ಶ್ರೀದೇವಿ ಅಂತ್ಯಕ್ರಿಯೆಯ ವೇಳೆ ಪಿಕ್ ಪಾಕೆಟ್‌ಗರ ಕೈಚಳಕ

ಮುಂಬಯಿ: ಕಳೆದ ಶನಿವಾರ ಮೃತಪಟ್ಟ ಜನಪ್ರಿಯ ಬಾಲಿವುಡ್ ನಟಿ ಶ್ರೀದೇವಿ ಅವರ ಅಂತ್ಯಕ್ರಿಯೆ ಸಕಲ ಸರ್ಕಾರಿ ಗೌರವದೊಂದಿಗೆ ಬುಧವಾರ ನೆರವೇರಿತು. ಸಾವಿರಾರು ಅಭಿಮಾನಿಗಳು, ಗಣ್ಯರು, ಆಪ್ತರ ಸಮ್ಮುಖದಲ್ಲಿ ಮುಂಬಯಿಯ ವಿಲ್ಲೆ ಪಾರ್ಲೆಯ ಹಿಂದೂ ಸೇವಾ ಸಮಾಜದ ರುದ್ರಭೂಮಿಯಲ್ಲಿ ಅಂತ್ಯಕ್ರಿಯೆ ನಡೆಯಿತು.

ಮೋಹಕ ತಾರೆ ಶ್ರೀದೇವಿ ಪಾರ್ಥಿವ ಶರೀರದ ಅಂತಿಮ ದರ್ಶನ ಪಡೆಯಲು ದಾರಿಯುದ್ಧಕ್ಕೂ ಸಾವಿರಾರು ಅಭಿಮಾನಿಗಳು ಸೇರಿದ್ದರು. ಆದರೆ ದುರದೃಷ್ಟವೆಂಬಂತೆ ಭಾರಿ ಜೇಬುಗಳ್ಳತನ ವರದಿಯಾಗಿದೆ.

ಈ ಸಂಬಂಧ ಕ್ಷಿಪ್ರ ಕಾರ್ಯಾಚರಣೆಯನ್ನು ನಡೆಸಿರುವ ಮುಂಬಯಿ ಪೊಲೀಸ್, ಜೇಬುಗಳ್ಳತನ ಪ್ರಕರಣದಲ್ಲಿ 12ರಷ್ಟು ಅಪರಾಧಿಗಳನ್ನು ಬಂಧಿಸಿದ್ದಾರೆ. ಕಿಕ್ಕಿರಿದ ತುಂಬಿದ ಜನಸಂದಣಿಯಲ್ಲಿ ಜೇಬುಗಳ್ಳತನದ ಪ್ರಯತ್ನ ನಡೆದಿತ್ತು.

ಅಂತಿಮ ದರ್ಶನ ವೇಳೆ ಪೊಲೀಸರು, ಸೆಲೆಬ್ರೇಷನ್ ಕ್ಲಬ್‌ನಿಂದ ವಿಲ್ಲೆ ಪಾರ್ಲೆ ವರೆಗೆ ಬಿಗಿ ಬಂದೋಬಸ್ತ್ ಏರ್ಪಡಿಸಿದ್ದರು. ಪರಿಸರದಲ್ಲಿ 7000ಕ್ಕೂ ಪೊಲೀಸರನ್ನು ನೇಮಕ ಮಾಡಲಾಗಿತ್ತು. ಭದ್ರತೆಗಾಗಿ 1200ರಷ್ಟು ಮಹಿಳಾ ಪೊಲೀಸರನ್ನು ನೇಮಕಗೊಳಿಸಲಾಗಿತ್ತು.