ಮುಂಬೈ: ನನ್ನ ನೂತನ ಮ್ಯೂಸಿಕ್ ವಿಡಿಯೋಗೆ ಕೆಟ್ಟ ಕಾಮೆಂಟ್ಗಳು ಹರಿದುಬರುತ್ತಿವೆ ಎಂದು ಬಾಲಿವುಡ್ ಗಾಯಕಿ ಸೋನಾ ಮೋಹಪತ್ರ ಆರೋಪಿಸಿದ್ದಾರೆ.
ಈ ಬಗ್ಗೆ ಟ್ವೀಟ್ ಮಾಡಿರುವ ಸೋನಾ, ನನ್ನ ಇತ್ತೀಚಿನ ಮ್ಯೂಸಿಕ್ ವಿಡಿಯೋಗೆ ಅನೇಕ ಕೆಟ್ಟ ಕಾಮೆಂಟ್ಗಳು ಬರುತ್ತಿವೆ. ಕಾಮೆಂಟ್ಗಳು ನನ್ನ ಮೀಟೂ ಆರೋಪದ ಬಗ್ಗೆ ಸಂಶಯ ವ್ಯಕ್ತಪಡಿಸುವ ರೀತಿಯಲ್ಲಿವೆ. ಅಲ್ಲದೆ, ನಾನು ತುಂಬಾ ಅಶ್ಲೀಲ ಉಡುಗೆಯನ್ನು ತೊಡುತ್ತೇನೆಂದು ಪರಿಗಣಿಸಿರುವ ನೆಟ್ಟಿಗರು, ತನ್ನೊಂದಿಗೆ ಪುರುಷರು ಅಶ್ಲೀಲವಾಗಿ ವರ್ತಿಸುವುದನ್ನು ಇಷ್ಟಪಡುವಂತಹ ಮಹಿಳೆ ಎಂದಿದ್ದಾರೆ. ಅಲ್ಲದೆ, ಈವರೆಗೂ ನಾನು ಹೇಳಿರುವುದು ಸುಳ್ಳೆಂದು ನಂಬಿರುವುದಾಗಿ ಕಾಮೆಂಟ್ಗಳು ಬಂದಿವೆ ಎಂದು ಸೋನಾ ತಿಳಿಸಿದ್ದಾರೆ.
ಇನ್ನು ಕಳೆದ ತಿಂಗಳಲ್ಲಿ ಸೋನಾ #INeverAskForIt (ನೆವರ್ ಆಸ್ಕ್ ಫೊರ್ಲ್ಟ್) ಅಭಿಯಾನಕ್ಕೆ ಸಾಥ್ ನೀಡಿದ್ದರು. ಈ ಅಭಿಯಾನದಡಿಯಲ್ಲಿ ಲೈಂಗಿಕ ದೌರ್ಜನ್ಯಕ್ಕೆ ಒಳಗಾದ ಸಂತ್ರಸ್ತೆಯರ ವಿರುದ್ಧವೇ ಜನರು ಮಾತನಾಡಿದ ಅನುಭವ ಹಂಚಿಕೊಳ್ಳಲು ಹೇಳಿದ್ದರು. ಅಲ್ಲದೆ, ಕಾಲೇಜು ದಿನಗಳಲ್ಲಿ ತನಗಾದ ಅನುಭವವನ್ನು ಟ್ವೀಟ್ ಮೂಲಕ ತಿಳಿಸಿದ್ದರು.
