ಟೋಯಿಂಗ್ ವಾಹನದ ಹಿಂಭಾಗ ಜಾನುವಾರು ಕಳೇಬರ ಕಟ್ಟಿ ರಾ. ಹೆದ್ದಾರಿಯಲ್ಲಿ ಎಳೆದೊಯ್ದವರ ವಿರುದ್ಧ ದೂರು ದಾಖಲಿಸಿದ ಹಿಂಜಾವೇ

ಕುಂದಾಪುರ: ಬೈಂದೂರು ತಾಲೂಕಿನ ಶಿರೂರು ಟೋಲ್ ಟೋಯಿಂಗ್ ವಾಹನ (1033) ಸಿಬ್ಬಂದಿಗಳು ಗೋವುಗಳ ಕಳೇಬರವನ್ನು ಟೋಯಿಂಗ್ ವಾಹನಕ್ಕೆ ಕಟ್ಟಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಎಳೆದೊಯ್ದ ಅಮಾನವೀಯ ಘಟನೆಗೆ ಸಂಬಂಧಿಸಿದಂತೆ ಹಿಂದೂ ಜಾಗರಣ ವೇದಿಕೆ ಬೈಂದೂರು ಘಟಕದಿಂದ ಬೈಂದೂರು ಪೊಲೀಸ್ ಠಾಣೆಗೆ ದೂರು ನೀಡಲಾಗಿದೆ.

ಉಡುಪಿ‌ ಜಿಲ್ಲೆ‌ ಬೈಂದೂರು ತಾಲೂಕಿನ ಗಡಿ ಭಾಗವಾದ ಶಿರೂರು ಟೋಲ್ ಫ್ಲಾಜಾ ಬಳಿಯಿಂದ ಮೃತಪಟ್ಟ ಎರಡು‌ ಜಾನುವಾರುಗಳನ್ನು ಟೋಯಿಂಗ್ ವಾಹನಕ್ಕೆ ಕಟ್ಟಿ ಬೈಂದೂರು‌ ಕಡೆಗೆ ಸುಮಾರು 2-3 ಕಿ.ಮೀ ದೂರ ರಸ್ತೆಯಲ್ಲಿ ಎಳೆದು ತರಲಾಗಿದೆ. ಬೇರೊಂದು‌ ವಾಹನದಲ್ಲಿ ತೆರಳುತ್ತಿದ್ದ ವ್ಯಕ್ತಿ ಈ ಅಮಾನವೀಯ ಕೃತ್ಯದ ವಿಡಿಯೋ ರೆಕಾರ್ಡ್ ಮಾಡಿ ಶೇರ್ ಮಾಡಿದ್ದಾರೆ.

ಹಿಂದೂ ಜಾಗರಣ ವೇದಿಕೆ ಈ‌ ಕುಕೃತ್ಯವನ್ನು ಖಂಡಿಸಿದ್ದು ತಪ್ಪಿತಸ್ಥರಿಗೆ ಶಿಕ್ಷೆಯಾಗಬೇಕು ಎಂದು ಬೈಂದೂರು ಠಾಣೆಗೆ ದೂರು ದಾಖಲಿಸಿದ್ದಾರೆ.

ಈ ಸಂದರ್ಭದಲ್ಲಿ ಹಿಂಜಾವೇ ಬೈಂದೂರು ತಾಲೂಕು ಅಧ್ಯಕ್ಷರಾದ ರಾಜೇಶ್ ಬೈಂದೂರು ಪ್ರಶಾಂತ್ ಮೊಯ್ಲಿ, ವೇದನಾಥ್ ಹೇರಂಜಾಲು,ಶಿವರಾಜ್, ದಿನೇಶ್ ಹಾಗೂ ರಾಮ್ ಸೇನೆಯ ಸುಬ್ರಮಣ್ಯ ಉಪಸ್ಥಿತರಿದ್ದರು.