ನಾಗಾರ್ಜುನ್ ಮತ್ತು ಕಾರ್ತಿ ಒಟ್ಟಾಗಿ ಸಿನಿಮಾವೊಂದರಲ್ಲಿ ನಟಿಸುತ್ತಿರುವ ಸುದ್ದಿಯು ಎಲ್ಲರಿಗೂ ಗೊತ್ತೇ ಇದೆ. ಇದು ತೆಲುಗು ಮತ್ತು ತಮಿಳಿನಲ್ಲಿ ತೆರೆ ಕಾಣಲಿರುವ ಚಿತ್ರ ಎಂಬುದೂ ರಂಗು ರಂಗಾಗಿ ವರದಿಯಾಗಿದೆ.
ಇದೇ ಚಿತ್ರದಲ್ಲಿ ಇದೀಗ ಶ್ರುತಿ ಹಾಸನ್ ಅಭಿನಯಿಸಲಿದ್ದಾರೆ ಎಂಬುದು ಹೊಸ ವಿಷಯ. ಇದರಲ್ಲಿ ಕಾರ್ತಿಗೆ ಜೋಡಿಯಾಗಿ ಶ್ರುತಿ ಹಾಸನ್ ಅಭಿನಯಿಸಲಿದ್ದಾರೆ ಎಂದು ನಿರ್ದೇಶಕ ವಂಶಿ ಪೈಡಿಪಳ್ಳಿ ಖಚಿತಪಡಿಸಿದ್ದಾರೆ. ‘ಬಹು ತಾರಾಗಣದ ಈ ಚಿತ್ರದಲ್ಲಿ ಶ್ರುತಿ ಅವರದ್ದು ಪ್ರಮುಖ ಪಾತ್ರವಾಗಿದೆ. ಇಂಥದೊಂದು ವಿಶಿಷ್ಟ ಪಾತ್ರದಲ್ಲಿ ಶ್ರುತಿ ಕಾಣಿಸಿಕೊಳ್ಳುತ್ತಿರುವುದು ಇದೇ ಮೊದಲು’ ಎಂದು ವಂಶಿ ಹೇಳಿದ್ದಾರೆ. ಫೆಬ್ರವರಿಯಲ್ಲಿ ಶೂಟಿಂಗ್ ಆರಂಭವಾಗುವ ಸಾಧ್ಯತೆಗಳು ಇವೆ.
‘ನಾಗಾರ್ಜುನ ಮತ್ತು ಕಾರ್ತಿ ಪಾತ್ರಗಳು ವಿಶಿಷ್ಟವಾಗಿದೆ ಮತ್ತು ಮನಮುಟ್ಟುವಂತಿವೆ. ಸ್ಕ್ರಿಪ್ಟ್ ನೋಡಿದ ಎಲ್ಲರೂ ಹರ್ಷಗೊಂಡಿದ್ದಾರೆ. ನಾಗಾರ್ಜುನ್, ಕಾರ್ತಿ ಮತ್ತು ಶ್ರುತಿಯಂಥ ನಟರು ಅಭಿನಯಿಸಲು ಒಪ್ಪಿಕೊಂಡಿರುವುದೇ ನಮ್ಮ ಅರ್ಧ ಕೆಲಸವಾದಂತೆ ಆಗಿದೆ’ ಎಂದು ವಂಶಿ ಹೇಳಿದ್ಧಾರೆ.
ನಾಗಾರ್ಜುನಗೆ ಜೋಡಿಯಾಗಿ ಅಭಿನಯಿಸಲು ಸೂಕ್ತವಾದ ನಟಿಯ ಹುಡುಕಾಟದಲ್ಲಿದ್ದಾರೆ ನಿರ್ಮಾಪಕರು.
