* ಅನುರಾಧಾ ಚೌಧರಿ
* ವಿರಾಟ್ ಕೊಹ್ಲಿ ನಿಮ್ಮ ಕಡೆ ನೋಡಿ ಫ್ಲೈಯಿಂಗ್ ಕಿಸ್ ಕೊಟ್ಟಾಗ ಅದು ದೊಡ್ಡ ಸುದ್ದಿಯಾಗುತ್ತದೆ ಅಲ್ವೇ? – ಹ್ಞಾಂ.. ಹೌದು..
* ಈ ರೀತಿ ಸಾರ್ವಜನಿಕವಾಗಿ ಪ್ರೀತಿಯನ್ನು ಪ್ರದರ್ಶಿಸಿದಾಗ ಬೇರೆ ಯಾರೇ ಸಾಮಾನ್ಯ ಹುಡುಗಿಯಾದರೂ ಪ್ರತಿಕ್ರಿಯಿಸಬಹುದು. ಆದರೆ, ಒಬ್ಬ ನಟಿಯಾಗಿ ನಿಮಗೆ ಅದು ಸಾಧ್ಯವಾಗುತ್ತಿಲ್ಲ ಅಂತ ಬೇಜಾರಾಗುತ್ತಾ? – ಇಲ್ಲ.. ನಂಗೆ ಸ್ವಲ್ಪ ಮುಜುಗರ ಆಗುತ್ತೆ. ನನ್ನ ತಮ್ಮ ನಂಗೆ ಯಾವಾಗಲೂ ತಮಾಷೆ ಮಾಡ್ತಾನೆ. ಅದು ಸ್ಟೇಡಿಯಂ ಅಲ್ವಾ? ಜನ ತಿರುಗಿ ನನ್ನ ಕಡೆ ನೋಡ್ತಾರೆ.. ನಂಗೆ ನಾಚಿಕೆ ಆಗ್ತದೆ.
* ನೀವು ವಿರಾಟ್ ಕೊಹ್ಲಿ ಜತೆಗಿನ ಸಂಬಂಧದ ಬಗ್ಗೆ ಸದಾ ಮೌನವಾಗಿಯೇ ಇರ್ತೀರಿ.. – ನಾನ್ಯಾಕೆ ಮಾತಾಡಲ್ಲ ಅಂತ ಹೇಳ್ತೀನಿ.. ನೀವು ನಿಮ್ಮ ಸಂಬಂಧದ ಬಗ್ಗೆ ಸಾರ್ವಜನಿಕವಾಗಿ ಮಾತನಾಡಿದಾಗ ಅದು ಮೌಲ್ಯ ಕಳೆದುಕೊಂಡು, ತನ್ನ ಪಾವಿತ್ರ್ಯತೆ ಕಳೆದುಕೊಳ್ಳುತ್ತೆ. ಈಗ ನೀವು ನಿಮ್ಮ ಸಂಬಂಧದ ಬಗ್ಗೆ ನನ್ನ ಜತೆ ಮಾತ್ರ ಹೇಳಿಕೊಳ್ಳುತ್ತೀರಿ. ಅದನ್ನು ನಾನು ಮಾತ್ರ ಕೇಳಿಸಿಕೊಳ್ತೇನೆ. ಒಂದು ವೇಳೆ ನಾನು ಅದನ್ನು ಫೇಸ್ ಬುಕ್‌ನಲ್ಲಿ ಬಹಿರಂಗಗೊಳಿಸಿದರೆ ಹೇಗಿರುತ್ತದೆ? ಅದಕ್ಕಾಗಿಯೇ ನಾನು ಪ್ರೀತಿ ಬಗ್ಗೆ ಹೇಳ್ಕೊಳ್ಳೊದಿಲ್ಲ. ಇಂಡಿಯಾ ಟೀಮ್‌ಗೆ ಏನು ವಿಷ್ ಮಾಡ್ತೀರಿ ಅನ್ನೋ ಪ್ರಶ್ನೆಗೂ ನಾನು ಉತ್ತರ ಕೊಡೋಲ್ಲ.. ಯಾಕೆಂದರೆ, ಅದೆಲ್ಲ ಹೈಸ್ಕೂಲ್ ಮಟ್ಟದ ವರ್ತನೆ ಅನಿಸುತ್ತೆ ನನಗೆ.
