ಸಲ್ಮಾನ್ ಜೊತೆ ದಬಾಂಗ್-3ಯ ಐಟಂ ಸಾಂಗ್‍ನಲ್ಲಿ ಹೆಜ್ಜೆ ಹಾಕಲು ಸಜ್ಜಾದ ಮೌನಿ ರಾಯ್!

ಬಾಲಿವುಡ್ ನಟ ಸಲ್ಮಾನ್ ಖಾನ್ ಅಭಿನಯದ ‘ದಬಾಂಗ್’ ಸಿನಿಮಾದ ಮೂರನೇ ಭಾಗ ‘ದಬಾಂಗ್ 3’ ಚಿತ್ರವು ಬಿಡುಗಡೆಗೆ ಮುನ್ನವೇ ಭಾರೀ ಸಂಚಲನ ಸೃಷ್ಟಿಸಿದೆ. ಈಗಾಗಲೇ ದಬಾಂಗ್ 3 ಸಿನಿಮಾ ಶೂಟಿಂಗ್ ಶುರುವಾಗಿದ್ದು, ಅದರಲ್ಲಿ ಕನ್ನಡದ ನಟ ಕಿಚ್ಚ ಸುದೀಪ್ ಸಹ ಭಾಗಿಯಾಗಿರುವುದು ಬಹಳಷ್ಟು ಜನರಿಗೆ ಗೊತ್ತಿದೆ. ಇದೀಗ ಈ ಚಿತ್ರತಂಡದಿಂದ ಹೊಸ ಸುದ್ದಿಯೊಂದು ಹೊರಬಿದ್ದಿದೆ. ಅದು, ದಬಾಂಗ್-3 ಸಿನಿಮಾದ ಐಟಂ ಸಾಂಗ್‍ನಲ್ಲಿ ಮಾದಕವಾಗಿ ನರ್ತಿಸಲು ಮೌನಿ ರಾಯ್ ಅವರನ್ನು ಕರೆತರಲಾಗುತ್ತಿದೆ.

ದಬಾಂಗ್ 3 ಸಿನಿಮಾದ ಐಟಂ ನಂಬರ್‌ಗಾಗಿ ನಟಿ ಮತ್ತು ಡಾನ್ಸರ್ ಮೌನಿ ರಾಯ್ ಅವರನ್ನು ಸ್ವತಃ ಈ ಚಿತ್ರದ ನಾಯಕ ಸಲ್ಮಾನ್ ಖಾನ್ ಸೂಚಿಸಿದ್ದಾರೆ ಎನ್ನಲಾಗಿದೆ. ಮೌನಿ ರಾಯ್ ಈಗಾಗಲೇ ದಬಾಂಗ್ (ಮುನ್ನಿ ಬದ್ನಾಂ ಹುಯಿ) ಮತ್ತು ದಬಾಂಗ್-2 (ಫೆವಿಕಾಲ್ ಸೆ) ಐಟಂ ಸಾಂಗ್‍ಗಳಲ್ಲಿ ಕಾಣಿಸಿಕೊಂಡಿದ್ದು ಅವರೆಡೂ ಸೂಪರ್ ಹಿಟ್ ಆಗಿವೆ. ಇದೀಗ ದಬಾಂಗ್ 3ರಲ್ಲೂ ಐಟಂ ಸಾಂಗ್ ಹಾಗೂ ಮೌನಿ ರಾಯ್ ಇಬ್ಬರನ್ನೂ ಮುಂದುವರೆಸಲು ನಿರ್ಮಾಪಕರೂ ಸೇರಿದಂತೆ, ಚಿತ್ರತಂಡ ನಿರ್ಧರಿಸಿದೆ. ಮುಖ್ಯವಾಗಿ ಮೌನಿ ರಾಯ್ ಅವರನ್ನು ಸಲ್ಲೂ ಆಯ್ಕೆ ಮಾಡಿದ್ದಾರಂತೆ.

ಆ ಐಟಂ ಸಾಂಗ್‌ನಲ್ಲಿ ಮೌನಿ ಜೊತೆ ಸಲ್ಮಾನ್ ಖಾನ್ ಸಹ ಹೆಜ್ಜೆ ಹಾಕಲಿದ್ದಾರೆ. ಇದೂ ಸಹ ‘ಮುನ್ನಿ ಮತ್ತು ಫೆವಿಕಾಲ್’ ಸಾಂಗ್‍ಗಳಂತೆ ಪಟ್ಟಣದ ದೇಸಿ ಶೈಲಿಯ ಹಾಡು. ಈ ಐಟಂ ನಂಬರ್‌ಗೆ ಭಾರೀ ಸಿದ್ದತೆಗಳು ನಡೆಯುತ್ತಿದ್ದು, ಶೂಟಿಂಗ್ ಸದ್ಯದಲ್ಲೇ ಶುರುವಾಗಲಿದೆ ಎನ್ನಲಾಗಿದೆ.

ಅಂದಹಾಗೆ, ಇತ್ತೀಚಿಗೆ ಸೂಪರ್ ಹಿಟ್ ಎನಿಸಿರುವ ‘ಕೆಜಿಎಫ್’ ಚಿತ್ರದಲ್ಲಿ ಸಹ ಇದೇ ಮೌನಿ ರಾಯ್ ‘ಐಟಂ ಸಾಂಗ್’ ಮೂಲಕ ಮೋಡಿ ಮಾಡಿದ್ದಾರೆ. ಮೌನಿ ರಾಯ್‌ ಗ್ಲಾಮರ್, ಮಾದಕತೆ ಮತ್ತು ಡ್ಯಾನ್ಸ್ ಸ್ಟೆಪ್‍ಗಳನ್ನು ನೋಡಿದ ಬಾಲಿವುಡ್ ಮಂದಿ, ತಮ್ಮ ಸಿನಿಮಾಗಳ ಹಾಡುಗಳಲ್ಲಿ ನರ್ತಿಸುವಂತೆ ಅವರಿಗೆ ಭಾರೀ ಆಫರ್ ನೀಡುತ್ತಿವೆ. ಈ ಚಿತ್ರದಲ್ಲಿ ಸಲ್ಮಾನ್ ಖಾನ್ ಅವರಿಗೆ ನಾಯಕಿಯಾಗಿ ಸೋನಾಕ್ಷಿ ಸಿನ್ಹಾ ಕಾಣಿಸಿಕೊಂಡಿದ್ದಾರೆ. ಈ ದಬಾಂಗ್ 3 ಚಿತ್ರವು ಡಿಸೆಂಬರ್ 20ರಂದು ತೆರೆಕಾಣಲಿದೆ.