ಸಾಮಾನ್ಯವಾಗಿ ಲೈಂಗಿಕ ದೌರ್ಜನ್ಯವಾದಾಗ ಆ ಸಮಯದಲ್ಲಿ ಯಾವ ಉಡುಗೆ ಧರಿಸಿದ್ದೆ ಎಂದು ಸಂತ್ರಸ್ತರನ್ನು ಕೇಳುತ್ತಾರೆ. ಅಂದರೆ, ಸಂತ್ರಸ್ತೆಯನ್ನೇ ದೂಷಿಸುತ್ತಾರೆ. ಇದೇ ವಿಚಾರದಲ್ಲಿ ಟ್ವೀಟ್ ಮಾಡಿದ್ದ ಸೋನಾ, ನಾನು ಬಿಟೆಕ್ ಇಂಜಿನಿಯರಿಂಗ್ ವಿದ್ಯಾರ್ಥಿನಿಯಾಗಿದ್ದ ಸಮಯದಲ್ಲಿ ಒಮ್ಮೆ ಮೈಕ್ರೋಪ್ರೊಸೆಸ್ಸರ್ ಲ್ಯಾಬ್ಗೆ ಹೋಗುತ್ತಿದ್ದೆ. ದೊಗಲವಾದ ಹಸಿರು ಖಾದಿ ಕುರ್ತಾ ಜತೆಗೆ ಸಲ್ವಾರ್ ತೊಟ್ಟಿದ್ದೆ. ಈ ವೇಳೆ ನಮ್ಮ ಸೀನಿಯರ್ ಶಿಳ್ಳೆ ಹೊಡೆಯುತ್ತಾ ನನ್ನ ಬ್ರಾ ಸೈಜ್ ಬಗ್ಗೆ ಜೋರಾಗಿ ಮಾತನಾಡುತ್ತಿದ್ದರು. ಈ ವೇಳೆ ಹಿತೈಶಿ ಒಬ್ಬರು ನನ್ನ ಬಳಿ ಬಂದರು. ಏಕೆ, ನನ್ನ ಸ್ತನಗಳು ಸಂಪೂರ್ಣ ಮುಚ್ಚಿರುವಂತೆ ನಾನು ದುಪ್ಪಟ್ಟವನ್ನು ಸರಿಯಾಗಿ ಧರಿಸಿಲ್ವಾ ಎಂದು ನನ್ನನ್ನೇ ದೂರಿದ್ದರು ಎಂದು ಸೋನಾ ತಿಳಿಸಿದ್ದರು.
ಮತ್ತೊಂದು ಟ್ವೀಟ್ನಲ್ಲಿ ವಿಕ್ಟಿಮ್ ಬ್ಲೇಮಿಂಗ್ (ಬಲಿಪಶುವನ್ನೇ ದೂಷಿಸುವುದು) ಅನುಭವವನ್ನು ಶೇರ್ ಮಾಡಿಕೊಳ್ಳಿ ಎಂದು ಬಾಲಿವುಡ್ ನಟಿ, ಸೋನಮ್ ಕಪೂರ್, ಗಾಯಕಿ ಚಿನ್ಮಯಿ ಶ್ರೀಪಾದ ಮತ್ತು ಇತರೆ ಸೆಲಿಬ್ರೆಟಿಗಳಿಗೆ ಸೋನಾ ಟ್ಯಾಗ್ ಮಾಡಿದ್ದರು. ನೀವು ಲೈಂಗಿಕ ಕಿರುಕುಳಕ್ಕೆ ಒಳಗಾದ ನೀವು ಧರಿಸಿದ್ದ ಬಟ್ಟೆ ಯಾವುದು ಎಂಬುದನ್ನು ನೆನೆಪಿಸಿಕೊಂಡು ವಿಕ್ಟಿಮ್ ಬ್ಲೇಮಿಂಗ್ ಗಮನಕ್ಕೆ ತನ್ನಿ ಎಂದಿದ್ದರು.
ಇನ್ನು ಮೀಟೂ ಆರೋಪದ ವಿಚಾರಕ್ಕೆ ಬರುವುದಾದರೆ ಸೋನಾ ಅವರು ಅನು ಮಲಿಕ್ ಮತ್ತು ಕೈಲಾಶ್ ಖೇರ್ ಸೇರಿದಂತೆ ಕೆಲವರ ವಿರುದ್ಧ ಲೈಂಗಿಕ ಕಿರುಕುಳ ಆರೋಪ ಮಾಡಿದ್ದಾರೆ.
Comments are closed.