ಬೆಂಗಳೂರು: ರಾಜಧಾನಿಯಲ್ಲಿ ಆಟೋ ಓಡಿಸುತ್ತಿದ್ದ ಸಾಮಾನ್ಯ ವ್ಯಕ್ತಿಯೊಬ್ಬ ದಿಢೀರ್ ಶ್ರೀಮಂತನಾದ ಕಥೆಗೆ ಈಗ ಬಿಗ್ ಟ್ವಿಸ್ಟ್ ಸಿಕ್ಕಿದೆ. ಅತಿ ಬಡತನದಲ್ಲಿ ಜೀವನ ಸಾಗಿಸುತ್ತಿದ್ದ ಆತನ ಬಳಿ ಐಷಾರಾಮಿ ವಿಲ್ಲಾ ಬಂದಿದ್ದು ಹೇಗೆ ಎನ್ನುವ ಕಥೆಯನ್ನು ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳ ಎದುರು ಬಿಚ್ಚಿದ್ದಾನೆ.
ಆಟೋ ಚಾಲಕ ಸುಬ್ರಮಣಿ ಮನೆ ಮೇಲೆ ಐಟಿ ಇಲಾಖೆ ಅಧಿಕಾರಿಗಳು ದಾಳಿ ನಡೆಸಿದ್ದರು. ಈ ವೇಳೆ ಆತ 1.60 ಕೋಟಿ ರೂ. ಮೌಲ್ಯದ ವಿಲ್ಲಾ ಹೊಂದಿರುವ ವಿಚಾರ ಬೆಳಕಿಗೆ ಬಂದಿತ್ತು. ಈ ಬಗ್ಗೆ ಸುಬ್ರಮಣಿ ವಿವರಣೆ ನೀಡಿದ್ದಾರೆ.
ವಿದೇಶಿ ಮಹಿಳೆಯೊಬ್ಬಳು ತನಗೆ ಈ ವಿಲ್ಲಾ ಕೊಡಿಸಿದ್ದಾರೆ ಎಂದು ಸುಬ್ರಮಣಿ ಹೇಳಿಕೊಂಡಿದ್ದಾನೆ. “ನನಗೆ ವಿದೇಶಿ ವೃದ್ಧ ಮಹಿಳೆಯೊಬ್ಬಳು ಈ ವಿಲ್ಲಾ ಕೊಡಿಸಿದ್ದಾರೆ. ನನಗೆ ಅವರು 14 ವರ್ಷಗಳಿಂದ ಪರಿಚಯ. ಆರಂಭದಲ್ಲಿ ಆ ಮಹಿಳೆ ಒಮ್ಮೆ ನನ್ನ ಆಟೋದಲ್ಲಿ ಬಂದಿದ್ದರು. ವೈಟ್ಫೀಲ್ಡ್ ಏರಿಯಾದಲ್ಲಿ ನಡ್ಕೊಂಡು ಹೋಗುತ್ತಿದ್ದಾಗ ಅವರನ್ನು ಬಿಟ್ಟು ನಾನೇ ಡ್ರಾಪ್ ಮಾಡಿದ್ದೆ,” ಎಂದು ಹೇಳಿಕೊಂಡಿದ್ದಾನೆ ಆತ.
ಈ ಘಟನೆ ನಂತರದಲ್ಲಿ ಸುಬ್ರಮಣಿ ಮೇಲೆ ಅವರಿಗೆ ಅಪಾರ ನಂಬಿಕೆ ಬಂತಂತೆ. “ನಾನು ಅವರನ್ನು ಎರಡು ಬಾರಿ ಡ್ರಾಪ್ ಮಾಡಿದ ನಂತರ ಅವರಿಗೆ ನನ್ನ ಮೇಲೆ ನಂಬಿಕೆ ಬಂತು. ಅವರು ಏನಾದರು ಸಣ್ಣ ಪುಟ್ಟ ಕೆಲಸಗಳಿಗೆ ಪೋನ್ ಮಾಡುತ್ತಿದ್ದರು. ಇದೇ ವಿಶ್ವಾಸದ ಮೇಲೆ 3 ವರ್ಷಗಳ ಹಿಂದೆ ಜತ್ತಿ ದ್ವಾರಕದಲ್ಲಿ ವಿಲ್ಲಾ ಕೊಡಿಸಿದ್ದರು. ಇನ್ನೂ ಎರಡು ಆಟೋ ತೆಗಿಸಿಕೊಟ್ಟರು,” ಎಂದು ಸುಬ್ರಮಣಿ ಹೇಳಿಕೊಂಡಿದ್ದಾರೆ.
ವಿಲ್ಲಾ ಖರೀದಿ ಬಗ್ಗೆ ಸೂಕ್ತ ದಾಖಲೆಗಳನ್ನ ಐಟಿ ಇಲಾಖೆಗೆ ಸುಬ್ರಮಣಿ ನೀಡಿದ್ದಾರಂತೆ. ಏ.16ರಂದು ಬೆಳಗ್ಗೆ 11 ಕ್ಕೆ ಬಂದ ಅಧಿಕಾರಿಗಳಿಂದ ಮಧ್ಯಾಹ್ನ 2:30 ರ ವರೆಗೆ ದಾಖಲೆಗಳ ಪರಿಶೀಲನೆ ನಡೆಸಿ, ಮಹತ್ವದ ದಾಖಲೆಗಳನ್ನು ವಶಪಡಿಸಿಕೊಂಡಿದ್ದರು. ದಾಳಿ ವೇಳೆ ಸಿಕ್ಕಿರುವ ದಾಖಲೆಗಳ ಬಗ್ಗೆ ವಿವರಣೆ ನೀಡುವಂತೆ ಸೂಚನೆ ನೀಡಿದ್ದಾರೆ.
Comments are closed.