ಪುರುಷರಿಗಾಗಿ ಗರ್ಭ ನಿರೋಧಕ ಮಾತ್ರೆಯ ಮೇಲೆ ಪ್ರಯೋಗ ನಡೆದಿದ್ದು, ಅದು ಯಶಸ್ವಿಯಾಗಿದೆ. ದಿನದಲ್ಲಿ ಒಮ್ಮೆ ತೆಗೆದುಕೊಳ್ಳಲು ಇದು ಸುರಕ್ಷಿತವಾಗಿದೆ ಎಂದು ಹೇಳಲಾಗಿದೆ. ಮಹಿಳೆಯರ ಗರ್ಭ ನಿರೋಧಕ ಮಾತ್ರೆಯಂತೆ ಇದು ಕೂಡ ಕೆಲಸ ಮಾಡುತ್ತದೆ. ಇದು ಪುರುಷರ ಮಾತ್ರೆ ಆಗಿರುವುದರಿಂದ ಪುರುಷ ಹಾರ್ಮೋನ್‌ ಮೇಲೆ ನಿಯಂತ್ರಣ ಸಾಧಿಸಲಿದೆ.
ಹಾರ್ಮೋನ್‌ ಬದಲಾವಣೆ: ಕೆಲವು ಪರಿಮಳಯುಕ್ತ ಎಣ್ಣೆ ದೇಹಕ್ಕೆ ಆಹ್ಲಾದ ನೀಡಬಹುದು. ಮನಸ್ಸನ್ನು ಪ್ರಫುಲ್ಲಗೊಳಿಸಬಹುದು. ಆದರೆ ಅದರಿಂದ ಅಪಾಯವೂ ಇದೆ. ಅದೇನು ಅಂದರೆ ನಿಮ್ಮ ಸಹಜ ದೈಹಿಕ ಚಟುವಟಿಕೆ ಮೇಲೆ ಮಾರಕ ಪರಿಣಾಮ ಬೀರಬಹುದು. ವಿಶೇಷವಾಗಿ ಪುರುಷರು ಲ್ಯಾವೆಂಡರ್‌, ಟೀ ಟ್ರಿ ಆಯಿಲ್‌ನಂತಹ ಸುಗಂಧ ಭರಿತ ಎಣ್ಣೆಯನ್ನು ಬಳಸುವುದರಿಂದ ಹಾರ್ಮೋನ್‌ನ ನೈಸರ್ಗಿಕ ಕ್ರಿಯೆಗೆ ತೊಡಕು ಉಂಟಾಗುತ್ತದೆ ಎಂದು ಎಚ್ಚರಿಸಿದೆ ಸಂಶೋಧನೆ. ರಾಸಾಯನಿಕ ಮಿಶ್ರವಾಗಿರುವ ಸುಗಂಧದ ಎಣ್ಣೆಯ ಬಳಕೆಯಿಂದ ಪುರುಷರಲ್ಲಿ ಗೈನೆಕೊಮಾಸ್ಟಿಯಾ ಸಮಸ್ಯೆ ಕಾಣಿಸಬಹುದು. ಅಂದರೆ ಪುರುಷ ಸ್ತನಗಳ ಹಿಗ್ಗುವಿಕೆ ಎಂದರ್ಥ. ಹಾರ್ಮೋನುಗಳ ಅಸಮತೋಲನದಿಂದ ಉಂಟಾಗುವ ಸಮಸ್ಯೆ.
ಆಹಾರದಲ್ಲಿ ವೈವಿಧ್ಯತೆಯಿರಲಿ: ವಯಸ್ಸಾದಂತೆ ನಿಮ್ಮ ಮಿದುಳಿನ ಆರೋಗ್ಯದ ಕಡೆ ಹೆಚ್ಚು ಗಮನ ನೀಡಬೇಕು. ಇದಕ್ಕೆ ಆಹಾರ ಹಾಗೂ ದೈಹಿಕ ಚಟುವಟಿಕೆಯ ಪ್ರಭಾವ ಇದೆ. ಅಧ್ಯಯನಗಳ ಪ್ರಕಾರ, ಬೆರ್ರಿ, ತಾಜಾ ತರಕಾರಿ ಸೇವಿಸುವುದರ ಜತೆ ಆರೋಗ್ಯಪೂರ್ಣ ಜೀವನಶೈಲಿಯಿಂದ ಮಿದುಳಿನ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು ಎಂದು ಹೇಳಲಾಗಿದೆ. ಅಷ್ಟೆ ಅಲ್ಲ, ಹಣ್ಣು ತರಕಾರಿಗಳ ನಿಯಮಿತ ಸೇವನೆಯಿಂದ ಶ್ವಾಸಕೋಶದ ಕಾರ‍್ಯದಲ್ಲಿ ಯಾವುದೇ ತೊಡಕು ಕಾಣಿಸುವುದಿಲ್ಲ ಹಾಗೂ ರಕ್ತ ಸಂಚಲನೆ ಸರಾಗವಾಗುತ್ತದೆ ಎಂದು ಹೇಳಲಾಗಿದೆ.
