ಮುಂಬಯಿ: ಒಳ್ಳೆಯ, ಕೆಟ್ಟ ಕಾರಣಗಳಿಗೆ ಸುದ್ದಿಯಲ್ಲಿರುವುದನ್ನು ಕರಗತ ಮಾಡಿಕೊಂಡಿರುವ ಯುವ ಕ್ರಿಕೆಟಿಗ ಸರ್ಫರಾಜ್‌ ಖಾನ್‌ ಇದೀಗ 2 ಕೋಟಿ ರೂ. ಒಪ್ಪಂದ ಮಾಡಿಕೊಂಡು ಗಮನ ಸೆಳೆದಿದ್ಧಾರೆ.
17ರ ಹರೆಯದಲ್ಲೇ ಮುಂಬಯಿ ಪರ ರಣಜಿ ಕ್ರಿಕೆಟ್‌ ಆಡುವ ಅವಕಾಶ ಪಡೆದಿದ್ದ ಖಾನ್‌, ಎರಡು ದಿನಗಳ ಹಿಂದಷ್ಟೇ ಮುಂಬಯಿ ತೊರೆದು ಉತ್ತರ ಪ್ರದೇಶದ ತಂಡ ಸೇರಿಕೊಂಡು ಸುದ್ದಿ ಮಾಡಿದ್ದರು. ಆ ನಿರ್ಣಯವೀಗ ಅವರಿಗೆ ಅದೃಷ್ಟ ತಂದುಕೊಟ್ಟಿದ್ದು, ಪ್ರೊಫೆಷನಲ್‌ ಮ್ಯಾನೆಜ್‌ಮೆಂಟ್‌ ಗ್ರೂಪ್‌(ಪಿಎಂಜಿ) ಎಂಬ ಸಂಸ್ಥೆ ಜತೆಗೆ ಮೂರು ವರ್ಷಗಳ ನೂತನ ಒಪ್ಪಂದವೊಂದಕ್ಕೆ ಸಹಿ ಮಾಡಿದ್ಧಾರೆ.
ತಾವೆಷ್ಟು ಹಣ ಕೊಡುತ್ತಿದ್ದೇವೆ ಎನ್ನುವುದನ್ನು ಪಿಎಂಜಿ ಸಂಸ್ಥೆ ಬಹಿರಂಗಪಡಿಸಲು ನಿರಾಕರಿಸಿದ್ದರೂ, ಅದು ಎರಡು ಕೋಟಿ ರೂ.ಗಳ ಒಪ್ಪಂದ ಎನ್ನುವುದು ವಿಕ ಸೋದರ ಪತ್ರಿಕೆ ಟೈಮ್ಸ್‌ ಆಫ್‌ ಇಂಡಿಯಾಗೆ ತಿಳಿದುಬಂದಿದೆ. ಈ ಒಪ್ಪಂದದ ಪ್ರಕಾರ ಹದಿಹರೆಯದ ದಾಂಡಿಗ ಖಾನ್‌ ಇನ್ನು ಪಿಎಂಜಿ ಸಂಸ್ಥೆ ಮೂಲಕ ವಾಣಿಜ್ಯ ಒಪ್ಪಂದಗಳನ್ನು ಮಾಡಿಕೊಳ್ಳಲಿದ್ದಾರೆ. ಇದಕ್ಕೂ ಮುನ್ನ ಕ್ರಿಕೆಟ್‌ನ ಇನ್ನೊಬ್ಬ ಅಚ್ಚರಿಯ ಪ್ರತಿಭೆ ಪ್ರಥ್ವಿ ಶಾ ಅವರನ್ನೂ ಸಂಸ್ಥೆ ಒಪ್ಪಂದ ಮಾಡಿಕೊಂಡಿದೆ. 2013ರ ನವೆಂಬರ್‌ನಲ್ಲಿ ನಡೆದ ಅಂತರಶಾಲೆ ಟೂರ್ನಿಯಲ್ಲಿ ಶಾ 546 ರನ್‌ ಸಿಡಿಸಿ ದಾಖಲೆ ನಿರ್ಮಿಸಿದ್ದರು. ಪಿಎಂಜಿ ಸಂಸ್ಥೆ ಒಂದು ಕಾಲದಲ್ಲಿ ಬಿರುಸಿನ ಬ್ಯಾಟ್ಸ್‌ಮನ್‌ ವಿರೇಂದ್ರ ಸೆಹ್ವಾಗ್‌ ಜತೆಗೂ ಒಪ್ಪಂದ ಮಾಡಿಕೊಂಡಿತ್ತು.
2009ರಲ್ಲಿ ನಡೆದ ಹ್ಯಾರೀಸ್‌ ಶೀಲ್ಡ್‌ ಅಂತರ ಶಾಲೆ ಕ್ರಿಕೆಟ್‌ ಪಂದ್ಯದಲ್ಲಿ ಆಗ 12 ನೇ ವಯಸ್ಸಿನಲ್ಲಿದ್ದ ಸರ್ಫರಾಜ್‌ ಖಾನ್‌ 439 ರನ್‌ ಸಿಡಿಸಿ ಕ್ರಿಕೆಟ್‌ ವಲಯದಲ್ಲಿ ಅಚ್ಚರಿ ಮೂಡಿಸಿದ್ದರು. ಪಿಎಂಜಿ ಜತೆಗಿನ ಒಪ್ಪಂದ ತಮಗೆ ಖುಷಿ ನೀಡಿದೆ ಎಂದು ಖಾನ್‌ ಹೇಳಿದ್ದಾರೆ.
ಇದಕ್ಕೂ ಮುನ್ನ ಅವರನ್ನು ಐಪಿಎಲ್‌ನ 8ನೇ ಆವೃತ್ತಿಗೆ 50 ಲಕ್ಷ ರೂ. ಕೊಟ್ಟು ರಾಯಲ್ ಚಾಲೆಂಜರ್ಸ್‌ ತಂಡ ಖರೀದಿಸಿತ್ತು. ಅಲ್ಲಿ ಅವರು ಒಂದು ಪಂದ್ಯದಲ್ಲಿ 21 ಎಸೆತಗಳಲ್ಲಿ 51 ರನ್‌ ಸಿಡಿಸಿ ಮಿಂಚಿದ್ದರು.
