ಚಿತ್ರ: ಬೇಬಿ (ಹಿಂದಿ)
ತಾರಾಗಣ: ಅಕ್ಷಯ್‌ ಕುಮಾರ್, ರಾಣಾ ದಗ್ಗುಬಾಟಿ, ಅನುಪಮ್‌ ಖೇರ್, ಕೆ.ಕೆ. ಮೆನನ್, ಡ್ಯಾನಿ ಡೆನ್‌ಜೊಂಗ್‌ಪಾ, ತಾಪಸಿ ಪನ್ನು, ರಶೀದ್‌ ನಾಜ್‌, ಮಿಕಾಲ್ ಜುಲ್ಫೀಕರ್‌ ಮತ್ತಿತರರು.
ನಿರ್ದೇಶನ: ನೀರಜ್‌ ಪಾಂಡೆ
ನಿರ್ಮಾಪಕರು: ಭೂಷಣ್ ಕುಮಾರ್, ಕೃಷ್ಣಕುಮಾರ್, ಶೀತಲ್‌ ಭಾಟಿಯ
ಆಧುನಿಕ ಸಂದರ್ಭದಲ್ಲಿ ಭಾರತೀಯ ಸಿನಿಮಾಗಳ ಸ್ಕ್ರೀನ್‌ಪ್ಲೇಗಳು ಒಂದೋ ಹೆಚ್ಚು ಬುದ್ಧಿ ಓಡಿಸಿ ತಯಾರಾಗುತ್ತವೆ, ಇಲ್ಲವೇ ಭಾವದ ಗಾಮಿನಿ ಅಡಗಿಸಿಟ್ಟುಕೊಂಡು ರೂಪಿತವಾಗುತ್ತವೆ. ನೀರಜ್‌ ಪಾಂಡೆ ಮೊದಲಿನಿಂದಲೂ ಬುದ್ಧಿಗೆ ಹೆಚ್ಚು ಕೆಲಸ ಕೊಡುವ ನಿರ್ದೇಶಕ. ಅವರ ‘ವೆಡ್‌ನೆಸ್‌ಡೇ’, ‘ಸ್ಪೆಷಲ್‌ 26’ ಎರಡೂ ಹಿಂದಿ ಸಿನಿಮಾಗಳು ಇದೇ ಜಾಯಮಾನದವು. ಆ ಪಟ್ಟಿಗೆ ಇನ್ನೊಂದು ಅರ್ಥಪೂರ್ಣ ಸೇರ್ಪಡೆ ‘ಬೇಬಿ’.
ಭಯೋತ್ಪಾದನೆಯ ಸೂಕ್ಷ್ಮ ಎಳೆಗಳ ಸಿನಿಮಾ ಎಂದು ಭಾವನಾತ್ಮಕ ದೃಷ್ಟಿಯಿಂದ ಹೇಳಲು ಸಾಧ್ಯವಿಲ್ಲ. ಆದರೆ, ಭಯೋತ್ಪಾದನೆ ಹಿನ್ನೆಲೆಯ ಹಿಡಿದಿಟ್ಟುಕೊಳ್ಳುವ ಥ್ರಿಲ್ಲರ್‌ ಎಂದು ನಿಸ್ಸಂಶಯವಾಗಿ ಹೇಳಬಹುದು. ತಾವು ಸೃಜಿಸಿದ ಹಲವು ದೃಶ್ಯಗಳಿಗೆ ಅಂತ್ಯಗಳನ್ನು ಒದಗಿಸುವ ಮೂಲಕ ಸಿನಿಮಾಗೆ ‘ಎಪಿಸೋಡಿಕ್‌’ ಗುಣವನ್ನು ನೀರಜ್‌ ಪಾಂಡೆ ದಕ್ಕಿಸಿಕೊಡುತ್ತಾರೆ.
ಕಂತು ಕಂತಾಗಿ ದಾಟಬಲ್ಲ ಸಿನಿಮಾ ಇದಾಗುವುದರಿಂದ ಕಥಾನಕ ಲಂಬಿಸಿದರೂ, ಅದು ಅರಿವಿಗೆ ಬಾರದಂತೆ ಮಾಡುವ ನಿರೂಪಣಾ ತಂತ್ರ ಅದು. ಕ್ಯಾಮೆರಾ ಹರಿದಾಡುವ ದೃಷ್ಟಿಕೋನ ಕೂಡ ಥ್ರಿಲ್ಲರ್‌ ಅಂಶಗಳಿಗೆ ಚ್ಯುತಿ ಬಾರದಿರಲಿ ಎಂಬ ನಿಜದೆಚ್ಚರದಂತೆ ಭಾಸವಾಗುತ್ತದೆ. ಮಾಮೂಲಿ ಕಮರ್ಷಿಯಲ್‌ ಸಿನಿಮಾಗಳ ಸೂತ್ರವನ್ನು ಧಿಕ್ಕರಿಸುವ ನೀರಜ್‌, ಥ್ರಿಲ್ಲರ್‌ ಅಂಶಗಳನ್ನು ಸಿನಿಮಾದ ಉದ್ದಕ್ಕೂ ಉಳಿಸಿಕೊಂಡು ಹೋಗುತ್ತಾರೆ.