ಅನಾರೋಗ್ಯ ಸೂಚಕ
ವೀರ್ಯಾಣುಗಳ ಚಲನೆ ಅಥವಾ ಸಂಖ್ಯೆಯಲ್ಲಿ ಕಡಿಮೆಯಾದರೆ ಗರ್ಭ ಧಾರಣೆಗೆ ತೊಡಕು ಉಂಟಾಗಲಿದೆ ಎಂಬುದನ್ನು ಹೊರತು ಪಡಿಸಿಯೂ ಇತರೇ ಆರೋಗ್ಯ ಸಮಸ್ಯೆಗಳು ಉಂಟಾಗಲಿವೆ ಎಂದು ಎಚ್ಚರಿಸಿದೆ ಇತ್ತೀಚಿನ ಅಧ್ಯಯನ. ವೀರ್ಯಾಣುಗಳ ಸಂಖ್ಯೆಯನ್ನು ಕಡಿಮೆ ಹೊಂದಿರುವ ಪುರುಷರಲ್ಲಿ ಅನಾರೋಗ್ಯ ಕೂಡ ಹೆಚ್ಚಾಗುವ ಸಾಧ್ಯತೆ ಇದೆಯಂತೆ. ಕೊಲಸ್ಟ್ರಾಲ್‌, ಅಧಿಕ ರಕ್ತದೊತ್ತಡ, ಮೂಳೆ ಸಮಸ್ಯೆಯಂತಹ ಸಮಸ್ಯೆಗಳನ್ನು ಹೊಂದಿರುವುದು ಕಂಡುಬಂದಿದೆ.
ಗರ್ಭಿಣಿಯರಿಗೆ ದಂತ ಆರೋಗ್ಯ ಮುಖ್ಯ: ಗರ್ಭ ಧಾರಣೆ ಅವಧಿಯಲ್ಲಿ ನಿಮ್ಮ ಹಲ್ಲಿನ ಆರೋಗ್ಯದ ಬಗ್ಗೆ ಸೂಕ್ತ ಗಮನ ಹರಿಸದಿದ್ದರೆ ಅದು ನಿಮ್ಮ ಮಗುವಿನ ಮೇಲೆ ಮಾರಕ ಪರಿಣಾಮ ಬೀರಬಹುದು ಎಂದು ಎಚ್ಚರಿಸಿದೆ ಇತ್ತೀಚಿನ ಸಂಶೋಧನೆ. ಗರ್ಭಾವಸ್ಥೆಯಲ್ಲಿ ಮಹಿಳೆ ಮಾನಸಿಕವಾಗಿ ಹಾಗೂ ದೈಹಿಕವಾಗಿ ಎಷ್ಟು ಕೇರ್‌ ತೆಗೆದುಕೊಳ್ಳುತ್ತಾಳೋ ಅಷ್ಟು ಹುಟ್ಟುವ ಮಗು ಕೂಡ ಆರೋಗ್ಯವಾಗಿರುತ್ತದೆ ಎಂದು ಸಾಮಾನ್ಯವಾಗಿ ನಂಬಲಾಗುತ್ತದೆ. ಇದೀಗ ಗರ್ಭಿಣಿಯ ಮೌಖಿಕ ಆರೋಗ್ಯದ ಮೇಲೆ ಸಂಶೋಧನೆ ನಡೆದಿದ್ದು, ಗರ್ಭಾವಸ್ಥೆಯಲ್ಲಿ ಮೌಖಿಕ ಆರೋಗ್ಯವನ್ನು ನಿರ್ಲಕ್ಷಿಸಿದವರಿಗೆ ಜನಿಸಿದ ಮಗುವಿನಲ್ಲಿ ಹಲ್ಲಿಗೆ ಸಂಬಂಧಿಸಿದ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಹೆಚ್ಚು ಎನ್ನಲಾಗಿದೆ.
Comments are closed.