2-3 ದಿನಗಳಲ್ಲಿ ತೀವ್ರಗೊಳ್ಳಲಿದೆ ಮಾನ್ಸೂನ್; ಮಂಗಳೂರು, ಮೈಸೂರು ಭಾಗಗಗಳಲ್ಲಿ ಅತಿ ಹೆಚ್ಚು ಮಳೆ ಸಾಧ್ಯತೆ​

ನವದೆಹಲಿ: ಮಾನ್ಸೂನ್​ ಮಾರುತಗಳು ಇನ್ನೆರೆಡು ದಿನಗಳಲ್ಲಿ ಮಧ್ಯ ಭಾರತವನ್ನು ಪ್ರವೇಶಿಸಲಿವೆ. ಮಧ್ಯಪ್ರದೇಶ, ರಾಜಸ್ಥಾನ, ಉತ್ತರ ಪ್ರದೇಶ ಮತ್ತು ಗುಜರಾತ್​ ಹಾಗೂ ಮಹಾರಾಷ್ಟ್ರಕ್ಕೆ ಮುಂಗಾರು ಮಳೆ ನಾಳೆ ವೇಳೆಗೆ ಕಾಲಿಡಲಿದೆ.

ಕರ್ನಾಟಕದ ಕರಾವಳಿ ಪ್ರದೇಶಗಳಲ್ಲಿಯೂ ಸಹ ಮುಂಗಾರು ಮಳೆ ತನ್ನ ಆರ್ಭಟವನ್ನು ತೋರಿಸಲಿದೆ. ಮಂಗಳೂರು, ಮೈಸೂರು ಭಾಗಗಗಳಲ್ಲಿ ಅತಿ ಹೆಚ್ಚು ಮಳೆಯಾಗಲಿದೆ ಎನ್ನಲಾಗಿದೆ. ಕಡಲೂರು, ಪಾಸಿಘಾಟ್​, ಅಗರ್ತಲಾ ಮೊದಲಾದ ಪ್ರದೇಶಗಳಲ್ಲಿ ಮಳೆಯಾಗಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ತಿಳಿಸಿದೆ.

ವಾಯು ಚಂಡಮಾರುತ ಅಪ್ಪಳಿಸಿದ ಪರಿಣಾಮ ಈ ಬಾರಿ ಮುಂಗಾರು ಪ್ರವೇಶ ತಡವಾಯಿತು ಎಂಬುದು ಹವಾಮಾನ ಇಲಾಖಾ ಅಧಿಕಾರಿಗಳ ಅಭಿಪ್ರಾಯವಾಗಿದೆ.

ಮಹಾರಾಷ್ಟ್ರ-ಗುಜರಾತ್​ನ ಪಶ್ಚಿಮ ಕರಾವಳಿಯಲ್ಲಿ ಚಂಡಮಾರುತದ ಪರಿಣಾಮ ಮಳೆಯಾಗಿದೆ.

ಕರ್ನಾಟಕ ಹಾಗೂ ಕೇರಳ ರಾಜ್ಯಗಳ ಕರಾವಳಿ ಪ್ರದೇಶಗಳಲ್ಲಿ ಮಾತ್ರ ಮಳೆಯಾಗಿದೆ. ವಾಯು ಚಂಡಮಾರುತ ಸೋಮವಾರ ಸಂಜೆ ಗುಜರಾತ್​ ಕರಾವಳಿ ತೀರವನ್ನು ಹಾಯ್ದು ಹೋಗಲಿದ್ದು, ಅದರ ಪ್ರಭಾವ ಕುಗ್ಗಲಿದೆ. ಹೀಗಾಗಿ ವಾಯು ಚಂಡಮಾರುತ ಮಾನ್ಸೂನ್​ ಮಾರುತಗಳು ಅರೇಬಿಯನ್​ ಸಮುದ್ರದ ಕಡೆಗೆ ಸಾಗಲು ದಾರಿ ಮಾಡಿಕೊಡುತ್ತದೆ ಎನ್ನಲಾಗಿದೆ.

ಮಾನ್ಸೂನ್​ ಮಾರುತಗಳು ಜೂನ್​ 8 ರಂದು ಕೇರಳವನ್ನು ಪ್ರವೇಶಿಸಿದ್ದವು. ವಾಯು ಚಂಡಮಾರುತದಿಂದಾಗಿ ಮುಂಗಾರು ಮಳೆಯ ಪ್ರಮಾಣ ಕಡಿಮೆಯಾಗಿತ್ತು. ಇನ್ನೆರೆಡು ಮೂರು ದಿನಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಮುಂಗಾರು ಮಳೆಯಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕರ್ನಾಟಕ, ತಮಿಳುನಾಡು, ಉತ್ತರ ಬಂಗಾಳ, ಸಿಕ್ಕಿಂನಲ್ಲಿ ಭಾರೀ ಮಳೆಯಾಗಲಿದೆ.