ಭಜರಂಗಿ ಚಿತ್ರದಲ್ಲಿ ವಿಲನ್ ಆಗಿ ನಟಿಸಿ ಗಮನ ಸೆಳೆದಿದ್ದ ಲೋಕಿ, ಈಗ ಹೊಸಬರೇ ಹೆಚ್ಚಾಗಿರುವ ‘ಜಸ್ಟ್ ಮದ್ವೇಲಿ’ ಚಿತ್ರದಲ್ಲಿ ಮತ್ತೆ ವಿಲನ್ ಆಗಿ ಕಾಣಿಸಿಕೊಂಡಿದ್ದಾರೆ.
ತುಮಕೂರು ಸೀನ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಈ ಚಿತ್ರದಲ್ಲಿ ಇವರು, ಹಳ್ಳಿಯಲ್ಲಿ ತಾನು ಬಯಸಿದ್ದೆಲ್ಲಾ ಸಿಗಬೇಕು ಎಂಬ ಅಹಂಕಾರಿಯ ಪಾತ್ರದಲ್ಲಿ ನಟಿಸಿದ್ದಾರೆ. ಬಯಸಿದ ಹುಡುಗಿ ತನ್ನ ಕಾಲ ಬುಡದಲ್ಲಿ ಬಿದ್ದಿರಬೇಕು ಎಂದು ಬಯಸುವ ಅವನು, ನಾಯಕಿಯನ್ನು ನೋಡಿ ಮರುಳಾಗುತ್ತಾನೆ. ಮದುವೆಯಾಗ ಬಯಸುತ್ತಾನೆ. ಆಗ ಮದುವೆ ಮನೆಯಲ್ಲಿ ಏನಾಗುತ್ತದೆಯೋ ಅದು ಸಿನಿಮಾ.
‘ಚಿತ್ರದಲ್ಲಿ 5 ದಿನ ಮಳೆಯಲ್ಲೇ ಫೈಟ್ ಶೂಟ್ ಮಾಡಿದ್ದೇವೆ. ಡಿಫರೆಂಟ್ ಡ್ಯಾನಿ ಡೈರೆಕ್ಷನ್‌ನಲ್ಲಿ ಆಕ್ಷನ್ ದೃಶ್ಯಗಳನ್ನು ಸೆರೆ ಹಿಡಿದಿದ್ದಾರೆ. ಸಿನಿಮಾ ತುಂಬಾ ಚೆನ್ನಾಗಿ ಬಂದಿದೆ’ ಎಂದಿದ್ದಾರೆ. ಪಾತ್ರಕ್ಕೆ ತುಂಬಾ ಪ್ರಾಮುಖ್ಯತೆ ಇದೆ. ಹೀಗಾಗಿ ತಮ್ಮ ವೃತ್ತಿ ಬದುಕಿನ ದಿಕ್ಕನ್ನು ಈ ಸಿನಿಮಾ ಬದಲಿಸಬಹುದು ಎಂಬ ವಿಶ್ವಾಸ ಲೋಕಿಯದ್ದು.
ಸವಾರಿ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟಿರುವ ಇವರು, ಹತ್ತು ವರ್ಷಗಳಿಂದ ಒಳ್ಳೆಯ ಅವಕಾಶಕ್ಕಾಗಿ ಕಾದಿದ್ದರು. ಆಗ ಸಿಕ್ಕಿದ್ದೇ ಭಜರಂಗಿ ಚಿತ್ರ. ಸ್ಯಾಂಡಲ್‌ವುಡ್‌ನ ವಿಲನ್ ಆಗಿ ಹೊರಹೊಮ್ಮಿದ ಇವರು, ಈಗ ‘ರಥಾವರ’ ಚಿತ್ರದಲ್ಲೂ ಶ್ರೀಮುರಳಿ ಎದುರು ವಿಲನ್ ಆಗಿ ಕಾಣಿಸಿಕೊಂಡಿದ್ದಾರೆ.
‘ವಿಲನ್ ಪಾತ್ರವಾದರೂ ವಿಭಿನ್ನ ಶೇಡ್‌ಗಳಿವೆ. ಇದು ನನಗೆ ಖುಷಿ ಕೊಟ್ಟಿದೆ. ಭಜರಂಗಿಯಲ್ಲಿ ಎಪಿಕ್ ಕಾಲದ ವಿಲನ್ ಆಗಿದ್ದೆ. ಜಸ್ಟ್ ಮದ್ವೇಲಿ ಹಳ್ಳಿಯವರ ತರ ಇದ್ದೇನೆ. ಹೀಗೆ ವಿಲನ್ ಪಾತ್ರದಲ್ಲೂ ವೈವಿಧ್ಯತೆ ಇದೆ’ ಎಂದಿದ್ದಾರೆ.
ಕ್ರೀಡಾ ಪಟುವಾದ ಲೋಕಿ, ಪಾತ್ರ ಡಿಮ್ಯಾಂಡ್ ಮಾಡುವಂತೆ ಬಾಡಿ ಬಿಲ್ಡ್ ಮಾಡುವುದಾಗಿ ಹೇಳಿದ್ದಾರೆ. ಹೊಸ ಚಿತ್ರಕ್ಕೆ 10 ಕೆ.ಜಿ ತೂಕ ಹೆಚ್ಚಿಸಿಕೊಂಡಿದ್ದು ವಿಶೇಷ.