* ಹಾಲಿವುಡ್‌ನಲ್ಲಿ ಪ್ಯಾಪರಜಿ ಸಂಸ್ಕೃತಿ ಜೋರಾಗಿದೆ. ಆದರೂ ಅಲ್ಲಿನ ತಾರೆಯರು ತಮ್ಮ ಸಂಬಂಧಗಳ ಬಗ್ಗೆ ಮುಕ್ತವಾಗಿರುತ್ತಾರಲ್ಲಾ? ಅವರು ಅಂತ ಮೂರ್ಖ ಪ್ರಶ್ನೆಗಳನ್ನು ಕೇಳೊಲ್ಲ. ನಮಗೆ ಒಬ್ಬನ ಮುಕ್ತತೆಯನ್ನು ಹೇಗೆ ಹ್ಯಾಂಡಲ್ ಮಾಡ್ಬೇಕು ಅನ್ನೋದು ಗೊತ್ತಿಲ್ಲ. ದೀಪಿಕಾ ಪಡುಕೋಣೆ ತಮ್ಮ ಖಿನ್ನತೆಯ ಬಗ್ಗೆ ಹೇಳಿಕೊಂಡಾಗ ಅದೆಷ್ಟೋ ಜನ ಅದೆಷ್ಟೋ ಕಥೆ ಕಟ್ಟಿದರು. ಒಂದು ಒಳ್ಳೆಯ ಉದ್ದೇಶಕ್ಕಾಗಿ ದೀಪಿಕಾ ತಮ್ಮ ಸಮಸ್ಯೆಯನ್ನು ಹೇಳಿಕೊಂಡಾಗ ಅದರಲ್ಲೊಂದು ಸಭ್ಯತೆ ಮತ್ತು ಡಿಗ್ನಿಟಿ ಇತ್ತು. ಆದರೆ, ಕೆಲವರು ರಣವೀರ್ ಕೂಡ ಖಿನ್ನತೆಗೆ ಒಳಗಾಗಿದ್ದ ಎಂದೆಲ್ಲ ಸುಳ್ಳೇ ಕಥೆ ಹೆಣೆದರು. ಮುಕ್ತವಾಗಿರುವ ವಿಷಯದಲ್ಲಿ ನನಗೆ ಸಮಸ್ಯೆ ಇದೆ ಎಂದು ನೀವು ಯೋಚಿಸಬಹುದು. ನಾನು ವಿರಾಟ್ ಜತೆ ಡೇಟಿಂಗ್ ಮಾಡ್ತಿಲ್ಲ ಅಂತ ನಾನು ಹೇಳ್ತಿಲ್ಲ. ನಾನು ಡೇಟಿಂಗ್ ಮಾಡ್ತಿದ್ದೇನೆ. ಆದರೆ, ನಾನ್ಯಾಕೆ ಅದರ ಬಗ್ಗೆ ಹೇಳಿಕೊಳ್ಳೊಲ್ಲ ಎಂದರೆ ನೀವು ಅದರ ಪಾವಿತ್ರ್ಯತೆಯನ್ನು ಗೌರವಿಸೊಲ್ಲ. ಜನ ನಮ್ಮ ಖಾಸಗಿ ಬದುಕನ್ನು ಗೌರವಿಸಿದರೆ ನಾವು ಮುಕ್ತರಾಗಿರಬಹುದು. ನಾನು ವಿರಾಟ್ ಜತೆ ಡೇಟಿಂಗ್ ಮಾಡ್ತೇನೆ ಅಂತ ಹೇಳಿದ್ದೇನೆ. ಆದರೆ, ನೀವು ಮೊದಲು ಭೇಟಿ ಮಾಡಿದ್ದೆಲ್ಲಿ? ಹೇಗೆ ಭೇಟಿ ಮಾಡಿದಿರಿ? ಮೊದಲ ಭೇಟಿಯಲ್ಲಿ ಏನಾಯಿತು ಅಂತೆಲ್ಲ ಕೇಳಿದರೆ ಉತ್ತರಿಸಬೇಕಾ? ಪತ್ರಿಕೆಯವರು, ಟಿವಿಯವರು ಎಲ್ಲರೂ ಇದೇ ಪ್ರಶ್ನೆ ಕೇಳ್ತಾರೆ.. ಅರ್ಥವಿದೆಯಾ ಇದಕ್ಕೆಲ್ಲ?
