ಗಂಡನ ಹಿಂಸೆಯಿಂದ ರಕ್ಷಿಸಿ; ಯುಎಇ ಶಾರ್ಜಾದಲ್ಲಿರುವ ಬೆಂಗಳೂರು ಮಹಿಳೆಯ ಟ್ವೀಟ್ ವೈರಲ್

ದುಬೈ: ಪತಿಯ ಹಿಂಸೆಯಿಂದ ತನ್ನನ್ನು ರಕ್ಷಿಸಿ ಎಂದು ಮಹಿಳೆಯೊಬ್ಬಳ ವಿಡಿಯೋ ಟ್ವೀಟ್ ವೈರಲ್ ಆಗಿದೆ. ವಿಡಿಯೋದಲ್ಲಿರುವ ಮಹಿಳೆ ತನ್ನನ್ನು ಬೆಂಗಳೂರು ಮೂಲದ ಜಾಸ್ಮಿನ್ ಸುಲ್ತಾನ ಎಂದು ಪರಿಚಯಿಸಿಕೊಂಡಿದ್ದು ಪತಿ ಹಲ್ಲೆ ಮಾಡಿದ್ದಾನೆ ಆತನಿಂದ ನನ್ನನ್ನು ರಕ್ಷಿಸಿ ಎಂದು ವಿಡಿಯೋದಲ್ಲಿ ಕೇಳಿಕೊಂಡಿದ್ದಾರೆ.

ಜಾಸ್ಮಿನ್ ಸುಲ್ತಾನ ಯುಎಇ ಶಾರ್ಜಾದಲ್ಲಿ ವಾಸಿಸುತ್ತಿದ್ದು ಆಕೆಯ ಪತಿ ಮುಹಮ್ಮದ್ ಖೈಸರ್ ಹಲ್ಲೆ ಮಾಡಿದ್ದಾನೆ ಎಂದು ಆರೋಪಿಸಿದ್ದಾರೆ. ನನಗೆ ತಕ್ಷಣ ಸಹಾಯ ಬೇಕಾಗಿದೆ. ಇಬ್ಬರು ಮಕ್ಕಳನ್ನು ಹೊಂದಿರುವ ನನಗೆ ಪತಿ ಕ್ರೂರವಾಗಿ ಹಲ್ಲೆ ಮಾಡಿದ್ದಾನೆ ನನ್ನನ್ನು ಕೂಡಲೇ ರಕ್ಷಣೆ ಮಾಡಿ ಎಂದು ಜಾಸ್ಮಿನ್ ವಿನಂತಿಸಿದ್ದಾರೆ.

ಮಹಿಳೆ ಟ್ವಿಟ್ಟರ್‌ನಲ್ಲಿ ಹಾಕಿರುವ ವಿಡಿಯೋದಲ್ಲಿ ಮುಖದ ಮೇಲೆ ಹಲ್ಲೆಯಾಗಿರುವುದು ಗೋಚರಿಸುತ್ತಿದೆ. ಕಣ್ಣು ಊದಿಕೊಂಡಿದ್ದು ರಕ್ತ ಸೂರುತ್ತಿದೆ. ಈ ವಿಡಿಯೋಗೆ ಟ್ವಿಟ್ಟರ್‌ನಲ್ಲಿ ವ್ಯಾಪಕ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು ಯುಎಇನಲ್ಲಿರುವ ಭಾರತೀಯ ರಾಯಬಾರಿ ಕಚೇರಿಗೆ ಟ್ಯಾಗ್ ಮಾಡಿ ಕೂಡಲೇ ಸ್ಪಂದಿಸುವಂತೆ ಮನವಿ ಮಾಡಿದ್ದಾರೆ.