ಪ್ರಿಯಾಂಕಾ ಚೋಪ್ರಾ-ನಿಕ್ ಜೋನಾಸ್ ಅಧರ ಚುಂಬನ

ಬಾಲಿವುಡ್ ನಟಿ ಪ್ರಿಯಾಂಕಾ ಚೋಪ್ರಾ ಮತ್ತವರ ಪತಿ ನಿಕ್ ಜೋನಾಸ್ ಚುಂಬಿಸಿಕೊಳ್ಳುತ್ತಿರುವ ವಿಡಿಯೋ ಒಂದು ಸಾಮಾಜಿಕ ಮಾಧ್ಯಮಗಳಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ. ಇವರಿಬ್ಬರ ನಡುವಿನ ಪ್ರೇಮ, ಅನುರಾಗವನ್ನು ಕಂಡ ನೆಟ್ಟಿಗರು ಅನ್ಯೋನ್ಯತೆಗೆ ಮೆಚ್ಚುಗೆ ಸೂಚಿಸಿದ್ದಾರೆ.

ಹೊಸ ವರ್ಷದ ಸಂಭ್ರಮದ ಹಿನ್ನೆಲೆಯಲ್ಲಿ ಪ್ರಿಯಾಂಕಾ ಪತಿ ನಿಕ್ ವಿಶೇಷ ಸಂಗೀತ ಕಚೇರಿ ಆಯೋಜಿಸಿದ್ದರು. ಕಾರ್ಯಕ್ರಮದ ಭಾಗವಾಗಿ ಹೊಸ ವರ್ಷಕ್ಕೆ ಆಹ್ವಾನ ನೀಡಿತ್ತಾ ತನ್ನ ಪತ್ನಿ ಪ್ರಿಯಾಂಕಾರನ್ನು ವೇದಿಕೆಗೆ ಕರೆತಂದು ಬಳಿಕ ಪ್ರೀತಿಯಿಂದ ಮುದ್ದಾಡಿದರು. ಇದಕ್ಕೆ ಸಂಬಂಧಿಸಿದ ವಿಡಿಯೋ, ಫೋಟೋಗಳನ್ನು ಹಲವು ಅಭಿಮಾನಿಗಳು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ. ಹಾಗಾಗಿ ಈ ವಿಡಿಯೋ ಈಗ ವೈರಲ್ ಆಗಿದೆ. ಇವರ ಜೋಡಿಯನ್ನು ನೋಡಿದವರು ಸೂಪರ್ ಎಂದು ಕಾಮೆಂಟ್ ಮಾಡುತ್ತಿದ್ದಾರೆ.

ಕಳೆದ ವರ್ಷ ಬಿಡುಗಡೆಯಾದ ‘ದಿ ಸ್ಕೈ ಈಸ್ ಪಿಂಕ್’ ಚಿತ್ರದ ಮೂಲಕ ಯಶಸ್ಸನ್ನು ದಾಖಲಿಸಿದ್ದಾರೆ ಪ್ರಿಯಾಂಕಾ ಚೋಪ್ರಾ. ಚಿಕ್ಕಂದಿನಲ್ಲೇ ಅಪರೂಪದ ಕಾಯಿಲೆಯಿಂದ ಬಳಲುತ್ತಿದ್ದರೂ 15 ವರ್ಷಕ್ಕೆ ಸ್ಫೂರ್ತಿದಾಯಕ ಉದ್ಯಮಿಯಾಗಿ, ಲೇಖಕಿಯಾಗಿ ಗುರುತಿಸಿಕೊಂಡ ಅಯಿಷಾ ಚೌದರಿ ಜೀವನ ಕಥೆಯಾಧಾರಿತ ಚಿತ್ರವನ್ನು ತೆರೆಗೆ ತರಲಾಗಿದ್ದು ಅಭಿಮಾನಿಗಳ ಮೆಚ್ಚುಗೆಗೆ ಪಾತ್ರವಾಗಿದೆ.

ಸುಮಾರು ಮೂರು ವರ್ಷಗಳ ಬಳಿಕ ಪ್ರಿಯಾಂಕಾ ಚೋಪ್ರಾ ಹಿಂದಿಯಲ್ಲಿ ನಟಿಸಿರುವ ಸಿನಿಮಾ ದಿ ಸ್ಕೈ ಈಸ್ ಪಿಂಕ್. ಫರ್ಹಾನ್ ಅಕ್ತರ್, ಝೈರಾ ವಾಸಿಂ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಸೋನಾಲಿ ಬೋಸ್ ನಿರ್ದೇಶನದ ಸಿನಿಮಾ ಇದು.

ಸದ್ಯಕ್ಕೆ ಪ್ರಿಯಾಂಕಾ ಚೋಪ್ರಾ ‘ದಿ ವೈಟ್ ಟೈಗರ್’ ಚಿತ್ರದಲ್ಲಿ ಭಾಗಿಯಾಗಿದ್ದಾರೆ. 2019ರಲ್ಲಿ ಉತ್ತಮ ಗೆಲುವು ಸಾಧಿಸಿದ ಪ್ರಿಯಾಂಕಾ 2020ನೇ ವರ್ಷ ತನಗೆ ಏನೆಲ್ಲಾ ನೀಡಲಿದೆಯೋ ಎಂದು ಕುತೂಹಲದಿಂದ ಎದುರು ನೋಡುತ್ತಿರುವುದಾಗಿ ಹೇಳಿಕೊಂಡಿದ್ದಾರೆ.