– ಶರಣು ಹುಲ್ಲೂರು
ಕನ್ನಡ ಸಿನಿಮಾರಂಗ ಕಂಡ ಅಪ್ರತಿಮ ಕಲಾವಿದ ಅನಂತ್‌ನಾಗ್. ಪಾತ್ರಕ್ಕಾಗಿ ಅವರನ್ನು ಒಪ್ಪಿಸುವುದು ಕಷ್ಟ. ಅದರಲ್ಲೂ ತೀರಾ ಹೊಸಲುಕ್ ಅಂದರೆ ಅವರಿಗೆ ಆಗದು. ಚೋಟುದ್ದ ಕೃತಕ ಗಡ್ಡ ಅಂಟಿಸಲು ಅವರು ಬಿಡುವುದಿಲ್ಲ. ಆದರೆ, ಇದೇ ಮೊದಲ ಬಾರಿಗೆ ಅವರು ಪ್ಲಸ್ ಚಿತ್ರಕ್ಕಾಗಿ ಹೊಸ ಗೆಟಪ್ ಹಾಕಿದ್ದಾರೆ. ಅದು ಕೇವಲ ಹೆಂಡತಿಗಾಗಿ ಅನ್ನುವುದು ಮತ್ತೊಂದು ವಿಶೇಷ.
ಗಡ್ಡ ವಿಜಿ ನಿರ್ದೇಶನದ ಪ್ಲಸ್ ಸಿನಿಮಾದಲ್ಲಿ ಅನಂತ್‌ನಾಗ್ ಶ್ರೀಮಂತ ಉದ್ಯಮಿಯ ಪಾತ್ರ ಮಾಡುತ್ತಿದ್ದಾರೆ. ಅದಕ್ಕಾಗಿ ಅವರು ಸಾಕಷ್ಟು ಬದಲಾಗಿದ್ದಾರೆ. ತಮ್ಮ ಹೇರ್‌ಸ್ಟೈಲ್ ಜತೆಗೆ ಗಡ್ಡ ಮೀಸೆಯ ಗೆಟಪ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಇದೇ ಮೊದಲ ಬಾರಿಗೆ ಅವರು ಇಂಥದ್ದೊಂದು ಪಾತ್ರ ಮಾಡುತ್ತಿರುವುದು ಮತ್ತೊಂದು ವಿಶೇಷ.
‘ನನಗೆ ಒಪ್ಪದ ಪಾತ್ರವನ್ನು ಯಾವತ್ತೂ ನಾನು ಮಾಡಿಲ್ಲ. ಮಾಡುವುದೂ ಇಲ್ಲ. ನಿರ್ದೇಶಕ ಗಡ್ಡ ವಿಜಿ ಅವರ ಪ್ಲಸ್ ಸಿನಿಮಾದ ಕತೆ ಹೇಳಿದಾಗ, ಪಾತ್ರ ಮಾಡಲು ಒಪ್ಪಿಕೊಂಡೆ. ಆನಂತರ ಅವರು ನನ್ನ ಪಾತ್ರದ ಗೆಟಪ್ ವಿವರಿಸಿದರು. ಅದು ನನಗೆ ಕಷ್ಟದ ಕೆಲಸ. ಹೀಗಾಗಿ ಒಪ್ಪಿಕೊಳ್ಳಲು ಹಿಂದೇಟು ಹಾಕಿದೆ. ಆ ಪಾತ್ರದ ಬಗ್ಗೆ ನನ್ನ ಪತ್ನಿ ಗಾಯಿತ್ರಿಯೂ ಒಂದು ಸಲ ಕೇಳಿದಳು. ಈ ಪಾತ್ರವನ್ನು ನೀವೇ ಮಾಡಬೇಕು ಎಂದರು. ಹೀಗಾಗಿ ಪಾತ್ರ ಒಪ್ಪಿಕೊಳ್ಳಬೇಕಾಯಿತು. ಈವರೆಗೂ ನಾನು ಇಂಥ ಪಾತ್ರದಲ್ಲಿ ಕಾಣಿಸಿಕೊಂಡಿಲ್ಲ. ಇದು ಹೊಸ ಬಗೆಯ ಪಾತ್ರ’ ಅನ್ನುವುದು ಅನಂತ್‌ನಾಗ್ ಮಾತು.
