ವಸೂಲಾಗದ ಸಾಲದ ಹೊರೆ: ಬ್ಯಾಂಕ್‌ಗಳ ನಷ್ಟ ಇನ್ನಷ್ಟು ಹೆಚ್ಚಳ

ಮುಂಬಯಿ: ವಸೂಲಾಗದ ಸಾಲಗಳಿಂದಾಗಿ ದೇಶದ ಬ್ಯಾಂಕಿಂಗ್ ವಲಯದ ಆರೋಗ್ಯ ಸ್ಥಿತಿ ಮತ್ತಷ್ಟು ಬಿಗಡಾಯಿಸುವ ಲಕ್ಷಣ ಗೋಚರಿಸುತ್ತಿದೆ ಎಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ (ಆರ್‌ಬಿಐ) ಹೇಳಿದೆ. 2018ರ ಮಾರ್ಚ್‌ ಅಂತ್ಯಕ್ಕೆ ಶೇ 11.6ರಷ್ಟಿದ್ದ ಒಟ್ಟು ಅನುತ್ಪಾದಕ ಆಸ್ತಿಗಳ (ವಸೂಲಾಗದ ಸಾಲ) ಅನುಪಾತ ಪ್ರಸಕ್ತ ಹಣಕಾಸು ವರ್ಷದ ಅಂತ್ಯಕ್ಕೆ ಶೇ 12.2ಕ್ಕೆ ಏರುವ ನಿರೀಕ್ಷೆಯಿದೆ.

ಹಣಕಾಸು ಸ್ಥಿರತೆ ವರದಿ (ಎಫ್‌ಎಸ್‌ಆರ್‌)ಯಲ್ಲಿ ಆರ್‌ಬಿಐ, ಬ್ಯಾಂಕಿಂಗ್ ವಲಯದ ಒಟ್ಟು ಅನುತ್ಪಾದಕ ಮುಂಗಡಗಳ ಅನುಪಾತ ಮತ್ತಷ್ಟು ಹೆಚ್ಚಲಿದೆ ಎಂದು ಭವಿಷ್ಯ ನುಡಿದಿದೆ.

‘ಪ್ರಸಕ್ತ ಮ್ಯಾಕ್ರೋ ಆರ್ಥಿಕ ಮೇಲ್ನೋಟದ ಪ್ರಕಾರ, 2018ರ ಮಾರ್ಚ್‌ ಅಂತ್ಯಕ್ಕೆ ಶೇ 11.6ರಷ್ಟಿದ್ದ ಷೆಡ್ಯೂಲ್ಡ್‌ ವಾಣಿಜ್ಯ ಬ್ಯಾಂಕ್‌ಗಳ ಜಿಎನ್‌ಪಿಎ (ಒಟ್ಟಾರೆ ಅನುತ್ಪಾದಕ ಆಸ್ತಿ) ಅನುಪಾತವು 2019ರ ಮಾರ್ಚ್‌ ಅಂತ್ಯಕ್ಕೆ ಶೇ 12.2ಕ್ಕೆ ಹೆಚ್ಚಲಿದೆ’ ಎಂದು ವರದಿ ಹೇಳಿದೆ.

ತಪ್ಪುಗಳನ್ನು ಕ್ಷಿಪ್ರವಾಗಿ ಸರಿಪಡಿಸಿಕೊಳ್ಳುವ (ಪಿಸಿಎ) ಆರ್‌ಬಿಐ ಮಾರ್ಗಸೂಚಿ ಅನುಸಾರ ತೀರಾ ಕಳಪೆ ನಿರ್ವಹಣೆ ತೋರಿವೆ. ಈ ಬ್ಯಾಂಕುಗಳ ಜಿಎನ್‌ಪಿಎ ಅನುಪಾತವು 2018ರ ಮಾರ್ಚ್‌ ಅಂತ್ಯಕ್ಕೆ ಶೇ 21ರಷ್ಟಿತ್ತು. ಅದು 2019ರ ಮಾರ್ಚ್‌ ಅಂತ್ಯಕ್ಕೆ ಶೇ 22.3ಕ್ಕೆ ಏರಲಿದೆ ಎಂದು ಆರ್‌ಬಿಐ ಹೇಳಿದೆ.

ಈ 11 ಬ್ಯಾಂಕ್‌ಗಳ ಪೈಕಿ 6 ಬ್ಯಾಂಕ್‌ಗಳು ಬಂಡವಾಳದ ಕೊರತೆ ಅನುಭವಿಸಲಿದ್ದು ಅವುಗಳ ಕನಿಷ್ಠ ಅಪಾಯ ಕೇಂದ್ರಿತ ಆಸ್ತಿಗಳ ಅನುಪಾತ (ಸಿಆರ್‌ಎಆರ್‌- ರಿಸ್ಕ್‌ ವೆಯ್ಟೆಡ್‌ ಅಸೆಟ್ಸ್‌ ರೇಷಿಯೊ) ಶೇ 9ಕ್ಕಿಂತ ಕಡಿಮೆ ಇರಲಿದೆ.

ಪಿಸಿಎ ಚೌಕಟ್ಟಿನಡಿ ಕಳಪೆ ನಿರ್ವಹಣೆ ತೋರಿದ 11 ಬ್ಯಾಂಕ್‌ಗಳೆಂದರೆ- ಐಡಿಬಿಐ ಬ್ಯಾಂಕ್‌, ಯುಕೋ ಬ್ಯಾಂಕ್‌, ಸೆಂಟ್ರಲ್ ಬ್ಯಾಂಕ್‌ ಆಫ್‌ ಇಂಡಿಯಾ, ಬ್ಯಾಂಕ್ ಆಫ್‌ ಇಂಡಿಯಾ, ಇಂಡಿಯನ್ ಓವರ್‌ಸೀಸ್ ಬ್ಯಾಂಕ್‌, ದೇನಾ ಬ್ಯಾಂಕ್‌, ಓರಿಯೆಂಟಲ್ ಬ್ಯಾಂಕ್‌ ಆಫ್ ಕಾಮರ್ಸ್‌, ಬ್ಯಾಂಕ್‌ ಆಫ್ ಮಹಾರಾಷ್ಟ್ರ, ಯುನೈಟೆಡ್ ಬ್ಯಾಂಕ್ ಆಫ್ ಇಂಡಿಯಾ, ಕಾರ್ಪೊರೇಶನ್ ಬ್ಯಾಂಕ್‌ ಮತ್ತು ಅಲಹಾಬಾದ್ ಬ್ಯಾಂಕ್‌. ಈ ಬ್ಯಾಂಕ್‌ಗಳ ಸ್ಥಿತಿಗತಿ ಮೇಲೆ ಆರ್‌ಬಿಐ ತೀವ್ರ ನಿಗಾ ಇರಿಸಿದೆ.