ಮೀನಾಕ್ಷಿ ಶೇಷಾದ್ರಿಗೆ ಸಿನಿಮಾದಲ್ಲಿ ಆಸಕ್ತಿ ಉಳಿದಿಲ್ಲವಂತೆ. ಇನ್ನು ಮುಂದೆ ನಾನು ಸಿನಿಮಾದಲ್ಲಿ ನಟಿಸುವುದಿಲ್ಲ . ಘಾಯಲ್ ಸಿನಿಮಾದ ಸಿಕ್ವೆಲ್‌ನಲ್ಲೂ ನಾನಿಲ್ಲ ಎಂದು ನೇರವಾಗಿ ಹೇಳಿದ್ದಾರೆ.
ಒಂದು ಕಾಲದಲ್ಲಿ ಮೀನಾಕ್ಷಿ ಬಾಲಿವುಡ್‌ನ ಜನಪ್ರಿಯ ನಟಿ. ಹಿಂದಿ ಸಿನಿ ರಸಿಕರ ಮನ ಗೆದ್ದ ಚೆಲುವೆ. ಆದರೆ ಈಗ ತನಗೂ ಸಿನಿಮಾ ಲೋಕಕ್ಕೂ ನಂಟು ಮುಗಿದಿದೆ. ಸದ್ಯಕ್ಕೆ ನಾನು ಯಾವ ಸಿನಿಮಾದಲ್ಲೂ ನಟಿಸುತ್ತಿಲ್ಲ ಎಂದಿದ್ದಾರೆ.
ಅಂದ ಹಾಗೆ, ಈ ಚೆಲುವೆಗೆ ಈಗ 51 ವರ್ಷ. 1990ರಲ್ಲಿ ತೆರೆ ಕಂಡಿದ್ದ ಹಿಂದಿ ಸಿನಿಮಾ ಘಾಯಲ್‌ನಲ್ಲಿ ಮಿಂಚಿದ್ದರು. ಅವರ ವೃತ್ತಿ ಬದುಕಿನಲ್ಲಿ ಅಪಾರ ಯಶಸ್ಸು ಕೊಟ್ಟ ಸಿನಿಮಾವದು. ಗಾಯಲ್ ಸಿನಿಮಾದ ಸಿಕ್ವೆಲ್‌ನಲ್ಲಿಯೂ ಮೀನಾಕ್ಷಿ ನಟಿಸಬೇಕೆಂಬ ಆಫರ್ ಇತ್ತು. ಆದರೆ ಅದ್ಯಾಕೋ ಮೀನಾಕ್ಷಿಗೆ ಸಿನಿಮಾ ಜಗತ್ತಿನ ಬಗ್ಗೆ ಯಾವ ಆಸಕ್ತಿಯೂ ಉಳಿದಿಲ್ಲವಂತೆ. ಘಾಯಲ್ ಸಿನಿಮಾದಲ್ಲಿ ಮೀನಾಕ್ಷಿ ನಟಿಸುತ್ತಾರೋ ಇಲ್ಲವೋ ಎಂಬ ಜಿಜ್ಞಾಸೆಗಳಿಗೆ ನಟಿ ‘ನಾನು ಯಾವ ಸಿನಿಮಾದಲ್ಲೂ ನಟಿಸುವುದಿಲ್ಲ’ ಎಂದು ನೇರವಾಗಿ ಹೇಳುವ ಮೂಲಕ ತೆರೆ ಎಳೆದಿದ್ದಾರೆ.
ಹಾಗಾದರೆ ಮೀನಾಕ್ಷಿ ಸುಮ್ಮನೆ ಕೂರುತ್ತಾರಾ ಅನ್ನೋ ಪ್ರಶ್ನೆಗೂ ಉತ್ತರ ಇದೆ. ಸ್ಟೇಜ್ ಪ್ರೊಡಕ್ಷನ್ ಹಾಗೂ ಡಾನ್ಸ್ ಪ್ರೋಗ್ರಾಮ್‌ನಲ್ಲಿ ಮೀನಾಕ್ಷಿಗೆ ಆಸಕ್ತಿ ಹುಟ್ಟಿದೆಯಂತೆ. ಅವರ ಸಮಯ ಸಿನಿಮಾದ ಬದಲು ಇವಕ್ಕೆ ಮೀಸಲಾಗಿರುತ್ತದೆಯಂತೆ. **
ಸಲ್ಲು ಜತೆ ಕರಣ್ ಜೋಹರ್
ನಟ ಸಲ್ಮಾನ್ ಖಾನ್ ಹಾಗೂ ನಿರ್ದೇಶಕ, ನಿರ್ಮಾಪಕ ಕರಣ್ ಜೋಹರ್ ಜತೆಯಾಗಿ ನಟಿಸಲಿದ್ದಾರೆ.
