ಸಂಬಂಧಿಸಿದಂತೆ ವಾಟ್ಸಪ್, ಟೆಲಿಗ್ರಾಂ ಮತ್ತು ಇತರ ಸಾಮಾಜಿಕ ಜಾಲತಾಣಗಳಲ್ಲಿ ವಿನಿಮಯವಾದ 300ಕ್ಕೂ ಹೆಚ್ಚು ಧ್ವನಿ ಸಂದೇಶಗಳು ಮತ್ತು ಇತರ ದಾಖಲೆಗಳನ್ನು ಕೇರಳ ಪೊಲೀಸರು ವಶಪಡಿಸಿಕೊಂಡಿದ್ದಾರೆ ಎಂದು ಮೂಲಗಳು ಪಿಟಿಐ ಸುದ್ದಿಸಂಸ್ಥೆಗೆ ತಿಳಿಸಿವೆ.
ಐಸಿಸ್‌ ಸೇರಿ ಸಾವಿಗೀಡಾದ ತನ್ನ ಗಂಡನ ಕುರಿತು ಮಹಿಳೆಯೊಬ್ಬಳು ತನ್ನ ಸಂಬಂಧಿಯೊಬ್ಬರಿಗೆ ಕಳುಹಿಸಿದ ಧ್ವನಿ ಸಂದೇಶ (ಆಡಿಯೋ ಕ್ಲಿಪ್‌) ಇದೀಗ ಪೊಲೀಸರ ವಶದಲ್ಲಿದೆ. ತನ್ನ ಪತಿ ಶಾಜಿಲ್‌ ಇತ್ತೀಚೆಗೆ ‘ಜಿಹಾದಿ ಯುದ್ಧ’ದಲ್ಲಿ ಹತನಾಗಿರುವುದಾಗಿ ಮಹಿಳೆ ಹೇಳುತ್ತಿರುವುದು ಈ ಧ್ವನಿ ಸಂದೇಶದಲ್ಲಿದೆ. ಆಕೆ ತನ್ನ ಇಬ್ಬರು ಮಕ್ಕಳೊಂದಿಗೆ ಈಗಲೂ ಸಿರಿಯಾದಲ್ಲಿದ್ದಾಳೆ ಎಂದು ಮೂಲಗಳು ತಿಳಿಸಿವೆ.
ತನ್ನಂತೆಯೇ ಕೇರಳದ ಹಲವಾರು ಮಹಿಳೆಯರು ಸಿರಿಯಾದಲ್ಲಿ ತಮ್ಮ ಗಂಡಂದಿರು ಮತ್ತು ಮಕ್ಕಳನ್ನು ಕಳೆದುಕೊಂಡಿದ್ದಾರೆ ಎಂದು ಆಕೆ ಹೇಳಿರುವುದು ಈ ಕ್ಲಿಪಿಂಗ್‌ನಲ್ಲಿದೆ. ಶಾಜಿಲ್‌ನ ಸೋದರನಿಂದ ಈ ಧ್ವನಿ ಸಂದೇಶವನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಖಯ್ಯೂಮ್‌ ಎಂಬಾತನಿಂದ ಬಂದ ಇನ್ನೊಂದು ಧ್ವನಿ ಸಂದೇಶವನ್ನೂ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಐಸಿಸ್‌ ಸಮವಸ್ತ್ರದಲ್ಲಿ ಖಯ್ಯೂಮ್‌ನ ಫೋಟೋಗಳು ಇಂಟರ್‌ನೆಟ್‌ನಲ್ಲಿ ಲಭ್ಯವಿವೆ ಎಂದು ಮೂಲಗಳು ಹೇಳಿವೆ.
ಐಸಿಸ್‌ ಜತೆ ಸಂಪರ್ಕ ಹೊಂದಿರುವ ಶಂಕೆಯಲ್ಲಿ ಮೂವರನ್ನು ಅಕ್ಟೋಬರ್‌ 25ರಂದು ಪೊಲೀಸರು ಕಣ್ಣೂರು ಜಿಲ್ಲೆಯಿಂದ ಬಂಧಿಸಿದ್ದಾರೆ. ಈ ಮೂವರು ಕೆಲವು ವರ್ಷಗಳ ಹಿಂದೆ ಜತೆಯಾಗಿಯೇ ಕೇರಳದಿಂದ ಸಿರಿಯಾಗೆ ತೆರಳಿ ಐಸಿಸ್‌ನಿಂದ ತರಬೇತಿ ಪಡೆದು ಬಂದಿದ್ದಾರೆ ಎಂದು ಪೊಲೀಸರು ತಿಳಿಸಿದರು. ಇವರು ಸಿರಿಯಾಗೆ ತೆರಳಿರುವ ವಿಮಾನದ ಟಿಕೆಟ್‌ಗಳು ಮತ್ತು ವೀಸಾ ದಾಖಲೆಗಳ ಪ್ರತಿಗಳನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ. ಬಂಧಿತರನ್ನು ಮಿಥಿಲಾಜ್‌, ಅಬ್ದುಲ್‌ ರಝಾಕ್‌ ಮತ್ತು ರಶೀದ್‌ ಎಂದು ಗುರುತಿಸಲಾಗಿದೆ.
ಕೆಲವು ವರ್ಷಗಳಿಂದೀಚೆಗೆ ಕೇರಳದಿಂದ ಇದ್ದಕ್ಕಿದ್ದಂತೆ ನಾಪತ್ತೆಯಾಗಿ ಐಸಿಸ್‌ ಸೇರಿದ್ದಾರೆ ಎಂದು ಶಂಕಿಸಲಾದ 21 ಮಂದಿಯ ನಾಪತ್ತೆ ಪ್ರಕರಣಗಳ ಬಗ್ಗೆ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ತನಿಖೆ ನಡೆಸುತ್ತಿದೆ. ಈ 21 ಮಂದಿಯ ಪೈಕಿ 17 ಮಂದಿ ಕಾಸರಗೋಡು ಜಿಲ್ಲೆಯವರು, ಉಳಿದ ನಾಲ್ವರು ಪಕ್ಕದ ಪಾಲಕ್ಕಾಡ್‌ ಜಿಲ್ಲೆಯವರಾಗಿದ್ದಾರೆ. ಅವರಲ್ಲಿ ನಾಲ್ವರು ಮಹಿಳೆಯರು ಮತ್ತು ಮೂವರು ಮಕ್ಕಳೂ ಸೇರಿದ್ದಾರೆ.
Comments are closed.