* ನಿಮ್ಮ ಮೇಲೆ ನಿರಂತರ ನಿಗಾ ಇರುವುದರಿಂದ ಸಂಬಂಧದಲ್ಲಿ ಕಿರಿಕಿರಿ ಆಗ್ತಿದೆಯಾ? ನಂಗೆ ಬೆನ್ನು ನೋವಿನ ಪ್ರಾಬ್ಲಂ ಇತ್ತು. ಹಾಗಾಗಿ, ಮುಂಬಯಿಯ ಕೋಕಿಲಾ ಬೆನ್ ಆಸ್ಪತ್ರೆಯಲ್ಲಿ ಫಿಸಿಯೋಥೆರಪಿಸ್ಟ್ ಹತ್ರ ಹೋಗ್ತಾ ಇದ್ದೆ. ಯಾರೋ ನಾನು ಕಾರಿನಿಂದ ಇಳಿಯೋ ಫೋಟೋ ತೆಗೆದರು. ಈಗ ಅವರು, ನಂಗೆ ಆಸ್ಟ್ರೇಲಿಯಾಕ್ಕೆ ಹೋಗಿ ಬಂದ ಮೇಲೆ ಬೆನ್ನು ನೋವು ಸ್ಟಾರ್ಟ್ ಆಗಿದೆ ಎಂದು ಸುದ್ದಿ ಮಾಡುತ್ತಿದ್ದಾರೆ. ಇದೆಲ್ಲ ಏನು? ಇದೇ ತರ ಒಬ್ಬ ನಟನಿಗೆ ಮಾಡೋಲ್ಲ. ಯಾಕೆಂದರೆ, ಅವರಿಗೆಲ್ಲ ನಟಿಯರ ಬಗ್ಗೆ ಗೌರವಿಲ್ಲ. ಖಾಸಗಿ ವಿಷಯಗಳೇ ಅವರಿಗೆ ಆಸಕ್ತಿಕರ. ಹಾಗಾಗಿ ನಾನು ಮಾತಾಡೋಲ್ಲ.
* ಇದರಿಂದ ನಿಮಗಿಬ್ಬರಿಗೂ ತೊಂದರೆ ಆಗ್ತಿದೆಯಾ? ಇಲ್ಲ. ನಾವಿಬ್ಬರೂ ಎಲ್ಲದರಿಂದಲೂ ಮುಕ್ತವಾಗಿದ್ದೇವೆ. ವಿರಾಟ್ ಮತ್ತು ನಾನು ಇಬ್ಬರೂ ಸ್ಟ್ರಾಂಗ್ ಆಗಿದ್ದೇವೆ. ಆದರೂ ಈ ಕಿರಿಕಿರಿಗಳು ಕೆಲಸದ ಮೇಲೆ ಪರಿಣಾಮ ಬೀರುತ್ತವೆ. ಅವನು ಕೆಲಸದ ಮೇಲೆ ಫೋಕಸ್ ಮಾಡಲು ಬಯಸುತ್ತಾನೆ. ಆದರೆ, ಮೀಡಿಯಾದಲ್ಲಿ ಬರೋದೇ ಬೇರೆ. ಅವನು ಒಳ್ಳೆ ಸ್ಕೋರ್ ಮಾಡಿದರೆ ಅದಕ್ಕೆ ಕಾರಣ ನಾನು ಅಂತಾರೆ… ಚೆನ್ನಾಗಿ ಆಡದಿದ್ದರೂ ಕಾರಣ ನಾನು ಅಂತಾರೆ. ಎಲ್ಲದಕ್ಕೂ ನನ್ನ ಮೇಲೆಯೇ ಆರೋಪ ಮಾಡಲಾಗುತ್ತಿದೆ. ಇದುವೇ ನನಗೆ ಅರ್ಥವಾಗದಿರುವಂತಹದ್ದು. ಆದರೆ, ಇದ್ಯಾವುದೂ ನಮ್ಮ ಸಂಬಂಧವನ್ನು ಹಾಳು ಮಾಡಲಾರದು. ನಾವು ಒಂದೇ ರೀತಿಯ ಮನೋಸ್ಥಿತಿಯವರಲ್ಲದೆ ಹೋಗಿದ್ದರೆ ಜತೆಗಿರುವುದು ಸಾಧ್ಯವೇ ಇರುತ್ತಿರಲಿಲ್ಲ. ಇಂಗ್ಲೆಂಡ್ ಟೂರ್‌ನ ಸಂದರ್ಭ ಆದ ಘಟನೆಗಳು ವಿರಾಟ್ ಮೇಲೆ ತುಂಬ ಪರಿಣಾಮ ಬೀರಿತು. ನಾವು ಅದಕ್ಕೆ ಸಿದ್ಧವಾಗಿರಲಿಲ್ಲ. ನಂತರ ನಮಗೇ ಗೊತ್ತಾಯಿತು.. ನಾವು ಇಂಥ ಮೂರ್ಖತನಕ್ಕೆಲ್ಲ ಪ್ರತಿಕ್ರಿಯಿಸಬಾರದು ಅಂತ. ಅದಾದ ಬಳಿಕ ಏನೇ ಬಂದರೂ ಎದುರಿಸುವ ತಾಕತ್ತನ್ನು ಇಬ್ಬರೂ ಮೈಗೂಡಿಸಿಕೊಂಡಿದ್ದೇವೆ.
