ಬಹುಪರಾಕ್ ನಂತರ ನಿರ್ದೇಶಕ ಸುನಿ ಯಾವುದೇ ಸಿನಿಮಾ ಕೈಗೆತ್ತಿಕೊಳ್ಳದೇ ಸಿನಿಮಾ ಸಂಬಂಧಿ ಕಾರ‌್ಯಕ್ರಮಗಳಲ್ಲಿ ಮಾತ್ರ ಕಾಣಿಸಿಕೊಳ್ಳುತ್ತಿದ್ದಾರೆ. ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಹೊಸ ತಿರುವು ನೀಡಿದ ಇವರು, ಆನಂತರ ಅಂದುಕೊಂಡಷ್ಟು ಗೆಲುವು ಸಾಧಿಸಲಿಲ್ಲ. ಅವರ ನಿರ್ದೇಶನದ ಬಹುಪರಾಕ್ ಚಿತ್ರ ಕೂಡ ಬಾಕ್ಸ್ ಆಫೀಸ್‌ಲ್ಲಿ ಗೆಲ್ಲಲಿಲ್ಲ. ಆನಂತರ ಧ್ರುವ ಸರ್ಜಾ ಅವರ ಸಿನಿಮಾವೊಂದನ್ನು ನಿರ್ದೇಶನ ಮಾಡುತ್ತಿದ್ದಾರೆ ಎಂದು ಸುದ್ದಿ ಆಯಿತು. ಅದೂ ಕೂಡ ಸುಳ್ಳಾಯಿತು. ಈಗ ಮತ್ತೊಂದು ಸುದ್ದಿ ಗಾಂಧಿ ನಗರದಲ್ಲಿ ಹರಿದಾಡುತ್ತಿದೆ. ಸದ್ಯ ಸುನಿ ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿಯ ಮುಂದುವರೆದ ಭಾಗವನ್ನು ಬರೆಯುತ್ತಾ ಕೂತಿದ್ದಾರೆ. ಅದಕ್ಕೆ ಸಿಂಪಲ್ಲಾಗ್ ಮತ್ತೊಂದ್ ಸ್ಟೋರಿ ಎಂದು ಹೆಸರಿಟಿದ್ದಾರೆ. ಈ ಚಿತ್ರಕ್ಕೆ ಮೇಘಾನಾ ಗಾಂವ್ಕರ್ ನಾಯಕಿಯಾಗಿದ್ದು, ಇನ್ನಷ್ಟೇ ನಾಯಕನ ಆಯ್ಕೆಯೂ ನಡೆಯಲಿಯಂತೆ.
ಅಂದುಕೊಂಡಂತೆ ಆಗಿದ್ದರೆ ಸುನಿ ಈಗಾಗಲೇ ಶಿವರಾಜ್‌ಕುಮಾರ್ ಅಭಿನಯದ ಮನಮೋಹಕ ಸಿನಿಮಾ ಮಾಡಬೇಕಿತ್ತು. ಜತೆಗೆ ಧ್ರುವ ಸರ್ಜಾ ಅವರ ಸಿನಿಮಾಗೂ ಆಕ್ಷನ್ ಕಟ್ ಹೇಳಬೇಕಿತ್ತು. ಎಲ್ಲವನ್ನೂ ಬದಿಗಿಟ್ಟು ಸಿಂಪಲ್ಲಾಗ್ ಮತ್ತೊಂದ್ ಸ್ಟೋರಿ ಕೈಗೆತ್ತಿಕೊಂಡಿದ್ದಾರೆ. ಕಾರಣ ಈ ಸಿನಿಮಾ ಕೂಡ ಕಡಿಮೆ ಬಜೆಟ್ ಚಿತ್ರವಂತೆ.
ಅತೀ ಕಡಿಮೆ ಬಜೆಟ್‌ಲ್ಲಿ ಸಿನಿಮಾ ಮಾಡಿ, ಭಾರೀ ಲಾಭ ತಂದು ಕೊಟ್ಟಿದ್ದು ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ ಸಿನಿಮಾ. ಅಲ್ಲದೇ ಬಹುತೇಕ ತಂತ್ರಜ್ಞರಿಗೆ ಮತ್ತು ನಾಯಕ, ನಾಯಕಿಗೆ ಹೆಸರು ತಂದುಕೊಟ್ಟ ಸಿನಿಮಾ ಅದು. ಹೀಗಾಗಿ ಮತ್ತೆ ಅದೇ ಹಾದಿಯಲ್ಲೇ ಸುನಿ ನಡೆಯುತ್ತಿದ್ದಾರೆ. ಜತೆಗೆ ಬಹುತೇಕ ಹೊಸಬರಿಗೆ ಈ ಚಿತ್ರದಲ್ಲಿ ಅವಕಾಶ ಕೊಡುತ್ತಿದ್ದಾರೆ.