ಖಾನ್ ಜೊತೆ ಕೆಲಸ ಮಾಡುವುದು ಕರಣ್, ತನ್ನ ಪಾಲಿನ ಪುಣ್ಯ ಅಂದಿದ್ದಾರೆ. ಈ ಮೊದಲು ಕುಚ್ ಕುಚ್ ಹೋತಾ ಹೈ ಸಿನಿಮಾದಲ್ಲಿ ಸಣ್ಣದಾದ ಪಾತ್ರವೊಂದರಲ್ಲಿ ಕರಣ್ ನಟಿಸಿದ್ದರು. ಅದಾದ ಮೇಲೆ ಕಾಫೀ ವಿತ್ ಕರಣ್ ಕಾರ‌್ಯಕ್ರಮದಲ್ಲಿ ಮತ್ತೊಮ್ಮೆ ಖಾನ್ ಜೊತೆ ವೇದಿಕೆ ಹಂಚಿಕೊಂಡಿದ್ದರು. ಇದೀಗ ಮತ್ತೊಂದು ಸಿನಿಮಾದಲ್ಲಿ ಸಲ್ಮಾನ್ ಜೊತೆ ನಟಿಸುವುದಕ್ಕೆ ಕರಣ್ ರೆಡಿಯಾಗಿದ್ದು, ಸಖತ್ ಖುಷಿಯಾಗಿದ್ದಾರೆ.
ಇದಕ್ಕಿಂತ ಮೊದಲು ಕರಣ್‌ರ ಮತ್ತೊಂದು ಸಿನಿಮಾ ‘ಶುದ್ಧಿ’ಯಲ್ಲಿ ಕೆಲಸ ಮಾಡಲು ಪ್ರಪೊಸಲ್ ಇತ್ತಂತೆ. ಆದರೆ ಕಾರಣಾಂತರಗಳಿಂದ ಅದು ಸಾಧ್ಯವಾಗಿರಲಿಲ್ಲ. ಹಾಗಾಗಿ ಈ ಹೊಸ ಪ್ರಾಜೆಕ್ಟ್ ಆರಂಭಕ್ಕಾಗಿ ಕರಣ್ ಕಾತುರದಿಂದ ಕಾಯುತ್ತಿದ್ದಾರೆ. ‘ಸಲ್ಮಾನ್ ಬಾಲಿವುಡ್‌ನ ಅತ್ಯುತ್ತಮ ನಟ, ಹೃದಯವಂತ’ ಎಂದೆಲ್ಲಾ ಹಾಡಿ ಹೊಗಳಿದ್ದಾರೆ ಕರಣ್. **
ಪೋರ್ಸ್ ಸಿಕ್ವೆಲ್‌ನಲ್ಲಿ ಜಾನ್ ಅಬ್ರಾಹಂ
ಜಾನ್ ಅಬ್ರಾಹಂ ಮತ್ತೊಂದು ಹೊಸ ಸಿನಿಮಾಗೆ ಸಹಿ ಹಾಕಿದ್ದಾರೆ. ಅಂದ ಹಾಗೇ ಸಿನಿಮಾದ ಹೆಸರು ‘ಫೋರ್ಸ್ 2’. ಹೌದು, ಅಬ್ರಾಹಂಗೆ ನೇಮ್ ಆ್ಯಂಡ್ ಫೇಮ್ ನೀಡಿದ ಸಿನಿಮಾಗಳ ಪೈಕಿ ಫೋರ್ಸ್ ಕೂಡಾ ಒಂದು. ಇದೀಗ ಅದರ ಸಿಕ್ವೆಲ್ ಹೀರೋ ಪಟ್ಟವೂ ಜಾನ್ ಅಬ್ರಾಹಂರನ್ನೇ ಹುಡುಕಿಕೊಂಡು ಬಂದಿದೆ.
