ಕರ್ನಾಟಕ ಬಂದ್​ ಸಿದ್ದರಾಮಯ್ಯ ಪ್ರೇರಿತ ಎಂದು ಆರೋಪಿಸಿ ವಿರೋಧಿಸಿದ ಯಡಿಯೂರಪ್ಪ

ಮೈಸೂರು: ವಿವಿಧ ಸಂಘಟನೆಗಳು ಜ.25ರಂದು ಕರ್ನಾಟಕ ಬಂದ್​ಗೆ ಕರೆ ನೀಡಿರುವುದರ ಬಗ್ಗೆ ಬಿಜೆಪಿ ರಾಜ್ಯಾಧ್ಯಕ್ಷ ಬಿ. ಎಸ್​. ಯಡಿಯೂರಪ್ಪ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಸೋಮವಾರ ಇಲ್ಲಿ ಮಾತನಾಡಿದ ಅವರು, ಮಹದಾಯಿಗೂ ಮೈಸೂರು ಭಾಗಕ್ಕೂ ಏನು ಸಂಬಂಧ? ಇದೆಲ್ಲ ಸಿದ್ದರಾಮಯ್ಯನಡೆಸುತ್ತಿರುವ ಬಂದ್​ ಎಂದರು. ಸಿಎಂ ತಾವಾಗಿಯೇ ಬಸ್​ ನಿಲ್ಲಿಸಿ ಕಿತಾಪತಿ ನಡೆಸುತ್ತಿದ್ದಾರೆ. ಅಂದು ನಡೆಯಲಿರುವ ಬಿಜೆಪಿ ಪರಿವರ್ತನಾ ಯಾತ್ರೆ ನಡೆದೇ ನಡೆಯುತ್ತದೆ ಎಂದರು.

ಬಿಜೆಪಿ ಬೆಂಬಲ ಮಹದಾಯಿ ಹೋರಾಟಕ್ಕಿದೆ. ಆದರೆ, ಈ ಬಂದ್​ಗೆ ಅಲ್ಲ. ನಿಜವಾಗಿಯೂ ಹೋರಾಟದ ಅನಿವಾರ್ಯ ಇರೋದು ಕಾಂಗ್ರೆಸ್ ವಿರುದ್ಧ. ನೀರು ಕೊಡುತ್ತೇವೆಂದು ಗೋವಾ ಸಿಎಂ ಹೇಳಿದ್ದಾರೆ. ಆದರೆ, ಅದಕ್ಕೆ ಅಲ್ಲಿನ ಕಾಂಗ್ರೆಸ್ ವಿರೋಧ ಪಡಿಸುತ್ತಿದೆ. ಇದರ ವಿರುದ್ಧ ಕಾಂಗ್ರೆಸ್ ಯಾಕೆ ಪ್ರತಿಭಟನೆ ಮಾಡುತ್ತಿಲ್ಲ ಎಂದು ಬಿಎಸ್​ವೈ ಪ್ರಶ್ನಿಸಿದರು.

ಬಂದ್​ ಹಿಂದೆ ಸಿಎಂ ಮಿದುಳು ಕೆಲಸ ಮಾಡುತ್ತಿದೆ: ಶೆಟ್ಟರ್​

ಹುಬ್ಬಳ್ಳಿ: ಜ.25 ಹಾಗೂ ಫೆ.4ರ ಬಂದ್​ ವಿಚಾರವಾಗಿ ಇಲ್ಲಿ ಪ್ರತಿಕ್ರಿಯಿಸಿದ ವಿಪಕ್ಷ ನಾಯಕ ಜಗದೀಶ್​ ಶೆಟ್ಟರ್​, ಇದರ ಹಿಂದೆ ಸಿಎಂ ಸಿದ್ದರಾಮಯ್ಯ ಮಿದುಳು ಕೆಲಸ ಮಾಡುತ್ತಿದೆ. ಇದು ಕಾಂಗ್ರೆಸ್​​ನ ಕುತಂತ್ರ ರಾಜಕೀಯದ ದ್ಯೋತಕ ಎಂದರು.

ಫೆ. 4ರಂದು ಬೆಂಗಳೂರಿಗೆ ಪ್ರಧಾನಿ ಮೋದಿ ಆಗಮನದ ಹಿನ್ನೆಲೆಯಲ್ಲಿ ಬಂದ್​​ಗೆ ಕರೆ ನೀಡಿರುವುದು ಸರಿಯಲ್ಲ. ಮಹದಾಯಿ ವಿಷಯದಲ್ಲಿ ಎಐಸಿಸಿ ಅಧ್ಯಕ್ಷ ರಾಹುಲ್​ ಗಾಂಧಿ ಮೌನ ಯಾಕೆ ವಹಿಸಿದ್ದಾರೆ? ಅವರು ತಮ್ಮ ನಿಲುವು ತಿಳಿಸಲಿ ಎಂದ ಅವರು, ನಾಳೆ ಸುದ್ದಿಗೋಷ್ಠಿಯಲ್ಲಿ ಮಲೇಷ್ಯಾ ಮರಳು ಗೋಲ್​ಮಾಲ್​ ಬಹಿರಂಗ ಮಾಡುತ್ತೇನೆ ಎಂದರು.