ಬಾಲಿವುಡ್‍ನ ಹಿರಿಯ ಕಲಾವಿದೆ ಕಾಜೋಲ್ ದೇವಗನ್ ತನ್ನ ಇನ್‍ಸ್ಟಾಗ್ರಾಮ್‌ನಲ್ಲಿ 20 ವರ್ಷಗಳ ಚಾಲೆಂಜ್ ಹಂಚಿಕೊಂಡಿದ್ದಾರೆ. 20 ವರ್ಷಗಳ ಫೋಟೋ ಜೊತೆಗೆ ತನ್ನ ಇತ್ತೀಚೆಗಿನ ಫೋಟೋವನ್ನು ಗ್ರಾಫಿಕ್ಸ್ ಇಂಟರ್ ಚೇಂಜ್ (ಜಿಫ್) ಫಾರ್ಮ್ಯಾಟ್‌ನಲ್ಲಿ ಹಂಚಿಕೊಂಡಿದ್ದಾರೆ 45 ವರ್ಷದ ಕಾಜೋಲ್.
ಈ ಪೋಸ್ಟ್‌ನಲ್ಲಿರುವ ಒಂದು ಫೋಟೋ 1999ನೇ ಸಾಲಿನದ್ದಾದರೆ ಇನ್ನೊಂದು 2019ರದ್ದು. ಒಂದೇ ಸ್ಟೈಲ್‌ನಲ್ಲಿ ಇರುವ ಈ ಫೋಟೋಗಳಿಗೆ, “ನಿಮ್ಮನ್ನು ಚಕಿತಗೊಳಿಸುವ ವಿಷಯವೇ ನಿಮ್ಮ ದೊಡ್ಡ ಆಸ್ತಿ” ಎಂದು ಐನ್‍ಸ್ಟೀನ್ ಅವರ ನುಡಿಮುತ್ತನ್ನು ಹಾಕಿದ್ದಾರೆ.
ಈ ಪೋಸ್ಟನ್ನು ಇಷ್ಟಪಟ್ಟಿರುವ ಅಭಿಮಾನಿಗಳು, “ಆಗಲೂ ಈಗಲೂ ಹಾಗೆಯೇ ಇದ್ದೀರಾ, ನಿಮ್ಮ ಸೌಂದರ್ಯ ಈಗಲೂ ಎಳ್ಳಷ್ಟೂ ಕಳೆಗುಂದಿಲ್ಲ” ಎಂದು ಕಾಮೆಂಟ್ ಮಾಡುತ್ತಿದ್ದಾರೆ.
ಇನ್ನು ಕಾಜೋಲ್ ಸುಮಾರು 10 ವರ್ಷಗಳ ಬಳಿಕ ತನ್ನ ಗಂಡ ಅಜಯ್ ದೇವಗನ್ ಜೊತೆಗೆ ‘ತಾನಾಜಿ’ ಚಿತ್ರದಲ್ಲಿ ಅಭಿನಯಿಸಿದ್ದಾರೆ. ಈ ಐತಿಹಾಸಿಕ ಸಿನಿಮಾದಲ್ಲಿ ಕಾಜೋಲ್, ಅಜಯ್ ದೇವಗನ್ ಹಾಗೂ ಸೈಫ್ ಅಲಿ ಖಾನ್ ಪ್ರಮುಖ ಪಾತ್ರಗಳನ್ನು ಪೋಷಿಸಿದ್ದಾರೆ. ಈ ವರ್ಷ ಸಂಕ್ರಾಂತಿಗೆ ಬಿಡುಗಡೆಯಾದ ಸಿನಿಮಾ ಬಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಕಲೆಕ್ಷನ್ ಮಾಡಿದೆ.
ಇತ್ತೀಚೆಗೆ ಕಾಜೋಲ್ ತನಗಾದ ಕಹಿ ಘಟನೆಯೊಂದನ್ನು ಹಂಚಿಕೊಂಡಿದ್ದರು. 2001ರಲ್ಲಿ ‘ಕಭಿ ಖುಷಿ ಕಭಿ ಘಂ’ ಸಿನಿಮಾ ಶೂಟಿಂಗ್ ಸಮಯದಲ್ಲಿ ತಾನು ಗರ್ಭಿಣಿಯಾಗಿದ್ದೆ. ಆ ಸಿನಿಮಾ ತುಂಬಾ ಚೆನ್ನಾಗಿ ಮೂಡಿಬಂದಿತ್ತು. ಅಂತಹ ಸಂತಸದ ಸಮಯದಲ್ಲಿ ನನಗೆ ಗರ್ಭಪಾತ ಆದಕಾರಣ ಆಸ್ಪತ್ರೆಗೆ ದಾಖಲಾಗಿದ್ದೆ. ಮತ್ತೊಂದು ಸಲವೂ ಗರ್ಭಸ್ರಾವ ಆಗಿತ್ತು. ಎರಡು ಸಲ ಗರ್ಭಸ್ರಾವ ಆದ ಬಳಿಕ ನೈಸಾ, ಯುಗ್ ಇಬ್ಬರು ಮಕ್ಕಳಾದರು” ಎಂದು ಕಾಜೋಲ್ ತಾನು ಅನುಭವಿಸಿದ ನೋವನ್ನು ಹಂಚಿಕೊಂಡಿದ್ದಾರೆ.
Comments are closed.