ಬೆಂಗಳೂರಿನಲ್ಲಿ ರೇಸ್ ಸಂದರ್ಭ ಕಾಲು ಮುರಿದುಕೊಂಡ ಕುದುರೆ; ಸಾರ್ವಜನಿಕರಿಂದ ದೊಡ್ಡಮಟ್ಟದ ಗಲಾಟೆ

ಬೆಂಗಳೂರು(ನ. 15): ನಗರದ ರೇಸ್ ಕೋರ್ಸ್​ನಲ್ಲಿ ಇವತ್ತು ದೊಡ್ಡಮಟ್ಟದ ಗಲಾಟೆಯೇ ನಡೆದುಹೋಗಿದೆ. ಕುದುರೆ ರೇಸ್ ನೋಡಲು ಬಂದಿದ್ದ ಸಾರ್ವಜನಿಕರು ಆವರಣದಲ್ಲಿ ದೊಡ್ಡ ರಂಪಾಟವನ್ನೇ ನಡೆಸಿದ್ದಾರೆ. ಇಂದು ನಡೆದ ರೇಸ್ ವೇಳೆ ಕುದುರೆಯೊಂದು ಕಾಲು ಮುರಿದುಕೊಂಡು ಬಿದ್ದದ್ದು ಈ ಘಟನೆಗೆ ಕಾರಣವಾಗಿದೆ. ಕಾಲುಮುರಿದುಕೊಂಡ ಕುದುರೆಯ ಬಾಲಕ್ಕೆ ಹಣ ಕಟ್ಟಿದ ಜನರೇ ಗಲಾಟೆಯಲ್ಲಿ ತೊಡಗಿದ್ದು ತಿಳಿದುಬಂದಿದೆ.

ಇವತ್ತಿನ ರೇಸ್​ನಲ್ಲಿ ಕಾಲು ಮುರಿದುಕೊಂಡು ಬಿದ್ದ ಕುದುರೆಯ ಹೆಸರು ವಿಲ್ ಟು ವಿನ್ ಆಗಿದೆ. ಸಂಜಯ್ ಆರ್. ಠಕ್ಕರೆ ಎಂಬುವರು ಈ ಕುದುರೆಯ ಮಾಲೀಕರಾದರೆ, ಪಾರ್ವತಿ ಡಿ. ಭೈರಾಂಜಿ ಅವರು ಟ್ರೈನರ್ ಆಗಿದ್ದಾರೆ.

ನಿನ್ನೆ ನಡೆದ ರೇಸ್​ನಲ್ಲಿ ಸೂರಜ್ ನೆರ್ರಾಡು ಎಂಬಾತ ಜಾಕಿಯಾಗಿ ಈ ಕುದುರೆ ಏರಿದ್ದ. ರೇಸ್ ಪ್ರಾರಂಭವಾಗಿ ಸ್ವಲ್ಪ ಹೊತ್ತಿನಲ್ಲೇ ವಿಲ್ ಟು ವಿನ್ ಕುದುರೆ ಕಾಲು ಮುರಿದುಕೊಂಡಿದೆ. ಕುದುರೆ ಮೇಲಿದ್ದ ಜಾಕಿ ಕೆಳಗೆ ಎಗರಿದರು. ಹಿಂದೆ ಬರುತ್ತಿದ್ದ ಇನ್ನೂ ಒಂದೆರಡು ಕುದುರೆಗಳ ಜಾಕಿಗಳು ಕೆಳಗೆ ಆಯತಪ್ಪಿ ಬಿದ್ದಿದ್ದಾರೆ. ಈ ರೇಸ್​ನಲ್ಲಿ ನಯಾಬ್ ಎಂಬ ಕುದುರೆ ಪ್ರಥಮ ಸ್ಥಾನ ಪಡೆಯಿತು. ಕಾಲು ಮುರಿದುಕೊಂಡ ಕುದುರೆಗೆ ಹಣ ಕಟ್ಟಿದ್ದವರು ಹತಾಶೆಗೊಂಡು ರೇಸ್​ಕೋರ್ಸ್​ನಲ್ಲಿ ಗಲಾಟೆ ನಡೆಸಿದರೆನ್ನಲಾಗಿದೆ.

ಟ್ರ್ಯಾಕ್ ಅಪಾಯಕಾರಿಯಾಗಿದೆ ಎಂಬ ವರದಿ ಬಂದರೂ ರೇಸ್ ಕೋರ್ಸ್ ಮ್ಯಾನೇಜ್ಮೆಂಟ್ ಅವರು ಸ್ಪರ್ಧೆಗೆ ಅನುವು ಮಾಡಿಕೊಟ್ಟಿದ್ದು ಜನರ ಆಕ್ರೋಶಕ್ಕೆ ಪ್ರಮುಖ ಕಾರಣವಾಗಿದೆ. ಪ್ರತೀ ರೇಸ್ ಸೀಸನ್ ಪ್ರಾರಂಭವಾಗುವ ಮುನ್ನ ಟ್ರ್ಯಾಕ್​ನ ಸ್ಥಿತಿಯನ್ನು ಪರೀಕ್ಷಿಸಲು ಮಾಕ್ ಸ್ಪರ್ಧೆ ಅಂದರೆ ಪರೀಕ್ಷಾರ್ಥ ಸ್ಪರ್ಧೆಗಳನ್ನು ನಡೆಸಲಾಗುತ್ತದೆ. ನ. 8ರಂದು ನಡೆದ ಮಾಕ್ ಟೆಸ್ಟ್​ನಲ್ಲಿ ಜಾಕಿಗಳು ಈ ಟ್ರ್ಯಾಕ್​ನಲ್ಲಿ ಕುದುರೆ ಓಡಿಸಲು ಕಷ್ಟವಾಗಬಹುದು. ಅಧಿಕೃತವಾಗಿ ಸ್ಪರ್ಧೆಯ ಸೀಸನ್ ಆರಂಭಿಸುವ ಮುನ್ನ ಇನ್ನೂ ಕೆಲ ಬಾರಿ ಮಾಕ್ ಟೆಸ್ಟ್​​​ಗಳು ಆಯೋಜಿಸಿರಿ ಎಂದು ಸಲಹೆ ನೀಡಿ ವರದಿ ಕೊಟ್ಟಿದ್ದರು. ಆದರೂ ಕೂಡ ರೇಸ್ ಕೋರ್ಸ್ ಆಡಳಿತ ಮಂಡಳಿಯು ಸ್ಪರ್ಧೆ ನಡೆಸಿರುವುದು ತಿಳಿದುಬಂದಿದೆ.