ಈ ಅನುಕೂಲಕ್ಕೆ ಅವರು ಸೂಕ್ತ ತಾರಾಬಳಗವನ್ನು ನೆಚ್ಚಿಕೊಂಡಿದ್ದಾರೆ. ಶ್ರೀ ನಾರಾಯಣ್‌ ಸಿಂಗ್‌ ಸಂಕಲನ ಸಿನಿಮಾದ ಓಘದ ಹದವನ್ನು ಕಾಯ್ದಿದೆ. ಸುದೀಪ್‌ ಚಟರ್ಜಿ ಕ್ಯಾಮೆರಾ ಭಾರತ, ನೇಪಾಳ, ಟರ್ಕಿ, ಮಧ್ಯಪ್ರಾಚ್ಯ ಎಲ್ಲೆಡೆ ಓಡಾಡಿ ಬಂದಿದೆಯಾದರೂ ಲೊಕೇಷನ್‌ಗಳು ಅದಕ್ಕೇನೂ ಮುಖ್ಯವಾಗಿಲ್ಲ. ವೇಗ, ಥ್ರಿಲ್‌ ಎರಡಕ್ಕೇ ಆದ್ಯತೆ.
ಗಾಂಭೀರ್ಯದ ವಿಷಯದಲ್ಲಿ ಹೆಚ್ಚು ಸಾಂದ್ರ ಎನ್ನಬಹುದಾದ ಈ ಸಿನಿಮಾದಲ್ಲಿ ಅಲ್ಲಲ್ಲಿ ಆಸಕ್ತಿಕರ ‘ರಿಲೀಫ್‌’ಗಳನ್ನೂ ಒದಗಿಸಿದ್ದಾರೆ. ಅವೂ ಶಿಕ್ಷೆ, ದಂಡನೆಯ ಅಭಿವ್ಯಕ್ತಿಯೇ ಆಗುವುದು ಆಧುನಿಕ ಹಿಂಸಾಚಾರ ಒಡ್ಡಿರುವ ಆತಂಕದ ತೀವ್ರತೆಯನ್ನು ಬಿಂಬಿಸುತ್ತವೆ. ಮೊದಲಾರ್ಧದಲ್ಲಿ ದೃಶ್ಯಾವಳಿಗಳ ಅತಿ ಚಲನಶೀಲತೆಯಿಂದ ಸಾಗುವ ಸಿನಿಮಾ ಎರಡನೇ ಅರ್ಧದಲ್ಲಿ ದೀರ್ಘಾವಧಿ ಅಂತ್ಯದ ಮೂಲಕ ಗಮನ ಸೆಳೆಯುತ್ತದೆ.
ಮುಂದೇನಾದೀತು ಎನ್ನುವ ಕುತೂಹಲ, ಸಂಸಾರದ ಒತ್ತಡಗಳನ್ನು ಮೀರಿ ಕೆಲಸ ಮಾಡುವ ಪೊಲೀಸ್‌ ನಿಷ್ಠೆ ಎರಡನ್ನೂ ಮೆಲೋಡ್ರಾಮಾಗಳಿಲ್ಲದೆ ಹೇಳಿರುವುದು ನೀರಜ್‌ ಕಸುಬುದಾರಿಕೆಗೆ ಸಾಕ್ಷಿ. ಅಕ್ಷಯ್‌ ದೇಹ, ಚಹರೆ ಈ ಪಾತ್ರಕ್ಕೆ ಅಕ್ಷರಶಃ ಹೊಂದುತ್ತದೆ. ರಾಣಾ ದಗ್ಗುಬಾಟಿಗೆ ನಟಿಸಲು ಹೆಚ್ಚೇನೂ ಇಲ್ಲವಾದರೂ ಒಂದು ಪ್ರಮುಖ ಸಿನಿಮಾದ ಭಾಗವಾಗಿದ್ದಾರೆ ಎನ್ನಲಡ್ಡಿಯಿಲ್ಲ. ಅನುಪಮ್‌ ಖೇರ್ ಅವರದ್ದು ಎಂದಿನ ಲಹರಿಯ ಅಭಿನಯ. ಪತ್ತೇದಾರಿ ಕಾದಂಬರಿಯನ್ನು ಓದಿದ ರಸಾನುಭವ ದಕ್ಕಿಸಿಕೊಡುವ ‘ಬೇಬಿ’ ನಿಜಕ್ಕೂ ಭಿನ್ನ.
