ಸಿನಿಮಾ ಇಂಡಸ್ಟ್ರಿ ಸ್ತಬ್ಧವಾಗಿದೆ. ಸಿನಿಮಾ ಶೂಟಿಂಗ್ ಶುರುವಾದರೂ ಮೊದಲಿನ ರೀತಿಯಲ್ಲಿ ಕೆಲಸಗಳು ನಡೆಯುತ್ತಿಲ್ಲ. ಜತೆಗೆ ಬಿಡುಗಡೆ ವಿಚಾರವಂತೂ ಸದ್ಯಕ್ಕಿಲ್ಲ. ಅಲ್ಲೊಂದು ಇಲ್ಲೊಂದು ಸಿನಿಮಾ ಶೂಟಿಂಗ್ ಶುರುವಾದರೂ, ಮುನ್ನೆಚ್ಚರಿಕಾ ಕ್ರಮಗಳ ನಡುವೆಯೇ ಭಯದಲ್ಲಿಯೇ ಚಿತ್ರೀಕರಣ ಮಾಡಿಕೊಳ್ಳಲಾಗುತ್ತಿದೆ. ಇದರಿಂದ ನಿರ್ಮಾಪಕರಿಗೆ ಸಹಜವಾಗಿ ಹೊರೆಯಾಗುತ್ತಿದೆ. ಆ ಹೊರೆಯನ್ನು ತಪ್ಪಿಸುವ ನಿಟ್ಟಿನಲ್ಲಿ ಸಿನಿಮಾ ಕಲಾವಿದರು, ಸಂಭಾವನೆಯನ್ನು ಕಡಿತಗೊಳಿಸಿಕೊಳ್ಳುತ್ತಿದ್ದಾರೆ. ಇದೀಗ ನಾಯಕಿಯರೂ ಆ ಕೆಲಸಕ್ಕೆ ಮುಂದಾಗಿದ್ದಾರೆ.
ಈಗಾಗಲೇ ಚಿರಂಜೀವಿ ನಟಿಸಲಿರುವ ಆಚಾರ್ಯ ಚಿತ್ರದಲ್ಲಿ ನಾಯಕಿಯಾಗಿ ಆಯ್ಕೆಯಾಗಿರುವ ನಟಿ ಕಾಜಲ್ ಅಗರ್ವಾಲ್, ಚಿತ್ರಕ್ಕಾಗಿ ಪಡೆಯಬೇಕಿದ್ದ ಸಂಭಾವನೆಯಲ್ಲಿ ಒಂದಷ್ಟು ಪ್ರಮಾಣವನ್ನು ಕಡಿತ ಮಾಡಿಕೊಂಡಿದ್ದಾರೆ ಎಂದು ಸುದ್ದಿ ಹರಿದಾಡಿತ್ತು. ಆ ಬಗ್ಗೆ ಸ್ವತಃ ನಟಿ ಕಾಜಲ್ ಎಲ್ಲಿಯೂ ಹೇಳಿಕೊಂಡಿರಲಿಲ್ಲ. ಇದೀಗ ಅದೇ ಪರಿಸ್ಥಿತಿ ಕಮಲ್ ಹಾಸನ್ ಚಿತ್ರಕ್ಕೂ ಒದಗಿ ಬಂದಿದೆ.
ಅಂದರೆ, ಶಂಕರ್ ನಿರ್ದೇಶನದಲ್ಲಿ ಮೂಡಿಬರಲಿರುವ ಇಂಡಿಯನ್ 2 ಚಿತ್ರದಲ್ಲಿ ಕಾಜಲ್ ಮತ್ತು ರಾಕುಲ್ ಪ್ರೀತ್ ಸಿಂಗ್ ನಾಯಕಿಯರಾಗಿ ನಟಿಸಲಿದ್ದಾರೆ. ಇದೀಗ ಇದೇ ಚಿತ್ರಕ್ಕಾಗಿ ಈ ಇಬ್ಬರು ನಟಿಯರು ಸಂಭಾವನೆಯನ್ನು ಕಡಿತ ಮಾಡಿಕೊಳ್ಳಲಿದ್ದಾರೆ ಎಂಬ ಸುದ್ದಿಯೂ ಹರಿದಾಡುತ್ತಿದೆ. ಒಂದು ವೇಳೆ ಇದು ನಿಜವಾಗಿದ್ದೇ ಆದರೆ, ನಿರ್ಮಾಪಕರು ಮತ್ತಷ್ಟು ನಿರಾಳರಾಗಲಿದ್ದಾರೆ. ಜತೆಗೆ ಇನ್ನುಳಿದ ಸಿನಿಮಾ ಕಲಾವಿದರು ಇದನ್ನು ಅಳವಡಿಸಿಕೊಳ್ಳುವ ಸಾಧ್ಯತೆ ಇದೆ.
ಲೈಕಾ ಸಂಸ್ಥೆ ಇಂಡಿಯನ್ 2 ಸಿನಿಮಾ ನಿರ್ಮಾಣ ಮಾಡುತ್ತಿದ್ದು, ಕರೊನಾ ಹಾವಳಿ ಕಡಿಮೆಯಾಗುತ್ತಿದ್ದಂತೆ ಚಿತ್ರೀಕರಣಕ್ಕೆ ಚಾಲನೆ ಸಿಗುವ ಸಾಧ್ಯತೆ ಇದೆ. 1996ರಲ್ಲಿ ತೆರಕಂಡಿದ್ದ ಇಂಡಿಯನ್ ಚಿತ್ರದ ಸೀಕ್ವೆಲ್ ಆಗಿ ಇಂಡಿಯನ್ 2 ಸಿದ್ಧವಾಗುತ್ತಿದೆ.
Comments are closed.