ಬಿಗ್ ಬಾಸ್ ಕನ್ನಡ ಸೀಸನ್ 8 ರಿಯಾಲಿಟಿ ಶೋ ಆರಂಭವಾಗಿ ಒಂದು ವಾರ ಕಳೆದಿದೆ. ಮನೆಯೊಳಗೆ ಹೋಗಿರುವ 17 ಸ್ಪರ್ಧಿಗಳಲ್ಲಿ ಯಾರ ಮೊದಲ ವಾರ ಎಲಿಮಿನೇಷನ್‌ ಆಗಲಿದ್ದಾರೆ ಎಂಬ ಬಗ್ಗೆ ತೀವ್ರ ಕುತೂಹಲ ಇರುವುದು ಸಹಜ. ಇದೀಗ ಮೊದಲ ವಾರದ ಎಲಿಮಿನೇಷನ್‌ ಪ್ರಕ್ರಿಯೆ ನಡೆದಿದ್ದು, ಧನುಶ್ರೀ ಮನೆಯಿಂದ ಹೊರಬಂದಿದ್ದಾರೆ.
ಈ ವಾರದ ಫೈನಲ್ ನಾಮಿನೇಷನ್ ಪಟ್ಟಿಯಲ್ಲಿ ಶುಭಾ ಪೂಂಜಾ, ಧನುಶ್ರೀ, ರಘು ಗೌಡ, ವಿಶ್ವನಾಥ್‌ ಹಾವೇರಿ, ನಿರ್ಮಲಾ ಚೆನ್ನಪ್ಪ ಹೆಸರು ಇದ್ದವು. ಆದರೆ, ಈ ಐವರಲ್ಲಿ ಶುಭಾ ಮತ್ತು ವಿಶ್ವ ಮೊದಲೇ ಸೇಫ್ ಆಗಿದ್ದರು. ಅಂತಿಮವಾಗಿ ಉಳಿದುಕೊಂಡಿದ್ದು ರಘು, ಧನುಶ್ರೀ ಮತ್ತು ನಿರ್ಮಲಾ ಚೆನ್ನಪ್ಪ. ಇದೀಗ ಈ ಮೂವರಲ್ಲಿ ಧನುಶ್ರೀ ಎಲಿಮಿನೇಷನ್‌ ಆಗಿ, ಮನೆಯಿಂದ ಹೊರಬಿದ್ದಿದ್ದಾರೆ. ಟಿಕ್ ಟಾಕ್ ವಿಡಿಯೋಗಳ ಮೂಲಕ ಜನಪ್ರಿಯತೆ ಗಳಿಸಿದ್ದ ಧನುಶ್ರೀ, ಶೋನಿಂದ ಹೊರಬಂದಿದ್ದಾರೆ.
ಶೋಗೆ ಮೊದಲ ಸ್ಪರ್ಧಿಯಾಗಿ ಎಂಟ್ರಿ ಕೊಟ್ಟವರು ಧನುಶ್ರೀ. ಆದರೆ, ಇಂದು ಅವರೇ ಮೊದಲು ಶೋನಿಂದ ಹೊರಬಂದಿದ್ದು ವಿಪರ್ಯಾಸ! ಧನುಶ್ರೀ ಆರಂಭದಿಂದಲೂ ಟಾಸ್ಕ್‌ಗಳಲ್ಲಿ ಅಷ್ಟೇನು ಉತ್ತಮವಾಗಿ ಪ್ರದರ್ಶನ ನೀಡಿರಲಿಲ್ಲ. ನಾಮಿನೇಷನ್ನಿಂದ ತಪ್ಪಿಸಿಕೊಳ್ಳಲು ಅವರಿಗೆ ಎರಡು ಬಾರಿ ಬಿಗ್ ಬಾಸ್ ಚಾನ್ಸ್ ನೀಡಿತ್ತು. ಅಲ್ಲಿಯೂ ಫೇಲ್ ಆಗಿಬಿಟ್ಟರು ಅವರು! ಕೊನೆಗೆ ಅವರ ಪರ್ಫಾಮೆನ್ಸ್ ತುಂಬ ಕಳಪೆ ಎಂದು ತಿರ್ಮಾನಿಸಿ, ಒಂದು ದಿನ ಜೈಲಿನಲ್ಲಿಯೂ ಇರಿಸಲಾಗಿತ್ತು! ಟಿಕ್ ಟಾಕ್ ವಿಡಿಯೋಗಳ ಮೂಲಕ ಎಲ್ಲರನ್ನು ರಂಜಿಸಿದ್ದ ಧನುಶ್ರೀ, ಬಿಗ್ ಬಾಸ್ ಶೋನಲ್ಲಿ ರಂಜಿಸುವಲ್ಲಿ ವಿಫಲವಾದರು. ಒಂದೇ ವಾರಕ್ಕೆ ಆಟ ಮುಗಿಸಿ, ಹೊರಬಂದಿದ್ದಾರೆ.
ಇನ್ನು, ಇತ್ತ ಧನುಶ್ರೀ ಎಲಿಮಿನೇಷನ್‌ ಆಗಿ ಮನೆಯಿಂದ ಹೊರಬರುತ್ತಿದ್ದಂತೆಯೇ, ನಾಮಿನೇಷನ್ ಪಟ್ಟಿಯಲ್ಲಿದ್ದ ನಿರ್ಮಲಾ ಚೆನ್ನಪ್ಪ ಮತ್ತು ರಘು ಗೌಡ ನಿಟ್ಟುಸಿರು ಬಿಟ್ಟಿದ್ದಾರೆ! ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಎಂಟರ್‌ಟೇನ್‌ಮೆಂಟ್ ನೀಡುತ್ತಿದ್ದ ರಘು, ಯಾಕೋ ಶೋನಲ್ಲಿ ಅಷ್ಟೇನು ಅಗ್ರೇಸ್ಸಿವ್ ಆಗಿ ಆಡುತ್ತಿಲ್ಲ ಎಂಬ ಮಾತುಗಳು ಕೇಳಿಬಂದಿದ್ದವು. ಹಾಗಾಗಿ, ಅವರೇ ಈ ಬಾರಿ ಮನೆಯಿಂದ ಹೊರಬರುವ ಸ್ಪರ್ಧಿ ಎಂಬ ಚರ್ಚೆ ಶುರುವಾಗಿತ್ತು. ಅಂತಿಮವಾಗಿ ಅವರು ಸೇಫ್ ಆಗಿದ್ದಾರೆ!
Comments are closed.