ಮುಂಬೈ

ಮದುವೆಗೆ ಟಾಯ್ಲೆಟ್ ಗಿಫ್ಟ್ ಕೊಟ್ಟರು…: ಒಡವೆ ವಸ್ತ್ರಗಳ ಗೊಡವೆ ಬೇಡ ಎಂದ ಮದುವಣಗಿತ್ತಿ

Pinterest LinkedIn Tumblr

Marriage

ಅಕೋಲ (ಮಹಾರಾಷ್ಟ್ರ): ಅಲ್ಲಿ ಮದುವೆಯ ಸಂಭ್ರಮ, ಆದರೆ ವರ ವಧುವಿಗಿಂತಲೂ ಅಲ್ಲಿದ್ದ ವಸ್ತುಗಳತ್ತಲೇ ಎಲ್ಲರೂ ಕುತೂಹಲದಿಂದ ನೋಡುತ್ತಿದ್ದರು. ಮಹಾರಾಷ್ಟ್ರದ ಅಕೋಲಾದಲ್ಲಿ ವಧುವಿನ ತಾಯ್ತಂದೆಯರು ಆಕೆಗೆ ರೆಡಿಮೇಡ್ ಶೌಚಾಲಯವನ್ನು ಗಿಫ್ಟ್ ಕೊಟ್ಟಿದ್ದರು. ವಧುವಿನ ಅತ್ತೆಯ ಮನೆಯಲ್ಲಿ ಶೌಚಾಲಯವಿಲ್ಲದೇ ಇದ್ದದ್ದರಿಂದ ಈ ಉಡುಗೊರೆಗೆ ಇಷ್ಟೊಂದು ಮಹತ್ವ ಬಂದಿತ್ತು.

ಅಕೋಲಾದ ಯುವತಿ ಚೈತಾಲಿ ಡಿ ಗಲಖೆಗೆ ಯಾವತ್ಮಲ್‌ನ ದೇವೇಂದ್ರ ಮಖೋಡೆಯೊಂದಿಗೆ ಕೆಲ ದಿನಗಳಹಿಂದೆ ಮದುವೆ ನಿಶ್ಚಿತಾರ್ಥವಾಯಿತು. ಹುಡುಗ, ಹುಡುಗನ ಮನೆತನ ಎಲ್ಲವೂ ಇಷ್ಟವಾಗಿತ್ತು. ಆದರೆ ತೀರಾ ನೋಡಿದರೆ ಆತನ ಮನೆಯಲ್ಲಿ ಶೌಚಾಲಯವೇ ಇಲ್ಲ ಅನ್ನೋ ಅಂಶ ಬೆಳಕಿಗೆ ಬಂತು.

”ಮದುವೆ ಪೂರ್ತಿ ನಿಕ್ಕಿಯಾಗಿತ್ತು. ಆದರೆ ಅವರ ಮನೆಯಲ್ಲಿ ಶೌಚಾಲಯವೇ ಇಲ್ಲ ಎಂದಾಗ ಆಘಾತವಾಗಿತ್ತು. ಈ ಬಗ್ಗೆ ಅಪ್ಪಅಮ್ಮ, ಅಕ್ಕತಂಗಿಯರೊಂದಿಗೆ ವಿವರವಾಗಿ ಚರ್ಚಿಸಿದೆ,” ಎನ್ನುತ್ತಾರೆ ಮದುವಣಗಿತ್ತಿ ಚೈತಾಲಿ.

”ನನಗೆ ಒಡವೆ ವಸ್ತ್ರಗಳ ಗೊಡವೆ ಬೇಕಿರಲಿಲ್ಲ. ಟಿವಿ ಮತ್ತಿತರ ಗೃಹೋಪಯೋಗಿ ಉಪಕರಣಗಳ ಬಗ್ಗೆಯೂ ಆಸಕ್ತಿಯಿರಲಿಲ್ಲ. ನನಗೆ ಅತ್ತೆ ಮನೆಗೆ ಒಯ್ಯಲು ಅನುವಾಗುವಂಥ ಶೌಚಾಲಯವೊಂದನ್ನು ಕೊಡಿ ಅಷ್ಟು ಸಾಕು ಎಂದು ಬೇಡಿಕೆಯಿಟ್ಟೆ,” ಎಂದು ವಿವರಿಸುತ್ತಾರೆ.

