ಹಿಂದಿ ಮಾತ್ರವಲ್ಲದೆ ಬೆಂಗಾಲಿ ಸಿನಿಮಾಗಳಲ್ಲೂ ಮಿಂಚಿದವರು ನಟಿ ರಿಯಾ ಸೇನ್‌. 16ನೇ ವಯಸ್ಸಿನಲ್ಲಿಯೇ ಅವರು ಬಣ್ಣದ ಲೋಕಕ್ಕೆ ಕಾಲಿಟ್ಟು ಖ್ಯಾತಿ ಪಡೆದರು. ಆದರೆ ಅಂದುಕೊಂಡ ರೀತಿಯಲ್ಲಿ ಅವರ ವೃತ್ತಿಜೀವನ ಮುಂದುವರಿಯಲಿಲ್ಲ. ನಂತರ ಅವರಿಗೆ ಅವಕಾಶಗಳೂ ಕಡಿಮೆ ಆದವು. ಅದಕ್ಕೆ ಕಾರಣ ಏನು ಎಂಬುದನ್ನು ರಿಯಾ ಸೇನ್‌ ಬಹಿರಂಗ ಪಡಿಸಿದ್ದಾರೆ.
1998ರಲ್ಲಿ ಬಂದ ಫಲ್ಗುಣಿ ಪಾಠಕ್‌ ಅವರ ‘ಯಾದ್‌ ಪಿಯಾ ಕಿ ಆನೇ ಲಗಿ…’ ಹಾಡಿನ ಮೂಲಕ ರಿಯಾಗೆ ದೊಡ್ಡ ಮಟ್ಟದ ಜನಪ್ರಿಯತೆ ಸಿಕ್ಕಿತು. ನಂತರ ಅವರಿಗೆ ಬಾಲಿವುಡ್‌ನಲ್ಲಿ ಹಲವು ಅವಕಾಶಗಳು ಹರಿದುಬರಲು ಆರಂಭಿಸಿದವು. ಆಗ ಅವರ ವಯಸ್ಸು ಕೇವಲ 16 ವರ್ಷ. ಆ ಸಮಯದಲ್ಲಿಯೇ ಜನರು ಅವರನ್ನು ಮಾದಕವಾಗಿ ನೋಡಲು ಇಷ್ಟಪಡುತ್ತಿದ್ದರಂತೆ. ‘ತೆರೆ ಮೇಲೆ ಮಾತ್ರವಲ್ಲದೆ, ರಿಯಲ್‌ ಲೈಫ್‌ನಲ್ಲಿಯೂ ಅದೇ ರೀತಿ ಡ್ರೆಸ್‌ ಮಾಡಿಕೊಳ್ಳಬೇಕು ಎಂದು ಎಲ್ಲರೂ ನಿರೀಕ್ಷಿಸುತ್ತಿದ್ದರು. ಅತಿಯಾದ ಗ್ಲಾಮರ್‌ ನನಗೆ ತುಂಬ ಕಿರಿಕಿರಿ ಎನಿಸಿತು’ ಎಂದು ರಿಯಾ ಹೇಳಿದ್ದಾರೆ.
‘ನಾನು ಹೀಗೆಯೇ ಕಾಣಿಸಿಕೊಳ್ಳಬೇಕು, ಇಂಥದ್ದೇ ಬಟ್ಟೆ ಧರಿಸಬೇಕು ಎಂದು ಜನರು ಬಯಸುತ್ತಿದ್ದರು. ಮಾದಕವಾಗಿರುವ ಪಾತ್ರಗಳಿಗೇ ನನ್ನನ್ನು ಆಯ್ಕೆ ಮಾಡುತ್ತಿದ್ದರು. ಆದರೆ ಮನಸಾರೆ ನನಗೆ ಅಂಥ ಪಾತ್ರಗಳನ್ನು ಮಾಡಲು ಇಷ್ಟ ಇರಲಿಲ್ಲ. ಆ ಕಾರಣದಿಂದಲೇ ಜನರು ನನ್ನನ್ನು ಕೆಟ್ಟ ನಟಿ ಎಂದು ತಿಳಿದುಕೊಂಡರು ಎನಿಸುತ್ತದೆ. ಹಾಗಂತ ನಾನು ಅವರನ್ನು ದೂಷಿಸುತ್ತಿಲ್ಲ’ ಎಂದಿದ್ದಾರೆ ರಿಯಾ.
ಈ ಎಲ್ಲ ಕಾರಣಗಳಿಂದಾಗಿ ರಿಯಾ ಬಾಲಿವುಡ್‌ನಲ್ಲಿ ಹೆಚ್ಚು ಯಶಸ್ವಿ ಆಗಲು ಸಾಧ್ಯವಾಗಲಿಲ್ಲ. ಹಾಗಂತ ಅವರು ನಟನೆಗೆ ಗುಡ್‌ ಬೈ ಹೇಳಲಿಲ್ಲ. ಬೆಂಗಾಲಿ ಸಿನಿಮಾಗಳಲ್ಲಿ ಅವರು ನಟಿಸಲು ಆರಂಭಿಸಿದರು. ‘ಬೆಂಗಾಲಿ ಚಿತ್ರರಂಗ ನನಗೆ ಒಳ್ಳೆಯ ಪಾತ್ರಗಳನ್ನು ನೀಡಿತು. ಬಾಲಿವುಡ್‌ ನಿರ್ದೇಶಕರು ನನ್ನ ಸಾಮರ್ಥ್ಯ ಏನು ಎಂಬುದನ್ನು ಸರಿಯಾಗಿ ಅರ್ಥ ಮಾಡಿಕೊಳ್ಳಲಿಲ್ಲ’ ಎಂದು ರಿಯಾ ಆರೋಪಿಸಿದ್ದಾರೆ.
Comments are closed.