ಕ್ರಿಕೆಟ್ ಮೈದಾನದಲ್ಲೇ ಕೇಕ್ ಕಟ್ ಮಾಡಿದ ಕ್ರಿಕೆಟ್ ದೇವರು!

ಮುಂಬಯಿ: ಭಾರತೀಯ ಕ್ರಿಕೆಟ್ ತಂಡದ ಮಾಜಿ ದಿಗ್ಗಜ ಸಚಿನ್ ತೆಂಡೂಲ್ಕರ್ ಅವರು ಏಪ್ರಿಲ್ 24ರಂದು 45ನೇ ವರ್ಷಕ್ಕೆ ಕಾಲಿರಿಸಿದ್ದಾರೆ. ಇದರಂತೆ ಶುಭಾಶಯಗಳ ಮಹಾಪೂರವೇ ಹರಿದು ಬಂದಿದೆ.

ಈ ನಡುವೆ ‘ಕ್ರಿಕೆಟ್ ದೇವರು’ ಸಚಿನ್ ತೆಂಡೂಲ್ಕರ್ ತಮ್ಮ 45ನೇ ಹುಟ್ಟುಹಬ್ಬವನ್ನು ಕ್ರಿಕೆಟ್ ಮೈದಾನದಲ್ಲೇ ಆಚರಿಸುವ ಮೂಲಕ ಗಮನ ಸೆಳೆದಿದ್ದಾರೆ.

ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಚ್ ಚಾಂಪಿಯನ್‌ಶಿಪ್‌ನಲ್ಲಿ ಮಂಗಳವಾರ ಇಲ್ಲಿನ ವಾಂಖೆಡೆ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಮುಂಬಯಿ ಇಂಡಿಯನ್ಸ್ ಹಾಗೂ ಸನ್‌ರೈಸರ್ಸ್ ಹೈದರಾಬಾದ್ ಪಂದ್ಯದ ನಡುವೆ ನೆರೆದಿದ್ದ ಸಾವಿರಾರು ಜನರ ಸನ್ಮುಖದಲ್ಲೇ ಸಚಿನ್ ಕೇಕ್ ಕಟ್ಟಿಂಗ್ ಮಾಡುವ ಮೂಲಕ ಬರ್ತ್ ಡೇ ಆಚರಿಸಿಕೊಂಡರು.

ಈ ವೇಳೆಯಲ್ಲಿ ಸ್ಟೇಡಿಯಂನಲ್ಲಿ ‘ಸಚಿನ್…ಸಚಿನ್’ ಎಂದು ಷೋಷಣೆ ಮೊಳಗಿತು. ಅಲ್ಲದ ಕ್ರಿಕೆಟ್ ಪ್ರೇಮಿಗಳಲ್ಲಿ ರೋಮಾಂಚನವನ್ನಂಟು ಮಾಡಿತ್ತು.

ನಿಮ್ಮ ಮಾಹಿತಿಗಾಗಿ, 2011ನೇ ಇಸವಿಯಲ್ಲಿ ಇದೇ ಮೈದಾನದಲ್ಲಿ ಸ್ಥಳೀಯ ಹೀರೊ ಆಗಿರುವ ಸಚಿನ್ ತೆಂಡೂಲ್ಕರ್ ತಮ್ಮ ಆರನೇ ಪ್ರಯತ್ನದಲ್ಲಿ ಏಕದಿನ ವಿಶ್ವಕಪ್ ಎತ್ತಿ ಹಿಡಿಯುವ ಮೂಲಕ ಇಡೀ ದೇಶಕ್ಕೆ ಹೆಮ್ಮೆಯಾಗಿದ್ದರು.

ಇನ್ನು ಐಪಿಎಲ್‌ನಲ್ಲಿ ಮುಂಬಯಿ ಪರ ಆಡಿರುವ ಸಚಿನ್ ಅವರಿಗೆ ‘ಐಕಾನ್’ ಪಟ್ಟ ನೀಡಿ ಗೌರವಿಸಿದೆ. ಇದರಿಂದ ನಿವೃತ್ತಿಯ ಬಳಿಕವೂ ಫ್ರಾಂಚೈಸಿ ಜತೆ ಮುಂದುವರಿದಿದ್ದಾರೆ.