ಹೊಸದಿಲ್ಲಿ: ಸೇನೆ ಮೇಜರ್ ಪತ್ನಿಯನ್ನು ಗೆಳೆಯನೇ ಕೊಂದಿರುವ ಪ್ರಕರಣ ಇಡೀ ದೇಶದ ಗಮನ ಸೆಳೆದಿದ್ದು, ಆರೋಪಿ ಮೇಜರ್ ನಿಖಿಲ್ ರಾಯ್ ಹಾಂಡ ಬಗ್ಗೆ ಮತ್ತಷ್ಟು ಮಾಹಿತಿಗಳು ಬಯಲಾಗಿವೆ. ಮೇಜರ್ ನಿಖಿಲ್ ರಾಯ್‌ಗೆ ಸೇನೆಯಲ್ಲಿ ಹೆಚ್ಚು ಗೆಳೆಯರಿರಲಿಲ್ಲ ಎಂಬುದು ಬೆಳಕಿಗೆ ಬಂದಿದ್ದು, ಆದರೆ ಫೇಸ್‌ಬುಕ್‌ನಲ್ಲಿ ಮಾತ್ರ ಹೆಚ್ಚು ಸಕ್ರಿಯರಾಗಿದ್ದರಂತೆ. ಫೇಸ್‌ಬುಕ್ ಮೂಲಕವೇ ಮೊದಲ ಬಾರಿಗೆ ಶೈಲಜಾ ಫೋಟೋ ನೋಡಿದ್ದ ಆರೋಪಿ, ಆಕೆಯನ್ನು ಪರಿಚಯ ಮಾಡಿಕೊಳ್ಳಲು ಪತಿ ಮೇಜರ್ ಅಮಿತ್ ದ್ವಿವೇದಿಯ ಗೆಳೆತನ ಸಂಪಾದಿಸಿದ್ದ ಎಂದು ತನಿಖೆ ವೇಳೆ ಬಯಲಿಗೆ ಬಂದಿದೆ.
2015ರಲ್ಲಿ ಮೊದಲ ಬಾರಿಗೆ ಫೇಸ್‌ಬುಕ್‌ನಲ್ಲಿ ಶೈಲಜಾ ಫೋಟೋ ನೋಡಿದ್ದ ಆರೋಪಿ, ಆಕೆಯ ಪತಿ ಮೇಜರ್ ಅಮಿತ ದ್ವಿವೇದಿಯನ್ನು ಗೆಳೆಯನ್ನಾಗಿ ಮಾಡಿಕೊಂಡಿದ್ದಾನೆ. ದ್ವಿವೇದಿ ಮನೆಯಲ್ಲಿ ನಡೆಯುವ ಪಾರ್ಟಿಗಳಲ್ಲಿ ಭಾಗಿಯಾಗಲು ಗೆಳೆತನ ಸಂಪಾದಿಸಿದ್ದಾಗಿ ತನಿಖೆ ವೇಳೆ ಬೆಳಕಿಗೆ ಬಂದಿದೆ. ಗೆಳೆತನ ಸಂಪಾದಿಸಿದ ಬಳಿಕ ನಾಗಾಲ್ಯಾಂಡ್‌ನಲ್ಲಿರುವ ಮೇಜರ್ ದ್ವಿವೇದಿ ನಿವಾಸಕ್ಕೆ ಮೇಜರ್ ನಿಖಿಲ್ ಹಾಂಡ ಸಾಕಷ್ಟು ಬಾರಿ ಭೇಟಿ ಕೊಟ್ಟಿದ್ದ. ಹಾಗೆ, ಅವರಿಬ್ಬರ ನಡುವೆ ಗೆಳೆತನವೂ ಚೆನ್ನಾಗಿತ್ತು. ಆದರೆ ಪತ್ನಿ ಜತೆಗೆ ಹಾಂಡ ವಿಡಿಯೋ ಕಾಲ್‌ನಲ್ಲಿ ಮಾತನಾಡುತ್ತಿದ್ದದ್ದನ್ನು ನೋಡಿದ ಬಳಿಕ ಹಾಂಡ ತನ್ನ ಮನೆಗೆ ಬರುವುದು ಬೇಡ ಎಂದು ದ್ವಿವೇದಿ ಹೇಳಿದ್ದರು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ
ಅಲ್ಲದೆ, ಸೇನೆಯಲ್ಲಿ ಸಹ ಮೇಜರ್ ಹಾಂಡ ಇತ್ತೀಚೆಗೆ ಸರಿಯಾಗಿ ಕೆಲಸ ಮಾಡುತ್ತಿರಲಿಲ್ಲ ಎಂದು ಪೊಲೀಸರು ಆರೋಪಿಸಿದ್ದು, ಕಳೆದ ಎರಡು ವರ್ಷಗಳಿಂದ ಮೇಜರ್ ದ್ವಿವೇದಿಗೆ ವಿಚ್ಛೇದನ ನೀಡಿ ತನ್ನ ಜತೆ ಸಂಸಾರ ಮಾಡು ಎಂದು ಶೈಲಜಾಗೆ ಹಾಂಡ ಒತ್ತಾಯಿಸಿದ್ದ ಎಂದು ಬೆಳಕಿಗೆ ಬಂದಿದೆ. ಜತೆಗೆ ಶೈಲಜಾಳ ಮನವೊಲಿಸಲು ತನ್ನ ಪತ್ನಿ ಜತೆಗೆ ಹಾಂಡ ಜಗಳದ ನಾಟಕವಾಡುತ್ತಿದ್ದ ಎಂದು ತಿಳಿದುಬಂದಿದೆ. ಹಾಗೆ, ಶೈಲಜಾಳನ್ನು ಹತ್ಯೆ ಮಾಡದ ಹೊರತು ತನಗೆ ಬೇರೆ ಯಾವುದೇ ಆಯ್ಕೆ ಇರಲಿಲ್ಲ ಎಂದು ಸಹ ಮೇಜರ್ ಹಾಂಡ ದೆಹಲಿ ಪೊಲೀಸರಿಗೆ ಹೇಳಿರುವುದಾಗಿ ಪೊಲೀಸ್ ಮೂಲಗಳು ಮಾಹಿತಿ ನೀಡಿವೆ.
ಇನ್ನೊಂದೆಡೆ, ಪತಿಯ ಮೇಲೆ ನನಗೆ ಹಲವು ಬಾರಿ ಅನುಮಾನ ಬಂದಿದ್ದರೂ ಸಹ ಅವರು ನನ್ನ ಮನವೊಲಿಸುತ್ತಿದ್ದರು. ಹೀಗಾಗಿ ನಾನು ಅವರನ್ನು ನಂಬುತ್ತಿದ್ದೆ. ಅಲ್ಲದೆ, ನಮ್ಮಿಬ್ಬರ ನಡುವೆ ಯಾವುದೇ ಭಿನ್ನಾಭಿಪ್ರಾಯಗಳಿರಲಿಲ್ಲ. ನಾವಿಬ್ಬರು ಖುಷಿಯಾಗೇ ಸಂಸಾರ ನಡೆಸುತ್ತಿದ್ದೆವು ಎಂದು ಆರೋಪಿ ಪತ್ನಿ ಪೊಲೀಸರಿಗೆ ಹೇಳಿದ್ದಾಳೆ. ಇನ್ನು, ಶೈಲಜಾಳನ್ನು ಕೊಂದ ಬಳಿಕ ಅವನ ಸಹೋದರ ರಜತ್‌ಗೆ ಈ ಬಗ್ಗೆ ಮಾಹಿತಿ ನೀಡಿದ್ದ ಆರೋಪಿ ತನಗೆ ಹಣದ ಅಗತ್ಯವಿದೆ ಎಂದು ಹೇಳಿ ದುಡ್ಡು ಪಡೆದುಕೊಂಡಿದ್ದ. ಅಲ್ಲದೆ, ಒಂದು ವಾರದೊಳಗಾಗಿ ಹಣ ವಾಪಸ್ ಕೊಡುವುದಾಗಿ ತಿಳಿಸಿದ್ದ. ಆದರೆ, ಶೈಲಜಾ ಕೊಲೆಯಾದ 24 ಗಂಟೆಗೊಳಗಾಗಿ ಮೇಜರ್ ನಿಖಿಲ್ ರಾಯ್ ಹಾಂಡರನ್ನು ನಾವು ಬಂಧಿಸಿದ್ದೇವೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
Comments are closed.