ನಿಜ ಹೇಳೋದಾದ್ರೆ ಸದ್ಯ ಜಾನ್ ಸಿಕ್ಕಾಪಟ್ಟೆ ಬ್ಯುಸಿ. ಕೈಯಲ್ಲಿ ಹಲವಾರು ಸಿನಿಮಾಗಳು ಕುಣಿಯುತ್ತಿವೆ. ಆದರೂ ಈ ಹ್ಯಾಂಡ್‌ಸಮ್ ಕಿಂಗ್ ‘ಫೋರ್ಸ್ 2’ಗೆ ಒಕೆ ಅಂದಿದ್ದಾರೆ. ರಾಕಿ ಹ್ಯಾಂಡ್‌ಸಮ್, ಹೆರಾ ಫೆರಿ 3, ಡಿಶುಮ್ ಆ್ಯಂಡ್ ವೆಲ್‌ಕಮ್ ಬ್ಯಾಕ್ ಇವೆಲ್ಲಾ ಪ್ರಸ್ತುತ ಜಾನ್ ಕೈಯನ್ನು ತುಂಬಿಸಿರುವ ಸಿನಿಮಾಗಳ ಪಟ್ಟಿ. ಇಷ್ಟೆಲ್ಲಾ ಬಿಝಿ ಶೆಡ್ಯೂಲ್ ನಡುವೆ ಹೇಗೆ ಮತ್ತೊಂದು ಸಿನಿಮಾ ಮಾಡ್ತೀರಿ ಅಂತ ಕೇಳಿದ್ರೆ ‘ ನಾನು ಕೆಲಸದ ವಿಷಯದಲ್ಲಿ ಸೋಮಾರಿ ಅಲ್ಲ, ಎಕ್ಟ್ರಾ ಎಫರ್ಟ್ ಹಾಕಿ ಫೋರ್ಸ್ 2 ಮಾಡ್ತಿನಿ’ ಅಂತ ಸಕತ್ ಫೋರ್ಸ್‌ಲ್ಲಿ ಉತ್ತರ ಕೊಟ್ಟಿದ್ದಾರೆ.
ಈ ಸಿನಿಮಾದಲ್ಲಿ ಜಾನ್‌ಗೆ ಪ್ರೊಡ್ಯೂಸರ್ ಕಮ್ ಡೈರೆಕ್ಟರ್ ಆಗಿರೋ ವಿಪುಲ್ ಷಾ ಜೊತೆಯಾಗಲಿದ್ದಾರೆ ಎಂದು ಬಾಲಿವುಡ್ ಮೂಲಗಳು ತಿಳಿಸಿವೆ. ಒಟ್ಟಾರೆಯಾಗಿ ಜಾನ್ ಅಬ್ರಾಹಂ ಡಬಲ್ ಫೋರ್ಸ್‌ಲ್ಲಿ ಬರುವುದಂತೂ ಪಕ್ಕಾ ಆಗಿದೆ. **
ಸೌತ್‌ ಆಫ್ರಿಕಾದಲ್ಲಿ ಹೃತಿಕ್ ಟೂರ್
ನಟ ಹೃತೀಕ್ ರೋಷನ್ ಬಿಡುವಿಲ್ಲದ ಕೆಲಸಗಳ ನಡುವೆಯೂ ಮಕ್ಕಳ ಜೊತೆ ಟೂರ್‌ನಲ್ಲಿದ್ದಾರೆ.
ಮಕ್ಕಳಾದ ರಿಹಾನ್ ಹಾಗೂ ಹ್ರಿದಾನ್ ಜತೆ ಆಫ್ರಿಕಾದಲ್ಲಿ ಎಂಜಾಯ್ ಮಾಡುತ್ತಿದ್ದಾರೆ. ಕೆಲಸದ ಒತ್ತಡದ ನಡುವೆಯೂ ಅಪ್ಪ ತಮಗಾಗಿ ಟೈಮ್ ನೀಡಿರುವುದು ಮಕ್ಕಳಿಗೆ ಅಪಾರ ಖುಷಿ ಉಂಟು ಮಾಡಿದೆಯಂತೆ.
ಸಾಮಾಜಿಕ ಜಾಲ ತಾಣಗಳಲ್ಲಿ ಹೃತಿಕ್ ಈ ವಿಷಯವನ್ನು ಶೇರ್ ಮಾಡಿದ್ದಾರೆ. ಮಕ್ಕಳ ಜತೆ ತಾನು ಕಳೆದ ಜಾಲಿ ಟೈಮ್‌ನ ಪೋಟೋಗಳನ್ನು ಹಂಚಿಕೊಂಡಿದ್ದಾರೆ. ಪೋಟೋವೊಂದರಲ್ಲಿ ಅಳುತ್ತಿರುವ ತನ್ನ ಮಗನಂತೆ ತಾನೂ ಮುಖ ಸಪ್ಪಗೆ ಮಾಡಿ ಇಮಿಟೇಟ್ ಮಾಡಿದ್ದು, ‘ರಿಯಲ್ ಆರ್ ಫೇಕಿಂಗ್ ಇಟ್‌’ ಎಂಬ ಕ್ಯಾಪ್ಷನ್ ಕೊಟ್ಟಿದ್ದಾರೆ. ಒಟ್ಟಿನಲ್ಲಿ ಅಪ್ಪ ಮಕ್ಕಳು ಸಖತ್ತಾಗಿ ರಜೆಯ ಮಜ ಅನುಭವಿಸುತ್ತಿದ್ದಾರೆ.
