ಸನ್ನಿ ಡ್ಯಾನ್ಸ್‌ಗೆ ಬ್ರೇಕ್ ಹಾಕಲು ಯುವ ಸೇನೆ ಆಗ್ರಹ

ಬೆಂಗಳೂರು: ‘ಸನ್ನಿ ನೈಟ್ ಇನ್ ಬೆಂಗಳೂರು ಎನ್‌ವೈಇ 2018’ ಎಂಬ ಹೆಸರಿನ ಹೊಸ ವರ್ಷಾಚರಣೆ ಕಾರ್ಯಾಕ್ರಮದಲ್ಲಿ ಪಾಲ್ಗೊಳ್ಳಲು ಬಾಲಿವುಡ್ ನಟಿ ಸನ್ನಿ ಲಿಯೋನ್ ಆಗಮಿಸುತ್ತಿದ್ದು, ಇದಕ್ಕೆ ಕನ್ನಡ ಪರ ಸಂಘಟನೆಗಳಿಂದ ತೀವ್ರ ವಿರೋಧ ವ್ಯಕ್ತವಾಗುತ್ತಿದೆ.

ರಾಜ್ಯದ 15 ಜಿಲ್ಲೆಗಳಲ್ಲಿ ಸನ್ನಿ ಆಗಮನವನ್ನು ವಿರೋಧಿಸಿ, ರಕ್ಷಣಾ ವೇದಿಕೆ ಯುವ ಸೇನೆ ಪ್ರತಿಭಟನೆ ನಡೆಸಲಿದೆ.

ಕಳೆದ ಎರಡು ವಾರಗಳಲ್ಲಿ ಸನ್ನಿ ಲಿಯೋನ್ ವಿರುದ್ಧ ಕನ್ನಡ ಸೇನೆ ನಡೆಸುತ್ತಿರುವ ಎರಡನೇ ಪ್ರತಿಭಟನೆ ಇದಾಗಿದೆ.

‘ಸನ್ನಿ ಲಿಯೋನ್ ಕನ್ನಡತಿಯೂ ಅಲ್ಲ, ಭಾರತೀಯಳೂ ಅಲ್ಲ. ಆಕೆಯ ಹಿನ್ನಲೆ ಏನೆಂಬುವುದು ಎಲ್ಲರಿಗೂ ಗೊತ್ತು. ಅಂಥವರಿಂದ ನಾಡಿನ ಸಂಸ್ಕೃತಿ ಹಾಳಾಗೋದು ಬೇಡ,’ ಎಂದು ಸೇನೆಯ ಪದಾಧಿಕಾರಿಗಳು ಹೇಳಿದ್ದಾರೆ.

ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಳ್ಳಲು ಸನ್ನಿ ಇದೇ ಮೊದಲ ಬಾರಿಗೆ ಬೆಂಗಳೂರಿಗೆ ಆಗಮಿಸುತ್ತಿದ್ದಾರೆ. ಆದರೆ, ಡಿಕೆ ಎನ್ನುವ ಕನ್ನಡ ಚಿತ್ರವೊಂದರಲ್ಲಿ ‘ಸೇಸಮ್ಮ’ ಹಾಡಿನಲ್ಲಿ ಅತಿಥಿ ನಟಿಯಾಗಿ ಕಾಣಿಸಿಕೊಂಡಿದ್ದಾರೆ.