ಚೈತಾಲಿಯ ಬೇಡಿಕೆ ಕೇಳಿದ ಆಕೆಯ ತಂದೆ ‘ನಿಂಗೆ ತಲೆಕೆಟ್ಟಿದೆಯಾ’ ಎಂದು ಪ್ರಶ್ನಿಸಿದರಂತೆ. ಆದರೆ ಬಹಳಷ್ಟು ಚಿಂತನಮಂಥನ ನಡೆಸಿದ ಬಳಿಕ ಮಗಳ ಖುಷಿಗಿಂತಲೂ ಹೆಚ್ಚಿನದ್ದೇನಿದೆ ಎನ್ನಿಸಿ ಆಕೆಯ ಇಷ್ಟದ ಉಡುಗೊರೆ ಕೊಡಲು ನಿರ್ಧರಿಸಿದರು.

ಒಂದು ಸಿದ್ಧ ಶೌಚಾಲಯಕ್ಕೆ ಕಡಿಮೆಯೆಂದರೂ 18 ಸಾವಿರ ಖರ್ಚಾಗುತ್ತಿತ್ತು. ಸರಿ ಹುಡುಕಾಟ ಶುರುವಾಯ್ತು. ಇವರ ಪರದಾಟ ಕಂಡ ಸಿದ್ಧ ಶೌಚಾಲಯಗಳ ತಯಾರಕನೊಬ್ಬ ಕುತೂಹಲದಿಂದ ಕಾರಣ ಕೇಳಿದ. ಮಗಳ ಮದುವೆ ಉಡುಗೊರೆಯ ಸುದ್ದಿ ಹೇಳಿದಾಗ ಅವರಿಗೆ ಅಚ್ಚರಿ, ಖುಷಿ ಎರಡೂ ಒಟ್ಟೊಟ್ಟಿಗೆ ಆಯ್ತು.

ಪ್ರಧಾನಿ ನರೇಂದ್ರ ಮೋದಿ ಅವರ ಸ್ವಚ್ಛ ಭಾರತ್ ಅಭಿಯಾನದ ಸ್ವಯಂಸೇವಕರೂ ಆಗಿರುವ ಅವರು ಲಾಭವನ್ನು ಬಿಟ್ಟು ಬರಿ ಅದರ ನಿರ್ಮಾಣಕ್ಕೆ ತಗುಲಿದ ಖರ್ಚನ್ನಷ್ಟೇ ತೆಗೆದುಕೊಂಡು ಸಿದ್ಧ ಟಾಯ್ಲೆಟ್ ಒದಗಿಸಲು ಮುಂದಾದರು.

ಸರೀಕರು ಬೈಯುತ್ತಾರೇನೋ, ಅತ್ತೆ ಮನೆಯವರು ಏನೆಂದುಕೊಳ್ಳುತ್ತಾರೆ ಎಂಬ ಹಿಂಜರಿಕೆ ಗಲಾಖೆ ಅವರನ್ನು ಕಾಡುತ್ತಿತ್ತು. ಆದರೆ ಮದುವೆಯ ದಿನ ಎಲ್ಲರೂ ಸಿದ್ಧ ಶೌಚಾಲಯದ ಒಳಗೆ ಹೊರಗೆ ನೋಡುತ್ತಾ, ಅದರ ವಿವರಗಳನ್ನು ಪಡೆಯುತ್ತಾ, ಅದರ ಬಗ್ಗೆ ಮೆಚ್ಚುಗೆಯ ಮಾತನಾಡುತ್ತಿದ್ದದ್ದು ಕಂಡು ಗಲಾಖೆ ಕುಟುಂಬ ಸಂತಸ ಪಟ್ಟಿತು.

ಶೌಚಾಲಯದ ಉಡುಗೊರೆ ಪಡೆಯುವ ಚೈತಾಲಿಯ ನಿರ್ಧಾರ ಹಲವು ಯುವಕ ಯುವತಿಯರಿಗೆ ಸ್ಪೂರ್ತಿ ನೀಡಿದೆ.

”ನಮ್ಮಲ್ಲಿ ಅನೇಕರು ಶೀಘ್ರದಲ್ಲೇ ಮದುವೆಯಾಗಲಿದ್ದೇವೆ. ಹುಡುನ ಮನೆಯಲ್ಲಿ ಶೌಚಾಲಯವಿದೆಯೇ ಇಲ್ಲವೇ ವಿಚಾರಿಸಿ, ಇಲ್ಲದೇ ಇದ್ದರೆ ಇದನ್ನೇ ಕೊಂಡೊಯ್ಯುತ್ತೇವೆ,” ಎಂದಳೊಬ್ಬ ಯುವತಿ

Write A Comment