ನಮ್ಮ ಟೈಮ್ ಚೆನ್ನಾಗಿದ್ದರೆ ಮುಟ್ಟಿದ್ದೆಲ್ಲ ಚಿನ್ನ ಆಗುತ್ತದೆ. ಅದೇ ಟೈಮ್ ಕೆಟ್ಟಾಗ ಏನೇ ಮಾಡಿದರೂ ವಿವಾದ ಭುಗಿಲೇಳುತ್ತದೆ. ಈ ಮಾತಿಗೆ ಜ್ವಲಂತ ಉದಾಹರಣೆ ನಟಿ ಪ್ರಿಯಾ ಪ್ರಕಾಶ್ ವಾರಿಯರ್! ಒಂದು ವರ್ಷದ ಹಿಂದೆ ಅವರು ನಟಿಸಿದ್ದ ‘ಒರು ಅಡಾರ್ ಲವ್’ ಚಿತ್ರದ ‘ಮಾಣಿಕ್ಯ ಮಲರಾಯ ಪೂವಿ..’ ಗೀತೆ ಯೂಟ್ಯೂಬ್ನಲ್ಲಿ ಬಿಡುಗಡೆಯಾಗಿ ಒಂದು ದಿನ ಕಳೆಯುವುದರೊಳಗೆ 50 ಸಾವಿರ ಲೈಕ್ಸ್ ಗಿಟ್ಟಿಸಿತ್ತು. ಆ ಹಾಡಿನಲ್ಲಿ ಪ್ರಿಯಾ ಕಣ್ಣು ಹೊಡೆದ ಪರಿಗೆ ರಾತ್ರೋರಾತ್ರಿ ಅವರು ನ್ಯಾಷನಲ್ ಕ್ರಷ್ ಎಂಬ ಬಿರುದು ಗಿಟ್ಟಿಸಿಕೊಂಡರು. ಇಂಟರ್ನೆಟ್ನಲ್ಲಿ ಜನರು ಅವರನ್ನು ಹಾಡಿ ಹೊಗಳಿದರು. ಆಗ ಅವರ ಟೈಮ್ ಚೆನ್ನಾಗಿತ್ತು. ಆದರೆ ಈಗ ಅವರಿಗೆ ಅದೃಷ್ಟ ಕೈಕೊಟ್ಟಂತಿದೆ. ಅವರ ಹೊಸ ಸಿನಿಮಾ ‘ಶ್ರೀದೇವಿ ಬಂಗ್ಲೋ’ ಟ್ರೇಲರ್ ಮೊನ್ನೆತಾನೇ ಬಿಡುಗಡೆಯಾಗಿದ್ದು, ಸಿಕ್ಕಾಪಟ್ಟೆ ಟ್ರೋಲ್ಗೆ ಕಾರಣವಾಗಿದ್ದಾರೆ ಪ್ರಿಯಾ. ಬಾತ್ಟಬ್ನಲ್ಲಿ ಬಿದ್ದು ಕೊನೆಯುಸಿರೆಳೆದ ನಟಿ ಶ್ರೀದೇವಿ ಬದುಕಿಗೂ ‘ಶ್ರೀದೇವಿ ಬಂಗ್ಲೋ’ ಚಿತ್ರಕ್ಕೂ ಸಾಮ್ಯತೆ ಇದೆ ಎಂಬುದಕ್ಕೆ ಟ್ರೇಲರ್ನಲ್ಲಿ ಸಾಕ್ಷಿ ಸಿಕ್ಕಿದೆ. ಅದೇ ಕಾರಣಕ್ಕೆ ಶ್ರೀದೇವಿ ಅಭಿಮಾನಿಗಳು ಈ ಚಿತ್ರತಂಡದ ಮೇಲೆ ಮುಗಿಬಿದ್ದಿದ್ದಾರೆ. ಕಳೆದ ವರ್ಷ ಪ್ರಿಯಾಗೆ ಜೈ ಜೈ ಎನ್ನುತ್ತಿದ್ದವರೆಲ್ಲ ಈಗ ಛೀ ಛೀ ಎನ್ನುತ್ತಿದ್ದಾರೆ! ಈವರೆಗೂ ‘ಶ್ರೀದೇವಿ ಬಂಗ್ಲೋ’ ಟ್ರೇಲರ್ಗೆ 18 ಸಾವಿರ ಮಂದಿ ಡಿಸ್ಲೈಕ್ ಬಟನ್ ಒತ್ತಿದ್ದಾರೆ. ಕಮೆಂಟ್ ಬಾಕ್ಸ್ನಲ್ಲಂತೂ ತೆಗಳಿಕೆಯ ಸುರಿಮಳೆ.
‘ಈ ಚಿತ್ರದಿಂದ ಮೊದಲು ಪ್ರಿಯಾರನ್ನು ತೆಗೆದುಹಾಕಿ. ಶ್ರೀದೇವಿ ಪಾತ್ರಕ್ಕೆ ಇಂಥವರನ್ನು ಆಯ್ಕೆ ಮಾಡಿದರೆ ಅದು ಶ್ರೀದೇವಿಗೆ ಅವಮಾನ ಮಾಡಿದಂತೆ’ ಎಂದು ಹಲವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಅಚ್ಚರಿ ಎಂದರೆ, ಕೇರಳದಲ್ಲಿರುವ ಸಿನಿಪ್ರಿಯರೇ ಈ ಟ್ರೇಲರ್ಗೆ ಸಾಧ್ಯವಾದಷ್ಟು ಡಿಸ್ಲೈಕ್ ಬರುವಂತೆ ಆನ್ಲೈನ್ ಅಭಿಯಾನ ಶುರುಮಾಡಿದ್ದಾರೆ! ಇಷ್ಟೆಲ್ಲ ಆದರೂ ಇದು ಶ್ರೀದೇವಿ ಬದುಕಿಗೆ ಸಂಬಂಧಿಸಿದ ಸಿನಿಮಾವೇ ಅಥವಾ ಇಲ್ಲವೇ ಎಂಬುದನ್ನು ಚಿತ್ರತಂಡ ಒಪ್ಪಿಕೊಂಡಿಲ್ಲ. ಈ ಹಿನ್ನೆಲೆಯಲ್ಲಿ ಶ್ರೀದೇವಿ ಪತಿ, ನಿರ್ವಪಕ ಬೋನಿ ಕಪೂರ್ ಚಿತ್ರತಂಡಕ್ಕೆ ನೋಟಿಸ್ ನೀಡಿದ್ದಾರೆ.
Comments are closed.