ಬೆಂಗಳೂರು (ಅ.2): ಕೆಫೆ ಕಾಫಿ ಡೇ ಮುಖ್ಯಸ್ಥ ಹಾಗೂ ಹಿರಿಯ ರಾಜಕಾರಣಿ ಎಸ್ಎಂ ಕೃಷ್ಣ ಅಳಿಯ ಸಿದ್ಧಾರ್ಥ್ ಸಾವಿನ ಪ್ರಕರಣದ ಸುತ್ತ ಅನುಮಾನದ ಹುತ್ತಗಳೇ ಬೆಳೆದಿವೆ. ಕೆಲವರು ಇದನ್ನು ಆತ್ಮಹತ್ಯೆ ಎಂದು ಬಣ್ಣಿಸಿದರೆ, ಇನ್ನೂ ಕೆಲವರು ಇದು ಕೊಲೆ ಎಂದು ಶಂಕಿಸಿದ್ದಾರೆ. ಈ ಮಧ್ಯೆ ಈ ಪ್ರಕರಣದಲ್ಲಿ ಹೊಸ ಹೊಸ ತಿರುವುಗಳು ಎದುರಾಗುತ್ತಿವೆ.
ಸೋಮವಾರ ಸಂಜೆ ಸಕಲೇಶ್‌ಪುರದಿಂದ ಮಂಗಳೂರು ಬರುವ ದಾರಿ ಮಧ್ಯೆ ಸಿದ್ಧಾರ್ಥ್ ಕಾರಿನಲ್ಲೇ ಕುಳಿತು ಸುಮಾರು ಅರ್ಧ ಗಂಟೆ ಮಾತುಕತೆ ನಡೆಸಿದ್ದರು. ಇಂಗ್ಲಿಷ್ನಲ್ಲಿ ಸಂಭಾಷಣೆ ನಡೆಸಿದ್ದರಿಂದ ಸಿದ್ಧಾರ್ಥ್ ಏನು ಮಾತನಾಡಿದ್ದಾರೆ ಎಂಬುದು ಕಾರು ಚಾಲಕನಿಗೆ ಅರ್ಥವಾಗಿಲ್ಲ. ಸಿದ್ಧಾರ್ಥ್ ಇಂಗ್ಲಿಷ್ನಲ್ಲಿ ಮಾತನಾಡಿದ್ದು ಯಾರ ಜೊತೆಗೆ ಎಂಬುದು ಇನ್ನೂ ನಿಗೂಢವಾಗಿಯೇ ಉಳಿದಿದೆ. ಅವರು ಯಾರ ಜೊತೆ ಮಾತನಾಡುತ್ತಿದ್ದರು, ಏನು ಮಾತನಾಡುತ್ತಿದ್ದರು ಎಂಬುದು ನನಗೆ ಅರ್ಥವಾಗಿಲ್ಲ ಎಂದು ಸಿದ್ಧಾರ್ಥ್ ಕಾರು ಚಾಲಕ ಪೊಲೀಸರಿಗೆ ತಿಳಿಸಿದ್ದಾರೆ.
ಇನ್ನು, ಮಂಗಳೂರಿಗೆ ಆಗಮಿಸುವ ದಾರಿ ಮಧ್ಯೆ ಸಿದ್ಧಾರ್ಥ್ ಲೆಟರ್ ಕೂಡಾ ಪೋಸ್ಟ್ ಮಾಡಿದ್ದಾರೆಂಬ ಮಾಹಿತಿ ಕೂಡ ಲಭ್ಯವಾಗಿದೆ. ಅವರು ಯಾವ ಉದ್ದೇಶಕ್ಕೆ ಪತ್ರ ಬರೆದಿದ್ದರು? ಯಾರಿಗೆ ಕಳುಹಿಸಿದ್ದರು? ಪತ್ರದಲ್ಲಿ ಏನಿತ್ತು? ಎಂಬುದು ಇನ್ನೂ ರಹಸ್ಯವಾಗಿಯೇ ಉಳಿದುಕೊಂಡಿದೆ.
ಸಿದ್ಧಾರ್ಥ್ ನಿತ್ಯ ಬಳಕೆ ಮಾಡುತ್ತಿದ್ದುದು ದುಬಾರಿ ಬೆಲೆಯ ಮೊಬೈಲ್. ಆದರೆ, ಮಂಗಳೂರಿಗೆ ತೆರಳುವಾಗ ಮಾತ್ರ ಅವರು, ದುಬಾರಿ ಮೊಬೈಲ್ಅನ್ನು ಕಾರ್ನಲ್ಲಿಯೇ ಇಟ್ಟು ಸಣ್ಣ ಮೊಬೈಲ್ನಲ್ಲಿ ಮಾತುಕತೆ ನಡೆಸುತ್ತಿದ್ದರು ಎನ್ನಲಾಗಿದೆ. ಆತ್ಮಹತ್ಯೆ ಪತ್ರದ ರೀತಿಯಲ್ಲಿ ಸಿಕ್ಕಿರುವ ಲೆಟರ್ ಬಗ್ಗೆಯೂ ಪೊಲೀಸರಿಗೆ ಸಾಕಷ್ಟು ಅನುಮಾನಗಳು ಕಾಡಿವೆ. ಈ ಹಿನ್ನೆಲೆಯಲ್ಲಿ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ.
ಸೋಮವಾರ ಉದ್ಯಮಕ್ಕೆ ಸಂಬಂಧಿಸಿದ ಕೆಲಸ ಎಂದು ಹೇಳಿ ಡ್ರೈವರ್ ಜೊತೆ ಸಿದ್ಧಾರ್ಥ್ ಮಂಗಳೂರಿಗೆ ತೆರಳುತ್ತಿದ್ದರು. ಕಾರಿನಲ್ಲಿ ತೆರಳುವಾಗ ಸಿದ್ಧಾರ್ಥ್ ಮೊಬೈಲ್ನಲ್ಲಿ ಮಾತನಾಡುತ್ತಲೇ ಇದ್ದರಂತೆ. ಮಂಗಳೂರಿನ ಉಳ್ಳಾಲ ಸಮೀಪ ಇರುವ ಒಂದು ಕಿ.ಮೀ ಉದ್ದದ ಬ್ರಿಡ್ಜ್ ಮೇಲೆ ಅವರು ಇಳಿದಿದ್ದರು.
ಚಾಲಕನ ಬಳಿ ಕಾರಿನಲ್ಲೇ ಇರುವಂತೆ ಸೂಚಿಸಿದ ಸಿದ್ಧಾರ್ಥ್ ಮೊಬೈಲ್ನಲ್ಲಿ ಮಾತನಾಡುತ್ತಾ ಸಾಗಿದ್ದರು. ಬ್ರಿಡ್ಜ್ನ ಮತ್ತೊಂದು ತುದಿಯಿಂದ ಬರುವಾಗ ಅವರು ಕಾಣೆಯಾಗಿದ್ದರು. ಬುಧವಾರ ಬೆಳಿಗ್ಗೆ ಅವರ ಶವ ನೇತ್ರಾವತಿ ನದಿ ಹಿನ್ನೀರಿನಲ್ಲಿ ದೊರೆತಿತ್ತು.
Comments are closed.