ಲಾಕ್‌ಡೌನ್‌: 21 ದಿನದಲ್ಲಿ 75 ಸಾವಿರ ಊಟ ಹಂಚಿದ ನಟಿ ಪ್ರಣೀತಾ!

ಕೊರೊನಾ ವೈರಸ್ ದಾಳಿ ಮಾಡಿದ ದಿನದಿಂದಲೂ ಜಗತ್ತು ತಲ್ಲಣಿಸಿ ಹೋಗಿದೆ. ಲಾಕ್‌ಡೌನ್ ಜಾರಿಯಾಗಿರುವುದಿಂದ ಜನಜೀವನ ಕಷ್ಟದಲ್ಲಿದೆ. ಇಂತಹ ಸ್ಥಿತಿಯಲ್ಲಿ ಕಷ್ಟದಲ್ಲಿರುವವರಿಗೆ ಸಹಾಯ ಮಾಡುವುದು ಮಾನವೀಯ ಗುಣ. ಈಗಾಗಲೇ ಚಿತ್ರರಂಗದ ಅನೇಕರು ಇಂತಹ ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿಕೊಂಡಿದ್ದಾರೆ. ನಟಿ ಪ್ರಣೀತಾ ಸುಭಾಷ್ ಕೂಡ ಇದೇ ಹಾದಿಯಲ್ಲಿ ನಿರಂತರವಾಗಿ ಕೆಲಸ ಮಾಡುತ್ತಿದ್ದಾರೆ.

ದಿನಗೂಲಿ ನೌಕಕರಿಗೆ, ಕಷ್ಟದಲ್ಲಿರುವವರಿಗೆ ಊಟದ ವ್ಯವಸ್ಥೆ ಮಾಡುತ್ತಿದ್ದಾರೆ. ಅವರದೇ ಫೌಂಡೇಷನ್‌ ಹಾಗೂ ಇನ್ನಿತರ ಸಂಸ್ಥೆಗಳ ಸಹಯೋಗದೊಂದಿಗೆ 21 ದಿನಗಳಲ್ಲಿ ಅವರು 75 ಸಾವಿರ ಊಟಗಳನ್ನು ಹಂಚಿದ್ದಾರೆ. ಒಂದು ಕುಟುಂಬದ ಊಟದ ವ್ಯವಸ್ಥೆಗೆ 2 ಸಾವಿರ ರೂ. ಬೇಕಾಗುತ್ತದೆ. ಈ ಊಟದ ವ್ಯವಸ್ಥೆಗಾಗಿ ಒಂದು ತಿಂಗಳ ಹಿಂದೆಯೇ 1 ಲಕ್ಷ ರೂ.ಗಳ ನೆರವನ್ನು ಅವರು ನೀಡಿದ್ದರು. ಆ ಮೂಲಕ 50 ಕುಟುಂಬಗಳಿಗೆ ನಿರಂತರ ಊಟದ ವ್ಯವಸ್ಥೆ ಮಾಡಿದ್ದಾರೆ.

#HelpTheHelpingHands ಎಂಬ ಕಾನ್ಸೆಪ್ಟ್‌ನಲ್ಲಿ ಸುಮಾರು 500 ಕುಟುಂಬಗಳಿಗೆ ನಿರಂತರ ಊಟದ ವ್ಯವಸ್ಥೆ ಮಾಡುವ ಯೋಜನೆ ಹಾಕಿಕೊಂಡಿದ್ದಾರೆ ಅವರು. ಪ್ರಣೀತಾ ಅವರ ಈ ಸಾಮಾಜಿಕ ಕಾರ್ಯಕ್ಕೆ ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗಿದೆ. ಈ ಹಿಂದೆ ಅವರು ಶಾಲೆಯೊಂದನ್ನು ದತ್ತು ಪಡೆದುಕೊಂಡು, ಅದಕ್ಕೆ ಸೌಲಭ್ಯ ಒದಗಿಸಿದ್ದರು.