ಮದುವೆಯಾದರೆ ಮಕ್ಕಳನ್ನು ಹೆರಲೇಬೇಕಾ?: ಬಿಪಾಶಾ ಬಸು

‘ಮದುವೆಯಾದ ಮಾತ್ರಕ್ಕೆ ಮಕ್ಕಳನ್ನು ಕಡ್ಡಾಯವಾಗಿ ಹೆರಬೇಕೆಂಬ ನಿಯಮವೇನು ಇಲ್ಲ’ ಎಂದಿದ್ದಾರೆ ಬಾಲಿವುಡ್ ತಾರೆ ಬಿಪಾಶಾ ಬಸು. ಬಿಪಾಶಾ ಗರ್ಭಿಣಿ ಎಂಬ ಸುದ್ದಿ ಮಾಧ್ಯಮಗಳಲ್ಲಿ ಅತಿಯಾಗಿ ಪ್ರಸಾರವಾಗುತ್ತಿರುವ ಹಿನ್ನೆಲೆಯಲ್ಲಿ ಬಿಪಾಶಾ ಈ ರೀತಿ ಕೋಪದಿಂದ ನುಡಿದಿದ್ದಾರೆ.

2016ರಲ್ಲಿ ಬಿಪಾಶಾ ತನ್ನ ಪ್ರಿಯಕರ ಕರಣ್ ಸಿಂಗ್ ಗ್ರೋವರ್ ಕೈಹಿಡಿದರು. ಕಳೆದ ವರ್ಷ ಇಬ್ಬರೂ ಮುಂಬೈನ ಆಸ್ಪತ್ರೆಯೊಂದಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ ಬಿಪಾಶಾ ಗರ್ಭಿಣಿ ಎಂಬ ಸುದ್ದಿ ಹರಿದಾಡಿತ್ತು. ಅದರ ಬಗ್ಗೆ ಪ್ರತಿಕ್ರಿಯಿಸಿದ ಬಿಪಾಶಾ ಆ ರೀತಿ ಏನೂ ಇಲ್ಲ ಎಂದು ಸ್ಪಷ್ಟಪಡಿಸಿದ್ದರು.

ಕೆಲ ದಿನಗಳ ಹಿಂದೆ ತನ್ನ ಪತಿ ಜತೆ ಕಾರಿನಲ್ಲಿ ಹೋಗುತ್ತಿರಬೇಕಾದರೆ ಕೈಯಲ್ಲಿದ್ದ ಬ್ಯಾಗನ್ನು ಮಡಿಲಲ್ಲಿ ಇಟ್ಟುಕೊಂಡಿದ್ದೆ. ಬ್ಯಾಗಿನ ಬಣ್ಣ, ತಾನು ತೊಟ್ಟಿದ್ದ ಬಟ್ಟೆ ಬಣ್ಣ ಒಂದೇ ಆಗಿದ್ದ ಕಾರಣ ಅಲ್ಲಿದ್ದ ಫೋಟೋಗ್ರಾಫರ್‌ಗಳಿಗೆ ಬ್ಯಾಗ್ ಕಾಣಿಸಿರಲಿಲ್ಲ. ಹಾಗಾಗಿ ಬಿಪಾಶಾ ಗರ್ಭಿಣಿ ಎಂಬ ಸುದ್ದಿ ಹಬ್ಬಿತ್ತು.

ಇದೀಗ ಮತ್ತೆ ಬಿಪಾಶಾ ಗರ್ಭಿಣಿ ಎಂಬ ಸುದ್ದಿ ಹಬ್ಬಿರುವ ಕಾರಣ ಬಿಪಾಶಾ, ಕರಣ್ ಸ್ವಲ್ಪ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದಾರೆ. ‘ಬಿಪಾಶಾ ಗರ್ಭಿಣಿಯಾದರೆ ಮೊದಲು ನನಗೇ ಗೊತ್ತಾಗುತ್ತದೆ. ನಿಮಗಲ್ಲ’ ಎಂದಿದ್ದಾರೆ ಕರಣ್.

ಇದಕ್ಕೆ ಉತ್ತರಿಸಿರುವ ಬಿಪಾಶಾ, ‘ಮಹಿಳೆಯರಿಗೆ ಈ ರೀತಿಯ ಪ್ರಶ್ನೆಗಳು ತುಂಬಾ ಕಿರಿಕಿರಿಯುಂಟು ಮಾಡುತ್ತವೆ. ಮಕ್ಕಳನ್ನು ಹೆರುವುದು ಅದ್ಭುತವಾದ ಅನುಭವ. ಆದರೆ ಪ್ರತಿಯೊಬ್ಬ ಮಹಿಳೆಗೆ ಇದಕ್ಕೂ ಮೀರಿದ ವಿಷಯಗಳಿರುತ್ತವೆ. ಮದುವೆಯಾದ ಮಾತ್ರಕ್ಕೆ ಮಕ್ಕಳನ್ನು ಹೆರಬೇಕು ಎಂಬ ನಿಬಂಧನೆಯೇನೂ ಇಲ್ಲ?’ ಎಂದಿದ್ದಾರೆ ಬಿಪಾಶಾ.