ಅನಂತ್‌ನಾಗ್ ಮೇಕೋವರ್ ಆಗುವುದರ ಹಿಂದೆ ಪತ್ನಿ ಗಾಯಿತ್ರಿ ಅವರ ಸಹಕಾರ ಸಾಕಷ್ಟಿದೆ ಅಂತಾರೆ ನಿರ್ದೇಶಕರು. ಈ ಗೆಟಪ್‌ಗಾಗಿ ನಿರ್ದೇಶಕರು ಮುಂಬೈನಿಂದ ಮೇಕಪ್ ಕಲಾವಿದರನ್ನು ಕರೆತಂದಿದ್ದರು. ಸಾಕಷ್ಟು ಉದ್ಯಮಿಗಳ ಗೆಟಪ್ ನೋಡಿದ ನಂತರ, ಈ ಹೊಸ ಗೆಟಪ್ ರೆಡಿ ಆಗಿದೆಯಂತೆ.
‘ಅನಂತ್‌ನಾಗ್ ಬಹುದೊಡ್ಡ ಕಲಾವಿದರು. ಅವರನ್ನು ಪಾತ್ರಕ್ಕಾಗಿ ಒಪ್ಪಿಸುವುದು ಕಷ್ಟ. ನಾವು ಅಂದುಕೊಂಡ ಪಾತ್ರಕ್ಕೆ ಕಂಡಿತಾ ಅವರು ಒಪ್ಪುವುದಿಲ್ಲ ಎಂದುಕೊಂಡೇ ಅವರ ಮನೆಗೆ ಹೋಗಿದ್ದೆವು. ಗೆಟಪ್ ಹೇಳಿದಾಗ ಹಿಂದೇಟು ಹಾಕಿದರು. ಇಡೀ ಸ್ಕ್ರೀನ್ ಪ್ಲೇ ಹೇಳುತ್ತೇನೆಂದು ಹೇಳಿದೆ. ಗಾಯಿತ್ರಿ ಮೇಡಂ ಮತ್ತು ಅನಂತ್ ಸಾರ್ ಇಬ್ಬರೂ ಸ್ಕ್ರೀನ್ ಪ್ಲೇ ಇಷ್ಟಪಟ್ಟರು. ಜತೆಗೆ ಗಾಯಿತ್ರಿ ಮೇಡಂ ಒತ್ತಾಯದಿಂದಾಗಿ ಚೇಂಜ್ ಓವರ್‌ಗೆ ಒಪ್ಪಿಕೊಂಡರು’ ಅಂತಾರೆ ನಿರ್ದೇಶಕ ವಿಜಿ. —
‘ಮೇಕೋವರ್ ಮಾಡಲು ಮುಂಬೈನಿಂದ ಸ್ಪೆಷಲಿಸ್ಟ್ ಬಂದಿದ್ದರು. ಹಲವು ಗೆಟಪ್ ನಂತರ ಒಂದೊಳ್ಳೆ ಲುಕ್ ಸಿಕ್ಕಿತು. ಅದನ್ನು ಅನಂತ್ ಸಾರ್ ಕೂಡ ಇಷ್ಟಪಟ್ಟರು. ಇಡೀ ಸಿನಿಮಾದಲ್ಲಿ ಅವರು ಅದೇ ಗೆಟಪ್‌ನಲ್ಲಿ ಕಾಣಿಸುತ್ತಾರೆ. ಅಲ್ಲದೇ ಈ ಚಿತ್ರಕ್ಕಾಗಿ ಅವರು ತಮ್ಮ ಹೇರ್ ಸ್ಟೈಲ್ ಕೂಡ ಬದಲಾಯಿಸಿದ್ದಾರೆ. – ಗಡ್ಡ ವಿಜಿ, ನಿರ್ದೇಶಕ
